Falepuipui ave ta’avale o le Loli lea na lavea ma maliu ai se ave pasi

Pago Pago - AMERIKA SAMOA

E 20 masina lea ua faasala ai i le Toese i Tafuna le ave ta’avale o le Loli lea na feto’ai ma se pasi la’u pasese i Satala i le tausaga na te’a nei ma maliu ai le ave pasi ae manunu’a le pasese, o se tasi lea o tuutuuga o lana faasalaga faanofovaavaaia e 5 tausaga.

E ui i le matuia o le faalavelave e pei ona ta’usala ai le alii ua molia, ae na manatu le Fa’amasinoga, ua avea ona itu lelei ma auala ua maua ai se faasalaga mama mo ia.

O le vaiaso nei na tula’i ai le ali’i o Jonathan Ulu i luma o le Fa’amasinoga Maualuga mo le tuuina atu o lana faasalaga. O le ali’i Loia Fautua ia Michael White na tula’i mo Ulu, ae o le tamaitai Loia Sili lagolago ia Kristine Soule’ na tula’i mo le malo.

Na ulua’i tu’uaia Ulu i moliaga mamafa e 2 o le ave ta’avale ua oo ai le maliu i se isi tagata, atoa ai ma le faaoolima i le tulaga lua, o vaega D ia o solitulafono mamafa, lea e mafai ona faasala ai se tasi i le Toese mo le umi e oo atu i le 5 tausaga, pe faasala i le salatupe e oo atu i le $5,000, poo le faasala fo’i i faasalaga uma ia e 2.

Sa tu’uaia fo’i Ulu i moliaga mama e 4 e aofia ai le faaoolima i le tulaga 3, o le vaega A lea o solitulafono mamafa, lea e mafai ona faasala ai se tasi i le Toese mo le umi e oo atu i le tausaga, pe faasala foi i le salatupe e oo atu i le $1,000, pe faasala foi i faasalaga uma ia e 2.

Ae i lalo o se maliliega na sainia e le malo, lea fo’i na talia e le Fa’amasinoga Maualuga i le 2 masina na tea nei, na tali ioe ai le ua molia i le solitulafono o le ave ta’avale ua mafua ai ona oo le maliu i se isi tagata, o le vaega D lea o solitulafono mamafa, lea e mafai ona faasala ai se tasi i le Toese mo le umi e oo atu i le 5 tausaga, pe faasala i le salatupe e le sili atu i le $5,000, pe faasala fo’i i faasalaga uma ia e 2.

I le tali ioe ai o Ulu i le solitulafono e pei ona ta’usala ai o ia, sa ia ta’utino ai e faapea, i se taimi o le aso 2 o Fepuari o le tausaga 2021, na fetoai ai lana ta’avale ma se pasi la’u pasese i se vaega o le alatele i Satala, ma maliu ai le ave pasi ase manunua le pasese sa i ai i totonu.

Na ta’utino atili le ua molia, o lana gaioiga sa faia i le aso, sa le tusa lea ma ala o le tulafono.

Ina ua maua le avanoa mai le Fa’amasinoga, na faatoese ai le ua molia e tusa ai o lana solitulafono, ma ia taua lona loto salamo e tusa ai o le gaioiga sa ia faia. 

Na taua e Ulu i le Fa’amasinoga e faapea, ina ua mae’a le faalavelave, sa faatino ai e lona aiga le ifoga i le aiga o le alii na maliu. Sa talia ma le agaga faafetai e le aiga o le alii na mali le ifoga sa faatinoina e lona aiga. 

I le aso o le maliu, na tauaao atu ai e lona aiga le seleni e $7,000 i le aiga o le alii na maliu, e fesoasoani ai i le tapenaina o lona Falelauasiga.

E le i manatu le Loia Fautua a Ulu e finau mo se faasalaga mama mo le ua molia. Ae mo le Loia a le malo, sa ia talosaga i le Fa’amasinoga mo se faasalaga faanofovaavaaia mo le ua molia.

E ui na taua e le tamaitai loia sili lagolago le matuia o le solitulafono sa faatinoina e le ua molia, e pei ona ma’imau ai le soifua o lenei Tama, o se to’alua, a o se uncle fo’i, peita’i sa ia talosaga i le Fa’amasinoga e fa’aaoga le fautuaga a le Ofisa Faanofovaavaaia o loo i totonu o le latou ripoti.

E silia i le 10 minute na malolo ai le Fa’amasinoga ae toe valaau loa le Fa’amasinoga mo le fofogaina o le latou faaiuga. 

Na faailoa e le afioga i le ali’i Fa’amasino ia Elvis P. Patea i le alii ua molia le mae’a lea ona iloillo e le Faamasinoga o faamatalaga uma sa tuuina atu e itu e lua e aofia ai faafinauga a Loia, faatasi ai ma lana faatoesega e tusa ai o lenei mataupu. Sa maua fo’i le avanoa o le Fa’amasinoga e toe vaavaai ai i tuutuuga o le maliliega sa sainia e le ua molia ma le malo i nai masina ua mavae, e tusa ai o le tulaga o le a faai’u i ai lenei mataupu. 

