Falepuipui le ave taxi na faia uiga mataga i le teineitiiti 9 tausaga

E 20 masina lea ua fa’asala ai e le Fa’amasinoga Maualuga le ali’i ave taxi na tu’uaia i lona faia o uiga mataga i se teineititi e 9 tausaga le matua, ina ua ta’usala o ia e le Fa’amasinoga i le moliaga mamafa o lona tagofia lea o itutinosa o se teineititi e laititi i lalo o le tulafono.

O le fa’asalaga fa’a falepuipui ua tuuina atu i le susuga a Pitone Sivatia, o se tasi lea o tuutuuga o lana fa’anofovaavaaia e 5 tausaga na tuuina atu e le Fa’amasinoga i le vaiaso na te’a nei.

Na ulua’i tu’uaia e le malo ia Sivatia i moliaga mamafa e 2 o lona tagofia lea o itutinosa o se tama’ita’i i le tulaga muamua, ma le moliaga mama e tasi o lona faia lea o ni gaioiga e ono lamatia ai le saogalemu o fanau laiti.

Ae i lalo o se maliliega na sainia e le ua molia ma le malo, na tali ioe Sivatia i le moliaga e tasi o lona tagofia lea o itutinosa o se teineititi a laititi i lalo o le tulafono.

I le tali ioe ai o Sivatia i le moliaga e pei ona ta’usala ai o ia, sa ia ta’utino ai e fa’apea, i le taimi o le aso 28 o Ianuari o le tausaga na te’a nei, na ia tagofia ai itutinosa o se teineititi i se auala e fa’amalie ai lagona tu’inanau sa ia te ia.

Na taua e lana loia fautua ia Ryan Anderson e fa’apea, e ui i le matuia o le gaioiga sa faia e le ua molia, ua lagona e le ua molia le matuia o lana solitulafono, ma ua salamoni moni fo’i o ia mai lana mea sese sa faia.

Na talosaga Anderson i le fa’amasinoga mo se fa’asalaga faanofovaavaaia, ae fa’aaoga ai le umi e 16 masina lea ua mae’a ona tuli e le ua molia i le toese i Tafuna e fai ma ana fa’asalaga

Na lagolagoina e le loia a le malo le talosaga a le itu tete’e mo se fa’asalaga fa’anofovaavaaia, peita’i na finau le tama’ita’i loia sili lagolago ia Christy Dunn i le fa’amasinoga, ina ia tuuina atu se fa’asalaga fa’a falepuipui ia Sivatia, ona o le matuia o le gaioiga sa ia faia.

Na taua e le malo e fa’apea, e tatau ona momoli se feau taua i le atunu’u atoa, e le mama i le fa’amasinoga ituaiga amioga faapenei, o le faia lea o sauaga fa’asaga i fanau laiti. Ae o le itu e sili ai ona matuia, ona o le teineititi na a’afia e nonofo ma lona aiga i le Fale Mautotogi lea e mautotogi ai fo’i Sivatia i Pago Pago.

Na taua e le fa’amasinoga e fa’apea, o lenei mataupu na tofu atu i le Ofisa o Leoleo i Fagatogo i le po o Ianuari 28, 2018 ina ua logo e ni isi o le aiga le Ofisa o Leoleo mo se fesoasoani, i le mae’a ai lea ona fa’amatala e le teineititi i ona matua o le faalavelave sa tupu.

Na aga’i atu Leoleo i Pago Pago ma aumai le teineititi na a’afia ma lona Tina, atoa ai ma le pu’e fa’apagota o Sivatia.  Na faamatala e le teineititi na a’afia e fa’apea, na tuli o ia se tasi o ali’i e alu ia Sivatia e faanoi mai se .50sene e fa’atau ai sana apainu. Na alu le teineitiiti ma tu’itu’i le faitoto’a o le fale o Sivatia, ma tatala mai ai e Sivatia le faitoto’a.

