Falepuipui le ali’i sa galue Ofisa o Tiute i lona ave fa’agaoi silia $11,000

E 28 masina lea ua fa’a falepuipui ai a le Fa’amasinoga Maualuga le ali’i sa avea ma Ta’ita’i (supervisor) i le Ofisa o Tiute, i le vaega o lo o galulue i le malae va’alele i Tafuna, ina ua fa’amaonia lona ave fa’agaoi o tupe a le malo sa tuuina atu i lalo o lana vaavaaia e silia i le $11,000.

O le fa’asalaga fa’a falepuipui ua tuuina atu ia Sefulu Maifea, o se tasi lea o tuutuuga o lana nofovaavaaia a 7 tausaga, na tuuina atu e le Fa’amasinoga Maualuga i le vaiaso na te’a nei, ina ua ta’usala o ia i moliaga o lona ave fa’agaoi o tupe sa tuuina atu i lalo o lana vaavaaia.

Na ulua’i tuuaia e le malo ia Mafea i moliaga mamafa e 2, e aofia ai le moliaga o le gaoi faapea ai le moliaga o le ave faagaoi o meatotino sa tuuina atu na te tausi ma vaavaai. Ae i lalo o se maliliega na sainia e Maifea ma le malo, lea fo’i na talia e le fa’amasinoga maualuga, na malie ai le ua molia e tali ioe i le moliaga o le ave fa’agaoi o meatotino sa tuuina atu na te tausi ma vaavaai, ae solofua le moliaga o le gaoi.

I le tali ioe ai o Maifea i le moliaga e pei ona ta’usala ai o ia, sa ia ta’utino ai e fa’apea, i se taimi o le tausaga e 2017, sa galue ai o se Ta’ita’i mo le Ofisa o Tiute i le latou lala i le malae va’alele i Tafuna. O se tasi o ana matafaioi, o le alu lea e teu i le Ofisa o Tupe a le malo tupe uma sa maua mai i le auaunaga a le Ofisa o Tiute i le malae va’alele.

Na ta’utino Maifea e fa’apea, e le i fa’amaoni o ia i le fa’atinoina o ona tiute, e mafua mai ina ua ia fa’aaoga se isi vaega o tupe a le malo mo ia lava, ae teu na o sina vaega i le Ofisa o Tupe.

E $3,339 le tupe na ta’utino Maifea i totonu o le latou maliliega ma le malo sa ia ave fa’agaoi, peita’i i le ripoti a le Ofisa Faanofovaavaaia, e $11,500 le aofa’i sa’o o le tupe na ave fa’agaoi e le ua molia.

Na fa’atoese Maifea i le fa’amasinoga e tusa ai o lana solitulafono sa faia, ma ia talosagaina ai se isi avanoa mo ia. Sa ia taua e fa’apea, o lana solitulafono ua aafia ai tagata uma lava e alolofa ia te ia, e le gata i ona matua, o lona aiga, ekalesia aemaise ai le nu’u. Sa ia fa’atoese ia i latou uma nei ina ia alolofa ma fa’amagalo o ia.

E lei fa’atoese Maifea i le malo o Amerika Samoa, poo le Ofisa o Tiute sa galue ai o ia, e tusa ai o lana solitulafono.

Sa maua fo’i le avanoa e molimau ai lona Tina i luma o le fa’amasinoga. Na tau le mafai e le Tina ona fa’aleo lana molimau ona o le maligi o ona loifofoga, ui o lea, sa ia taumafai malosi pea e fa’aleo lana talosaga i afioga i ali’i Fa’amasinoga, ina ia maua se avanoa mo si ana tama o Sefulu.

Na taua e le Tina i lana molimau fa’amomoi loto e fa’apea, ina ua la fa’alogo mai ma le Tama o le aiga i Amerika ua molia Sefulu i le solitulafono e pei ona ta’usala ai o ia, sa la filifili ai loa e taofi le Talavai a le Tama, ae la toe fo’i vave mai i Amerika Samoa.

Sa la aga’i i le Teutupe a le malo ma fa’atoese i ai, sa la fa’atoese fo’i i le Pule o le Ofisa o Tiute e tusa ai o le solitulafono a Sefulu.

E le gata ai i i taumafaiga a matua a le ua molia, ae sa fa’aauau i ta’ita’i o le malo e aofia ai le Kovana ma le Lutena Kovana

Na taua e le Tina e faapea, sa la faatoese i le Kovana e tusa ai o le solitulafono a Sefulu, ma la talosagaina ai se avanoa e fa’amagalo ai si ana tama, peita’i o le saunoaga a le Kovana, e leai se mea e mafai ona ia toe faia ona ua oo le mataupu i luma o le Fa’amasinoga.

Na taua fo’i e le Tina le fa’atonu e le Kovana o le Loia Sili ma le Faatonusili o le Ofisa o Tagata Faigaluega a le malo, ina ia mautinoa e toe tuu le igoa o Sefulu i totonu o le ‘system’ a le malo, ina ia aua ne’i fa’amuta fa’afuase’i lana tautua ona o le solitulafono ua a’afia ai o ia, a ia fa’ailoa i fa’amaumauga a le malo o ia (Sefulu) sa malolo litaea aloaia mai i le malo.

Na talosaga le loia a Sefulu ia Michael White ina ia fa’asala le ua molia i se fa’asalaga nofovaavaaia, peita’i na finau le loia a le malo ia Woodrow Pengelly ina ia fa’asala Sefulu i le 24 masina i le toese, ma ia poloaina o ia na te toe totogi le tupe e $11,500 sa ia ave fa’agaoi.

Saunoa le afioga i le Fa’amasino Sili ia Michael Kruse e faapea, e ui i le mataina o le soifua tautua a Maifea i le malo, e aofia ai le taimi na tautua ai i le Navy, sosoo ai ma tausaga e 26 sa tautua ai mo Amerika Samoa, ae o loo i ai fo’i fa’amaumauga i ana solitulafono i luma o le Fa’amasinoga, e pei ona fa’alua ona ta’usala o ia i moliaga mama o le fa’aoolima i le tulaga tolu, ae fa’a 3 ona ta’usala i le ave ta’avale ‘ona.

Saunoa atili Kruse e fa’apea, o le matuia o le solitulafono sa fa’atino e Maifea, ua ia fa’aleaogaina ai le fa’atuatuaga sa tuuina e le malo o Amerika Samoa ia te ia.

O ni isi o tuutuuga o le nofovaavaaia a Maifea e 7 tausaga, e aofia ai lona tuliina o masina e 28 i le toese i Tafuna, atoa ai ma lona totogiina o le tupe e $11,500 i le malo.