Faila le tagi a le malo fa’asaga ia Fiu Johnny Saelua

I le mae’a ai o se taimi umi o fa’agasolo pea su’esu’ega a le malo fa’asaga i le mataupu tau solitulafono o lo o tu’uaia ai le Ta’ita’i o le Ofisa o le Kovana, le tofa a Fiu Johnny Saelua, o le vaiaso nei lea na faila ai loa e le Loia Tuto’atasi le tagi a le malo fa’asaga i lenei mataupu.

O le ali’i loia tua ia David Vargas lea na tofia e le Fa’amasinoga Maualuga i le tausaga na te’a nei e fai ma Loia Tuto’atasi na te su’esu’eina lenei mataupu, o ia lea na failaina le tagi fa’asaga ia Fiu i le Fa’amasinoga Fa’aitumalo i le aoauli o le aso Gafua o le vaiaso nei.

Na taua e se molimau i le Samoa News e fa’apea, o le mae’a ai ona faila o le tagi fa’asaga ia Fiu, na sosoo atu ai lava ma le fa’ataunu’uina o le ulua’i iloiloga a Fiu i luma o le afioga i le ali’i Fa’amasino ia Fiti Sunia, pe tusa o le itula e 3:00 i le aoauli.

O Vargas na tula’i mo le malo i le taimi o le iloiloga, ae o le ali’i loia tua ia Marcellus T. Uiagalelei na tula’i mo Fiu.

E talitonu le Samoa News o lo o molia Fiu i moliaga e 2, lea e aofia ai le moliaga mamafa o le tagofia o itutinosa o se tama’ita’i e le fa’aipoipo i ai i le tulaga muamua, atoa ai ma le moliaga mama o le tagofia o itutinosa o se tama’ita’i e le fa’aipoipo i ai i le tulaga lua.

Talu ai e lei fa’atulagaina le ulua’i iloiloga a Fiu i luga o le kalena a le Faamasinoga mo ana galuega fa’atasi, o le mafua’aga lena e lei mafai ai e sui o le au Fa’asalalau e aofia ai ma le Samoa News, atoa ai ma tagata lautele ona maua le avanoa e fa’afofoga ai i taualumaga o lenei mataupu, pe maua fo’i se kopi o le tagi tusitusia a le malo.

E le i finagalo le ali’i loia ia Vargas e tali mai i fesili a le Samoa News e uiga i lenei mataupu. Sa ia taua i se talanoaga i luga o le telefoni le leai o sona iloa e fa’atatau i le mataupu a Fiu, ae sili pe a fesili le Samoa News i se tagata o lo o malamalama lelei e fa’atatau i le mataupu.

Ina ua toe fesiligia o ia e le Samoa News, pe le o ia lea na tofia e le Fa’amasinoga e avea ma Loia Tuto’atasi e su’esu’eina lenei mataupu, na toe tali Vargas e fa’apea, “E le mafai ona ou talanoa e fa’atatau i le mataupu. Ua e silafia lava ta’iala e fa’atino ai la’u galuega.”

Na taua e se molimau i le Samoa News, o le itula e 3:00 i le afiafi ananafi na toe fa’atulaga ai le isi iloiloga a Fiu.

E le o manino mai lava i le taimi nei le mafua’aga na ala ai ona fa’ataunu’u le iloiloga a Fiu i le aoauli o le aso Gafua, ae le masani ai le fa’amasinoga ona fa’ataunu’u ni ulua’i iloiloga i taimi faapea.

E pei ona masani ai le fa’amasinoga i ana galuega fa’atino, soo se tagi lava a le malo e faila ae ua mae’a taualumaga a le fa’amasinoga i aso ta’itasi, fa’atoa fa’ataunu’u le ulua’i iloiloga o lea mataupu i le taeao e sosoo ai.

TU’UAIGA FA’ASAGA IA FIU

O tu’uaiga fa’asaga ia Fiu e fa’atatau i le faia o ni uiga mataga fa’afeusiaiga, na alia’e mai i se taimi o le tausaga e 2016, ina ua faila e se fafine sa nofo i le aiga o Fiu talu ona fanau mai o ia sana tagi fa’asaga ia te ia.

O le tagi na afua mai ina ua taumafai se ali’i Ofisa o Femalagaaiga e aveese fa’amalosi le fafine ma lona toalua i le va’a o le Lady Naomi.

Ae o se ali’i Ofisa o Femalagaaiga sa tiute i le siakiina o pepa malaga a le pasese a le Lady Naomi i le aso lea, na ia molimauina, o le fafine o le a toe fa’afo’i fa’amalosi na fanau i Amerika Samoa. Na fa’afesootai e le ali’i Ofisa lea ia le faletua ia Ipu Lefiti, o le Ta’ita’i o le Ofisa e Puipuia Sau’aga fa’asaga i Fafine ma Fanau, ma le taunu’u ai loa le taumafaiga e fa’afo’i le fafine ma lona to’alua i Samoa.

E tele masina o taoto pea i le Ofisa o Leoleo le su’esu’eina o lenei mataupu e aunoa ma se galuega e faia i ai.

O le tausaga na te’a nei na tofia ai loa e le Fa’amasinoga Maualuga le susuga i le ali’i loia tua ia Vargas na te suesueina lenei mataupu.

O le isi mataupu e pei ona atele i ai fesili ma talanoaga a le atunu’u, o le mataupu fa’asaga i le ta’avale na aumai i lalo o le suafa o le Fofoga Fetalai, tofa Savali Talavou Ale, lea o lo o tu’uaia na mau i ai fualaau fa’asaina.