Falepuipui ali’i to’alua na fesoasoani osofaia o ni faleoloa i le atunu’u

E ta’i 12 masina lea ua poloaina e le Fa’amasinoga Maualuga e taofia ai ni ali’i se to’alua i le falepuipui i Tafuna, ina ua fa’amaonia moliaga o le la fesoasoani lea i le fa’atinoina o le solitulafono a se isi tagata e pei ona tu’uaia ai i laua e le malo.

O le ali’i o Nassan Tupuola ma Aki Lee Jungblut, o i laua ia na tu’uaia e le malo i lo la fesoasoani lea i le ali’i o Daniel Taufua, i le taimi na osofa’i ai e Taufua ni isi o faleoloa i le itu i Sisifo o le atunu’u i le po ae ave fa’agaoi tupe ma meatotino mai totonu o ia faleoloa.

I lalo o maliliega na sainia e le malo ma i laua ua ta’usalaina nei, na tali ioe ai loa le ali’i o Tupuola i le moliaga mamafa e tasi o lona fesoasoani lea e ufiufi le solitulafono a le isi tagata, ae o Jungblut na ta’usala i moliaga mamafa e 2 o lona fesoasoani lea e ufiufi le solitulafono a se isi tagata.

I le ta’usalaina ai o Tupuola i le moliaga e pei ona ta’usala ai o ia e le fa’amasinoga, sa ia ta’utino ai e fa’apea, i le va o le masina o Tesema 2016 ma Fepuari 2017 i Amerika Samoa, sa ia aveina ai se ta’avale ma le fa’amoemoe e aveese mai ai Taufua ina ua mae’a ona osofa’i e Taufua se faleoloa ma ave faagaoi le masini tupe o loo i ai se tupe i totonu.

I le mataupu a Jungblut, sa ia ta’utino ai fo’i i luma o le fa’amasinoga, lona aveina o se ta’avale ina ia aveese mai ai Taufua, i le mae’a ai lea ona osofa’i e Taufua o ni faleoloa se 2 ae ave fa’agaoi masini tupe o loo i ai tupe i totonu, ina ia le mafai ai e le tagata e ana ia meatotino ona toe maua ana meatotino sa gaoia.

Na talosaga le la loia fautua ia Michael White ina ia fa’asala i laua i se fa’asalaga faanofovaavaaia, e aunoa ma le toe tuuina atu o se fa’asalaga fa’a falepuipui, peita’i na finau le loia a le malo ia Gerald Murphy ina ia fa’asala i laua i le fa’asalaga fa’a falepuipui pito sili ona mamafa o loo fa’atulaga mai e le tulafono, o le loka lea mo le umi e 5 tausaga.

A o le i tu’uina atu le fa’asalaga a le fa’amasinoga maualuga fa’asaga ia Tupuola ma Jungblut, na maua le avanoa e molimau ai nai o la Faletua, ma la talosagaina ai ni avanoa mo i laua e toe fo’i atu ai i tua e saili ni a laua galuega e tausi ai aiga ma fanau.

Na taua e le faletua a Tupuola i lana molimau e fa’apea, o lona to’alua o se Tama e lelei toe galue malosi mo le manuia o le aiga. Sa ia talosaga i le fa’amasinoga mo se avanoa e toe fo’i atu ai Tupuola i tua e saili se galuega e tausi ai le la fanau e to’alua, aemaise ai le fesoasoani i le tausiga o ona matua.

E faapena fo’i i le molimau a le faletua a Jungblut, e le gata sa ia molimau i le tele o galuega lelei ma le taua sa faia e Jungblut i totonu o le aiga, ae sa ia taua fo’i lona fa’ateia tele ina ua oo atu Leoleo i lo latou fale ma fesiligia lona to’alua e tusa ai o le fa’alavelave e pei ona a’afia ai o ia.

Na fa’atoese ma loimata le Tina i le fa’amasinoga ina ia fa’amagalo se sese a lona to’alua, atoa ai ma lona fa’atoese fo’i i aiga e ana faleoloa ua a’afia ona o le gaioiga a le ua molia. Na taua e le Tina e fa’apea, o aso uma la te asia ai ma lana tama e 3 tausaga lona to’alua i le falepuipui, sa ia molimauina ai suiga ia te ia, ae o se taimi faigata fo’i lea mo lana tama, ona e tagi i le fia nofo i lona Tama, aua e sili atu ona latalata o ia i lona Tama nai lo ia.

Na fa’ai’u le talosaga a le Tina i lona augani lea i le fa’amasinoga mo se avanoa e toe fo’i atu ai Jungblut i tua e saili sana galuega e tausi ai le la aiga, ma toe totogi ai tupe o loo nofo aitalafu ai o ia i pisinisi na a’afia.

E ta’i 5 tausaga i le falepuipui na manatu le fa’amasinoga e fa’asala ai Tupuola ma Jungblut, peita’i o le a fa’amalumalu lo la tuliina o lea fa’asalaga fa’a falepuipui, ae o le a faanofovaavaaia ai i laua mo le umi e 5 tausaga i lalo o tuutuuga e ao ona la usita’i i ai.

O ni isi o ia tuutuuga e aofia ai lo la tuliina o masina e ta’i 20 i le toese i Tafuna, peita’i o le a fa’amalumalu le 8 masina, ae tuli na o le 12 masina, e toese mai ai masina e 5 ua mae’a ona la tuliina.

O isi tuutuuga e aofia ai le aua lea ne’i o la toe solia se tulafono, aua ne’i o la toe tagofia le ‘ava malosi poo fualaau fa’asaina, aua fo’i nei o la toe taumafai e fa’afesootai le ali’i o Taufua i soo se auala.

E $1,000 le salatupe lea ua poloaina i laua e totogi, atoa ai ma le toe totogiina o tupe i faleoloa na a’afia i le la solitulafono. Mo Tupuola, e $800 le tupe lea ua poloaina o ia na te toe totogi i le faleoloa i Fogagogo, ae o Jungblut, e $180 na te toe totogi i se Fale Tamea i Iliili, ma le $130 i se faleoloa i Nu’uuli.

Afai e magalo mai i laua i tua mai le toese, o le a la fa’atinoina ni galuega mo atunu’u lautele mo le umi e 200 itula, ae o le taimi lava e maua ai a laua galuega, ona taofia loa lea o le la fa’atinoina o ia galuega, ae galulue loa i la galuega ua maua mo le totogiina o tupe ua poloaina i laua e le fa’amasinoga e totogi.

“Ia fa’aaoga tatau le avanoa lea ua tu’uina atu e le fa’amasinoga ia te oulua, o lea sa finau mai le malo ina ia fa’asala oulua i se fa’asalaga mamafa e 5 tausaga i le falepuipui, peita’i ua tu’u atu e le fa’amasinoga le avanoa ina ia toe aoaoina ai se isi lesona taua mo oulua, ma maua ai le avanoa e saili ai ni galuega e tausi ai o oulua aiga”, o le saunoaga lea a le ali’i fa’amasino ia Elvis P. Patea.

O afioga i ali’i fa’amasino lagolago ia Suapaia Pereira ma Satele Lilio Aliitai na lagolago ia Patea i le iloiloina o le fa’asalaga a i laua ua ta’usalaina nei i le vaiaso ua te’a.