Faila moliaga fa’asaga i le isi Leoleo o le Toese i Tafuna

O le vaiaso na te’a nei na faila ai e le malo le latou tagi fa’asaga i le isi Leoleo o le Toese i Tafuna, e mafua mai lava i le mataupu lea o lo o tu’uaia ai se ali’i pagota i lona sola i tua mai le toese ma fana se ali’i i Leone i le vaveao o le aso 12 o Aokuso o le tausaga nei.

O le aso Faraile na te’a nei na tula’i ai i luma o le Fa’amasinoga Fa’aitumalo le tama’ita’i Leoleo ia Viopapa Vitolio.

O loo tu’uaia o ia e le malo i moliaga e 2 e aofia ai le taumafai e fa’aleaga mau fa’amaonia a le malo, fa’apea ai ma le le fa’amaoni i le fa’atinoina o ona tiute. O le afioga i le ali’i fa’amasino ia Fiti Sunia sa taulimaina le mataupu a le ua molia.

O le ali’i loia tua ia Thomas Jones mai le Ofisa Loia a le RDA Law Firm o loo tula’i mo Vitolio, ae o le ali’i loia sili lagolago ia Woodrow Pengelly o loo tula’i mo le itu a le malo i lenei mataupu.

E $5,000 le vaega tupe na fa’atulaga e le fa’amasinoga e totogi ona fa’atoa mafai lea ona tatala Vitolio i tua mai le toese, e fa’atalitali ai taualumaga o lana mataupu, ae i le taimi o lana ulua’i iloiloga i le aso Faraile o le vaiaso na te’a nei, na talia ai loa e le Fa’amasinoga le fa’afinauga a loia ina ia fa’aitiitia le tupe taofia i le $2,000.

Na finau le ali’i loia o Jones i le fa’amasinoga mo se avanoa e fa’aitiitia ai le tupe e tatala ai i tua Vitolio, lea fo’i na lagolagoina e le loia a le malo. Na fa’amanatu e le loia a le malo i le fa’amasinoga e fa’apea, o isi Leoleo e to’alua lea fo’i o lo o molia fa’atasi ma Vitolio i lenei mataupu, e $5,000 na fa’atulaga e tatala ai i tua, peita’i ua toe suia e le fa’amasinoga i le $2,000.

Saunoa Sunia e fa’apea, e ui e eseese uma lava auala o lo o tu’uaia ai e le malo ia Leoleo e to’alua na muamua mai ia Vitolio, ae o le a talia le talosaga ina ia fa’aitiitia le tupe e tatala ai i tua le ua molia i le $2,000.

Afai ae totogi e Vitolio le tupe e tatala ai o ia i tua, ua fautuaina o ia ina ia aua ne’i ona toe solia se tulafono a le malo, a ia auai i soo se taimi e faia ai ana iloiloga ma ia fesootai vavalalata ma lana loia. Ua fa’asa ona ia taumafai e tuua le atunuu, fa’asa ona ia taumafai e fa’afesoota’i molimau a le malo, ma ia tuuina atu lona tusi folau e taofi e le loia a le malo, se’i toe tu’u atu ia te ia pe a mae’a taualumaga o lana mataupu.

TAGI A LE MALO

O le mataupu fa’asaga ia Vitolio na alia’e mai ina ua logo e le ali’i Leoleo Lutena ia Kolia Solaita le Leoleo o loo autu i ai le suesueina o lenei mataupu ia Det. Justin Thomsen, ma faailoa i ai se fa’alavelave na tula’i mai i Leone i le vaveao o le aso 12 o Aokuso, 2018 i le itula e 3:00, lea na manu’a ai se ali’i i ni pulufana.

I lea talanoaga, na fa’ailoa i ai e Solaita ia Thomsen, o le ali’i pagota ia Manu Lefatia o loo taua lona igoa, o ia lea sa faapaina le fana na manu’a ai le ali’i o Sopi.

Ina ua aga’i atu Leoleo e fa’agasolo le latou suesuega, na alia’e ai i ripoti mai se tasi o Leoleo o le toese, i se taumafaiga a le Taitai Uati sa tiute i le taimi o lo o tu’uaia na sola ese ai le ali’i pagota, ina ia galulue fa’atasi uma sui o le sifi e ufiufi le sola a le ali’i pagota i tua, ma ia tumau pea i latou i le latou fa’amatalaga e tasi.

