Falepuipui i le gaoia o meatotino a lona Tina e fa’atau ai ana ‘aisa

O le ali’i lea na ia gaoia meatotino a lona Tina, ona alu lea ua fa’atau ina ia maua mai ai tupe e fa’atau ai ana ‘aisa, ua poloaina e le fa’amasinoga ina ia taofia o ia i le falepuipui mo le umi e 20 masina, o se tasi lea o tuutuuga o lana nofovaavaaia e 5 tausaga.

Na taua e le ali’i o Marty Tanielu i luma o le fa’amasinoga maualuga i le vaiaso nei e fa’apea, sa ia naunau lava ina ia maua se avanoa e toe fa’atoese ai i si ona Tina e tusa ai o lana solitulafono sa faia, ae paga lea, na maliu si ona Tina i le masina na te’a nei a o taofia o ia i totonu o le falepuipui ona o lana solitulafono.

E 2 mataupu tau solitulafono ua ta’usalaina ai e le Fa’amasinoga Maualuga ia Tanielu. O le mataupu muamua ua ta’usala ai o ia i le moliaga mamafa o le umia faasolitulafono o vaega o le fualaau fa’asaina o le aisa.

O lea moliaga na afua mai i le fa’alavelave lea na tula’i mai i le aso 22 Novema 2017, ina ua saili e Leoleo lana ta’avale i luma o se faleoloa i Tafuna ma maua i ai vaega o fualaau fa’asaina o le aisa. O ia aisa e pei ona taua e Tanielu, sa fa’atau mai i le pisinisi o le Aute.

I le mataupu lona lua, na ta’usala ai o ia i le moliaga o le gaoi. O lea moliaga na afua mai ina ua ia gaoia meatotino a lona Tina e aofia ai filifili auro, mama, taulima ma uati ma fa’atau atu i isi tagata, e saili mai ai se tupe e fa’atau ai ana fualaau fa’asaina.

Na fa’atoese Tanielu i le fa’amasinoga e tusa ai o lana solitulafono, ma ia talosagaina ai se isi avanoa se’i toe fo’i atu ai i lona aiga e fa’aauau lana tausiga i lona aiga. Sa ia ta’utino i le fa’amasinoga, na te le toe solia se tulafono a le malo.

Na talosaga lana loia ia MIchael White ma le loia a le malo ia Woodrow Pengelly i le fa’amasinoga ina ia fa’asala le ua molia i se fa’asalaga faanofovaavaaia, ina ia maua ai le avanoa e toe fo’i atu ai o i ai lona aiga ma faia ni isi gaioiga e suia ai lona olaga.

Na taua e White e fa’apea, o le fa’afitauli o le fiafia i fualaau oona o le aisa na a’afia ai Tanielu, na mafua ai ona unaia o ia e gaoi meatotino a lona Tina, ina ia maua ai tupe e fa’atau mai ai fualaau fa’asaina.

E talitonu White, e tatau ona i ai se polokalame e fesoasoani ai i le fa’afitauli o le aisa e pei ona a’afia ai Tanielu.

Saunoa le afioga i le ali’i Fa’amasino ia Elvis P. Patea e fa’apea, e foliga mai i le silasila a le fa’amasinoga, e fesoota’i lelei lava solitulafono e pei ona ta’usala ai Tanielu, i le fa’afitauli o le tagofia lea o fualaau fa’asaina.

Saunoa atili Patea e fa’apea, na mafua ona gaoi e le ua molia meatotino mai lona Tina, ina ia maua mai ai se tupe e fa’atau ai fualaau fa’asaina o lo o momo’o i ai lona loto.

E 5 tausaga lea ua nofovaavaaia ai Tanielu i lalo o poloaiga e ao ona ia usita’i i ai. O ni isi o ia poloaiga e aofia ai lona tuliina o masina e 20 i le falepuipui i Tafuna. O le tuliina o lea fa’asalaga, o le a tuli na o masina e 6, ae o masina o lo o totoe ai o le a fa’amalumalu, fuafua lava i le tausisi o le ua molia i poloaiga a le fa’amasinoga.

Lona uiga, o se taimi o le masina lenei e atoa ai le 6 masina talu ona taofia Tanielu i le toese, ma sauni ai loa o ia e magalo i tua.

Ua poloaina e le fa’amasinoga o ia ina ia saili sana galuega ma galue tumau ai, ma aua ne’i ona toe tagofia ni fualaau fa’asaina i soo se taimi o lana nofovaavaaia.