Na fesili Sivatia i le teineititi na aafia pe i ai se mea e mana’o i ai, ona tali lea i ai o le teineititi, o ia na alu atu e faanoi mai sana .50sene e fa’atau ai sana apa inu. Na fai Sivatia i le teineititi e alu atu i totonu o le fale. Ina ua ulufale le teineititi i totonu, sa tapuni e Sivatia le faitoto’a ma fai i le teineititi la te o i totonu o le potu.

Na ave e le ua molia le teineititi i luga o lona moega, ona ia fai lea i ai e sosoo atu ia te ia peita’i sa musu le teineititi. Na aapa atu le ua molia ma toso atu le teineititi e faalatalata atu ia te ia, ona ia fa’atino ai loa lea o uiga mataga e ala i lona tagofia o vaega o lona tino.

Ao fa’atino e Sivatia ia gaioiga uma e pei ona fa’amatala e le teineititi i Leoleo, sa faalogoina e le teineititi le malosi o le manogi pia o lo o alu atu i lona tino. Sa vaaia fo’i e le teineititi ni apa pia ua uma ona inu o lo o taatitia i totonu o le lapisi i totonu o le fale a le ua molia. Na tu’u e Sivatia le .50 sene i le teineititi na a’afia ma fai ai loa e alu i fafo ma le fale. Na faatali le teineititi se’i taunu’u atu le uo tama a lona Tina, ona fa’atoa ia fa’amatala lea i ai le faalavelave sa tupu.

Ina ua fesiligia e Leoleo ia Sivatia e uiga i lenei fa’alavelave, na matua teena malosi e ia fa’amatalaga uma a le teineititi. Na taua e le ua molia i Leoleo e fa’apea, na te le o manatuaina se taimi na alu atu ai le teineititi lea i totonu o lona fale.

Na pau tamaitai na taua e le ua molia i Leoleo na o atu i lona fale i le aso lea, o ona niece e to’alua na o atu e avatu lana meaai ma latou tafafao. Na matua teena malosi e le ua molia lona faia o ni gaioiga mataga e pei ona tu’uaia ai o ia e le teineitiiti ma lona aiga.

Ae na fa’amatala e le Tina o le teineititi i Leoleo e fa’apea, e le o se taimi muamua lea ua tula’i mai ai lenei fa’alavelave i le va o Sivatia ma lana fanau teine. I le tausaga na te’a nei, sa faia ai fo’i e le ua molia ni uiga mataga i lana tama teine matua, peita’i na mafai lava ona teuteu i tua i le va lelei ma faia ai loa le tonu e le logoina Leoleo.

E 5 tausaga i le falepuipui ma le salatupe e $5,000 na faasala ai e le fa’amasinoga ia Sivatia, peita’i ua faamalumalu le tuliina o le faasalaga faa falepuipui atoa ai ma le totogiina o le salatupe, ae ua nofovaavaaia le ua molia mo le 5 tausaga i lalo o tuutuuga e ao ona ia usita’i i ai.

O nisi o ia tuutuuga e aofia ai lona tuliina o masina e 20 i le toese i Tafuna, atoa ai ma lona tuua o le atunuu pe a magalo mai i le toese. Peita’i o le tuutuuga o le tuua o le atunu’u o le a taofi lona faataunuuina i le taimi nei, se’i vagana ua toe avatu se isi poloaiga a le fa’amasinoga.

Ua faasa ona toe nofo le ua molia i le Fale Mautotogi i Pago Pago, ae ua poloaina o ia e saili se isi nofoaga e nofo ai, pe afai ae magalo mai i tua i le toese. Ua fautuaina fo’i o ia ina ia faia se suega o le HIV i lona tino, ma ia lesitala o ia i le lisi o i latou ua ta’usala i le faia o uiga mataga i fanau laiti.

Na faailoa e Kruse ia Sivatia, na te toe tagofia loa le ‘ava malosi, o lana ipu pia lava lena e tasi e toe faafo’i ai o ia i Samoa, poo le faatonu loa o ia e tuli atoa le faasalaga e 5 tausaga i le toese.