Falepuipui le ali’i na ia gaoia le $5,000 a lona Uncle

Ua fa’asalaina nei e le Fa’amasinoga Maualuga se ali’i e 42 tausaga le matua i nofosala i le toese i Tafuna mo le 28 masina, ina ua fa’amaonia le moliaga o le gaoi sa tu’uaia ai o ia, e mafua mai i le fa’alavelave lea na ia ave fa’agaoiina ai le silia i le $5,000 mai lona Uncle.

O le ali’i o Paulo Lauti, na ulua’i tuuaia o ia e le malo i moliaga mamafa e 10. O ia moliaga e aofia ai moliaga e 5 o le gaoi, fa’apea ai ma moliaga e 5 o lona faia o ni tusitusiga tau fa’asese. Ae i se maliliega na sainia e Lauti ma le malo, na malie ai loa o ia e tali ioe i moliaga mamafa e 2, ae solofua moliaga o lo’o totoe.

O le vaiaso na te’a nei na tuuina atu ai le fa’asalaga a le Fa’amasinoga Maualuga fa’asaga ia Lauti, ina ua ta’usala o ia i le moliaga o le gaoi, fa’apea ai ma le moliaga o lona faia o ni fa’amaumauga sese, e ala i lona sainia fa’amalosi o le igoa o lona Uncle i luga o le siaki.

Na fa’atoese Lauti i le Fa’amasinoga e tusa ai o lana solitulafono, ma ia talosagaina ai se isi avanoa mo ia se’i fo’i atu ai i lona aiga e mafuta atu ai i si ona faletua, o si ana fanau, fa’apea lona aiga. Sa ia fa’ailoa i le Fa’amasinoga e fa’apea, talu mai masina e 2 na taofia ai o ia i le toese, ua ia a’oa’oina ai se lesona aoga mo lona olaga e tusa ai o lana solitulafono sa faia. Sa ia ta’utino atili i le Fa’amasinoga, na te le toe solia lava se tulafono a le malo i le lumana’i.

Na talosaga fo’i lona Faletua i le fa’amasinoga mo se avanoa e toe tatala atu ai i tua Lauti e fesoasoani ia te ia i le tausiga o le aiga. Na taua atili e le Tina e fa’apea, o le tupe e maua mai i le totogi fa’ai’u a Lauti mai lana galuega sa galue ai i le ASPA, o le a toe totogi ai le tupe a le Uncle a lona to’alua. Afai e totoe ai se vaega e le mae’a, ona ia taumafai loa lea e fa’atulaga se auala e totogi fa’amae’a ai le tupe atoa.

Na fa’ailoa e le ali’i loia fautua ia Michael White i le Fa’amasinoga e fa’apea, e ui i le matuia o le gaioiga sa faia e Lauti, peita’i o lo o manino i fa’amaumauga o lona olaga, o le ulua’i taimi lenei ua ta’usala ai o ia i se solitulafono.

Na fa’ailoa atili e White i le Fa’amasinoga le salamo moni o le ua molia e tusa ai o lana solitulafono, ma ua mana’o fo’i o ia e toe fo’i i tua i lona aiga e tausi lana fanau. Na talosaga White mo se fa’asalaga fa’anofovaavaaia mo Lauti, ae aua ne’i aofia ai se fa’asalaga fa’afalepuipui.

Na taua e le loia a le malo ia Robert Morris e fa’apea, na manino i le la talanoaga ma le Uncle, lona le fiafia tele i le gaioiga sa faia e Lauti, i lona gaoia lea o se vaega tupe tele mai ia te ia, e ala i lona sainia fa’amalosi o lona igoa i luga o ana siaki ae tala i le Faletupe. Na lagolago e Morris le fa’afinauga a White mo se fa’asalaga fa’anofovaavaaia, a ia aofia ai fo’i ma se poloaiga e toe totogi ai le tupe sa ia gaoia mai lona Uncle i le aofaiga e $5,100.

Na taua e le loia a le malo e fa’apea, na taua e le Uncle le i ai o ona masalosaloga, e foliga mai ua a’afia Lauti i le fa’afitauli o fualaau fa’asaina. Ona o lea tulaga, na talosagaina ai loa e Morris le Fa’amasinoga ina ia aofia i sana fa’aiuga le poloaiga e faia ai se suega i le tino o Lauti, ina ia mautinoa na te le o fa’aaogaina fualaau fa’asaina.

Na fa’ailoa e le afioga i le ali’i Fa’amasino ia Elvis P. Patea ia Lauti e fa’apea, ua fa’amalieina le Fa’amasinoga i fa’amaumauga uma e fa’atatau ia te ia, aemaise ai le leai o ni fa’amaumauga i ni ana solitulafono, ae talu ai le tele o le tupe na aofia i lana solitulafono, ua manatu ai le Fa’amasinoga e tatau lava ona i ai sina fa’asalaga fa’a falepuipui mo ia.

O ni isi o tuutuuga o le nofovaavaaia a Lauti mo le 7 tausaga, o lona tuliina lea o masina e 28 i le falepuipui i Tafuna. O le tuliina o lea fa’asalaga, o le a lava na o masina e 6 na te tuliina i totonu o le toese, e aofia ai ma masina e 2 lea sa taofia ai o ia i le falepuipui e fa’atali ai le fa’aiuga o lana mataupu, ae o masina e 22 o lo o totoe ai, o le a taofia e le Fa’amasinoga le tuliina.

Ua poloaina fo’i o ia na te toe totogi le tupe a lona Uncle e $5,100 i totonu o le tausaga atoa, ma ia faia ni siaki i lona tino ina ia fa’amaonia ai, na te le o tagofia le ‘ava malosi poo fualaau fa’asaina.