E le gata i lea, sa masalomia fo’i e Leoleo le i ai o ni suiga i fa’amaumauga a le Toese e fa’ailoa mai ai taimi sa fa’atinoina ai le siakiina atoa ai ma le faitauina o pagota i totonu o a latou sela.

Na maua le avanoa e fesiligia ai e Leoleo sa suesueina lenei mataupu, ia leoleo e to’a 5 o le toese i Tafuna sa galulue i le sifi lea na tula’i mai ai le fa’alavelave e pei ona sola ai i tua le ali’i pagota o Lefatia.

O i latou nei e aofia ai le Ta’ita’i Uati ia Mosese Lomu, o le ali’i leoleo ia Toloa Koowaiyou, o Junior Kuka, o Carter Soliai, ma le tama’ita’i Leoleo ua molia nei ia Vitolio.

O Vitolio, o ia lea sa gafa ma le faia o fa’amaumauga i gaioiga uma e fa’atinoina i totonu o le toese, atoa ai ma fa’atonuga e tuuina atu e le Ta’ita’i Uati ia Lomu.

Na manino i molimau a ni isi o Leoleo, na gata lava le faitauina atoa ai ma le siakiina o pagota i le itula e 11:00 i le po o le aso 11 o Aokuso. Na fa’atoa toe faia lava le isi siaki ina ua logoina mai e le Ttaitai Leoleo ia Foifua ia le Toese i Tafuna i le itula e 3:30 i le vaveao o le aso 12 o Aokuso, e o ni Leoleo e siaki le potu o loo loka ai Lefatia poo i ai, ona o Lefatia lea o loo taua sa vaaia i Leone i le fa’alavelave e pei ona manu’a ai se ali’i i le 30 minute talu ai.

Na siaki e Leoleo suesue le api o lo o i ai fa’amaumauga i gaioiga sa fa’atinoina i le taimi o le sifi na tula’i mai ai le fa’alavelave, ma manino ai, ua i ai suiga ua faia i totonu o le api. ina ia atagia mai ai, sa faia le isi faitauga o pagota i le va o le itula e 11:00 i le po o le aso 11 o Aokuso, ma le itula e 3:00 i le vaveao o le aso 12 o Aokuso, e ui o loo masalomia e le moni ia fa’amaumauga.

A o tau fai galulue uma ai Leoleo e tau saili ni fa’amatalaga e fa’atatau i lenei mataupu, na fa’ailoa ai e se ali’i Leoleo e galue i le falepuipui ia Carter Soliai i le ali’i Lutena ia Solaita e fa’apea, e i ai le gaioiga sa faia e Leoleo i le toese, o le taumafai lea e ufiufi le fa’alavelave e pei ona sola ai i tua Lefatia.

Na faailoa e le ali’i Leoleo ia Soliai e fa’apea, ina ua aga’i atu Leoleo o le toese e siaki le sela o loo loka ai Lefatia i le itula e 3:30, sa latou iloa ai e le o i ai Lefatia i totonu o lona sola. I ni nai minute mulimuli ane sa maua ai Lefatia i totonu o le sela a le isi ali’i pagota e igoa ia Isumu.

O le fa’amatalaga a le ali’i Leoleo ia Soliai lea na mafua ai loa ona aga’i atu Leoleo ma amata loa le galuega o le fesiligia ta’ito’atasi lea o Leoleo o le falepuipui, e aofia ai leoleo e to’atolu ua molia nei e pei o Vitolio, Lomu ma Koowaiyou.

I faamatalaga na maua i suesuega a Leoleo, e lei i ai Lefatia i totonu o lona potu i le taimi na siaki ai e Leoleo, peita’i na fa’atonu e Koonwaiyou ia Leoleo sa galulue i le sifi i le taimi o le fa’alavelave e tausisi i le latou fa’amatalaga e tasi, o Lefatia sa i ai i totonu o le sela i le taimi na siaki ai.

E le gata i lea, taua fo’i e isi leoleo o le toese le fa’atonu lea e Lomu o Vitolio ina ia latou faia se suiga i fa’amaumauga ina ia mafai ai ona o tutusa a latou fa’amatalaga ma fa’amaumauga o loo i totonu o le api.