Falema’i LBJ ma le Coronavirus

Ua toe o Amerika Samoa le vaipanoa o le Iunaite Setete lo’o saofaga mai pea i le COVID-19. Ae peit’ai ua nofo sauni le LBJ Medical Center le taimi nei, pe a tula’i mai le fa’ama’i i totonu o Amerika Samoa.

Fa’ailoa e le pulesili o le LBJ, Faumuina John Faumuina, “ua i ai tapenaga o lo ua fa’aauau pea ona galulue fa’avave lava i ai le pulega ina ia fa’ataoto mo le fa’amoemoe lea ina nei tupu mai.”

“I le taimi nei mae’a fa’aavanoa lelei le itu o le falemai ma le valu potu ua i ai e fa’amautu i ai nisi e faamaonia ua maua i le Coronavirus, ina ia togafitia ai ma malupuipuia mai le fesoota’i atu ma le mamalu lautele, e ese mai foma’i ma i latou o le a tofia fa’apitoa e tausia esea i latou nei,” o le saunoaga lea a Faumuina.

“Ua i ai ma le fale’ie ua saunia ai foi le isi 8 potu fa’apitoa. O le fale’ie lea ua fa’amautu i ai aiaiga uma e tautua ai gasegase.”

I le taimi nei ua galulue fa’atasi le US Army Corp of Engineers ma le Fa’atonu o Galuega a le tatou Malo ina ia suia le falema’i o e a’afia le mafaufau, ina ia fa’atula’i mai ai le isi 10 o isi moega mo gasegase lava o le Covid-19, e soloa’i mai i ai pe afai ua le toe avanoa moega ua tapena i le Covid-19 Ward ma le fale’ie fa’apitoa.

O le isi fuafuaga ua mae’a fa’ataoto, ia fa’asolo mai i le potu taofia o le fanauiti, Pediatric Ward, e mafai ona soloa’i fanau taofia i isi potu taofia o le Medical Ward ma le Surgical Ward, ae fa’aaoga le Pediatric Ward mo gasegase o le Coronavirus.

“O le afuaga lea ua fa’ailoa atu ai i le mamalu lautele, ina ia silafia lelei, po’o a lava tapenaga e faia e le tatou pulega a le LBJ, e le taitai ona lava pe afai o le a gasegase faatasi mai tagata e to’aselau o le atunuu. O le ala lea e tatau ai ona mua’i gafatia e tatou tagata ona iloa lelei tausia tulafono o le fa’asa ua tuuina atu fa’apoloa’iga e taualoa e tagata. A tatou masani loa ona faia, ua fa’afaigofie fo’i ona tatou fa’ataunuuina nei aiaiga uma, ia le soona pipisi lenei fa’ama’i i le atunuu, i le taimi lava e ulufale mai ai.”

“Ina ua oo mai i le taimi nei o le Corona, sa toe oka e i matou le isi 20 o masini ea e fa’amanava ai tagata gasegase i le Okesene, mai le 15 sa i ai lea ua atoa nei le 35. Peita’i e na’i le 10 ua mae’a to’ai taunuu mai, a’o le isi 10 o loo fa’atalitalia le mae’a ona gaosia o nei masini, aua ua le na’o i tatou o lo ua tapena atu ma oka nei masini, ua fa’apena fo’i i isi falemai uma i Amerika. O le oka lea e fa’ato’a maua mai i le 10-15 vaiaso talu ona oka,” o se tala lea a Faumuina.

Sa ia fa’ailoa foi e le’i le’i taitai ona lava foma’i ma i latou e faigaluega fa’apitia i togafitiga ma le tausiga lelei o gasegase i le tatou falema’i, pe afai ae lutia i tatou i le Coronavirus. “O lo’o mana’omia nei tagata faigaluega i so’o se setete ma atunuu o le lalolagi atoa. E le lava pea i latou ia, ma o se mea faigata ona fa’afaigaluega mai nisi foma’i mai fafo i le taimi nei.”

O sona toe manatu, “E le taitai lava ona lava ma totoe se fa’asoa a le falema’i, aua e to’atele na’ua le mamalu o le atunuu e mana’omia ona faia talavai i aso ta’itasi, ese mai lea o i latou e aga’i mai mo togafitiga, ae maise o le mamalu lautele o lo’o fa’asolo i taotoga ua leva ona fa’avasega mai. O nei mea uma e o fa’atasi uma lava.”

Ua fa’ailoa mai foi e le vaega o taotoga o ponaivi, ua taofia mai lava i le taimi na amata ai le fa’asa le faia o taotoga seia oo fo’i i lenei masina pe mata e fa’aauau pe leai. E ao ina fa’asaoina mea uma ina ne’i a’afia le atunuu ae o lo’o lava le sapalai o vaimoe ma isi mea uma e fa’aaoga i le potu tipi mo taotoga.