I le silafila a le Fa’amasinoga i faamaumauga ua i luma o le laulau, atoa ai ma le ripoti sa tuuina atu e le itu a le malo ma le Ofisa Faanofovaavaaia, o lo o atagia mai ai le avea o le ua molia o se tagatanu’u lelei e tausisi i tulafono a le malo i lona olaga atoa.

E le gata e leai sana solitulafono i faamaumauga a le Fa’amasinoga Faaitumalo, ae leai fo’i ni faamaumauga o ni ana solitulafono i le Fa’amasinoga maualuga.

O loo taua foi i le ripoti a le Ofisa Faanofovaavaaia, sa faigaluega i le tele o tausaga ao lei tula’i mai lenei faalavelave, ae i le aso na tula’i mai ai le faalavelave, na amata mai ai loa iina ona le toe faigaluega, ae ua nofo lava i le fale e tausi lana fanau, e aofia ai le pepe lea na fanau i le tuana’i ai o nai aso talu ona mae’a le faalavelave.

Na faailoa e Patea ia Ulu le taua tele o le galuega a le ifoga i le aganu’u a Samoa, ae sili ai le taua ma amanaia e le Fa’amasinoga, ona o nisi nei o itu e ono faamama ai se faasalaga e tuuina atu i le tagata ua ta’usala. Peita’i, e ui i itu lelei o le ifoga, ae le mafai ai lava ona aveesea lagona mafatia o le aiga ma le fanau talu ai le motusia o le mafutaga ma le latou Tama ua maliu ona o lana solitulafono.

Na faamanatu foi e Patea ia Ulu, o le solitulafono lea ua ta’usala ai o ia, e mafa ona faasala ai o ia i le Falepuipui mo le umi e oo atu i le 5 tausaga.

I le vaavaai ai o le Fa’amasinoga i tala e faatatau i lenei ali’i, ua manatu ai, e agava’a ona tuuina atu se faasalaga faanofovaavaaia ia te ia.

E 5 tausaga i le Toese na manatu le Fa’amasinoga e faasala ai le ua molia i le Toese i Tafuna, ua faamalumalu e le Fa’amasinoga le tuliina o lea faasalaga, ae o le a nofovaavaaia ai Ulu mo le 5 tausaga i lalo o tuutuuga e ao ona ia usita’i i ai.

O le a ia tuliina masina e 20 i le Toese i Tafuna e aunoa ma le toe tatalaina o ia i tua, sei vagana o se poloaiga ua tuuina atu e le Fa’amasinoga. O le a aofia ai i lea faasalaga aso e 10 na taofia ai o ia i le Toese faatoa tatala ai i tua ina ua ia totogiina le tupe sa faatonu o ia e le Fa’amasinoga e totogi.

O le aso Gafua lava na te’a nei na faatonuina ai loa e le Fa’amasinoga le susuga a Ulu e amata ai loa ona tuli lana faasalaga i le Toese i Tafuna.

O le afioga i le ali’i Fa’amasino ia Muasau T. Tofili na lagolago ia Patea i le iloiloina o se faaiuga o lenei mataupu.

E pei ona taua e le malo i le latou tagi e faapea, o le aoauli o le aso Lua, o le aso 2 lea o Fepuari 2021 na tula’i mai ai se faalavelave i se vaega o le alatele i Satala, ina ua feto’ai se Loli kiliva tane kesi ma se pasi la’u pasese o loo malaga atu ai ni tagata se to’a 4.

Na faanatinati atu le ave pasi atoa ai ma le pasese na manunu’a i le Falema’i mo togafitiga, peita’i na maliu le alii ave pasi talu ai le matuia o manu’a sa aafia ai lona tino. O le pasese na manunu’a ae na toe te’a i tua i o latou aiga.

I faamatalaga mai nisi o molimau sa latou molimauina le faalavelave, na latou taua ai i Leoleo le saoasaoa o le Loli kiliva kesi i le taimi na aga’i atu ai ma faafuase’i ona tifa i le itu o loo aga’i mai ai le pasi la’u pasese ma i’u ina feto’ai ai.

Na taunu’u Leoleo na latou molimauina ai le ua molia o loo tu i le isi itu o le alatele. Na taofia le alii ave taavale ma auina atu loa i le Ofisa o Leoleo mo suesuega.

Na taua e le ua molia, e lei atoatoa lona malosi i le amataga o le vaiaso, sa ia faalogoina fo’i le vaivai o lona tino, ma faafuase’i ai ona moe ma i’u ai loa ina tula’i mai le faalavelave.

O le afiafi o le aso lava lea na faailoa mai ai e le. Falema’i o le LBJ le maliu ai o le alii ave pasi, e mafua mai i manu’a na aafia ai lona tino.