Faigata ona saili se kamupani e fa’atautaia femalagaaiga mo Manu’a

E ui e to’atele latou te lagolagoina le tatau lea ona taoto atu i se kamupani tua le fa’atautaiga o tulaga tau femalagaaiga mo Manu’a, peita’i o le fa’afitauli numera tasi o lo o i ai, o le faigata lea ona saili o se kamupani tua latou te fa’atautaia lea tulaga, e ui o se tulaga lea na taua e le sui fa’atonusili o le Pulega o Uafu ma Taulaga, “o se tulaga lelei ma taua”.

I le iloiloga sa valaauina e le komiti o Fela’uaiga a le maota o sui i le vaiaso na te’a nei, e fesiligia ai le mafua’aga ua ala ai ona tuai le aso e taunu’u ai le va’a fou mo Manu’a, lea sa faamoemoe e taunu’u mai i le fa’aiuga o le masina fou, peita’i o lea ua toe tolo atu i tua i le aso 12 Novema 2016.

I le fa’aiuga o le iloiloga, na fesiligia ai loa e le afioga i le ali’i faipule ia Puleleiite Li’amatua Tufele Jr le susuga ia Moefa’auo Bill Emmsley ma Christopher King, pe late lagolagoina le fautuaga sa tu’uina mai e le Pulesili o le Ofisa o le Puleaga a le Eletise ma le Suavai ia Utu Abe Malae, e tatau ai ona tu’u atu le va’a o le malo e pulea ma fa’atautaia e se kamupani tua. Ae saunoa le susuga a King e fa’apea, i le va o le tausaga e 2014 ma le 2015, sa toe asia ai e le latou ofisa le mataupu taua lenei, ma taoto ai loa la latou tautua i le tatau lea ona fa’atinoina loa lea fa’amoemoe.

“O le fa’afitauli tu tasi lava ua mafua ai ona fa’aauau pea ona taulima e le Ofisa o Uafu ma Malaeva’alele le fa’atautaia o femalagaaiga mo Manu’a, ona e le o i ai lava se kamupani tua o fa’ailoa mai so latou lagolagoina o lenei fa’amoemoe”, o le saunoaga lea a King.

Ina ua taumafai le Pulega o Uafu ma Malaeva’alele e tu’u atu i se kamupani tua le faatautaiga o le va’a a le malo, sa finagalo ai le Ofisa, o ai lava le kamupani tua e ofo mai latou te fa’atinoina lea tulaga, o le a le toe popole i latou i le fa’atinoina o galuega mo le fa’aleleia o vaega o le va’a, o le matafaioi lena a le Ofisa, pau le galuega a le kamupani e fai, ia mautinoa o lo o tausisia ta’iala e manana’o i ai le Ofisa o le Coast Guard.

“E ui e le o i ai lava se kamupani ua ofo mai latou te fa’atinoina lea auaunaga, ae i ai le taimi o i luma e maua lava se kamupani e mafai ona latou fa’afoeina le puleaina o le va’a.”

Na taua e le pulesili o le Ofisa Tosova’a a le malo i Satala ia Moefa’auo e faapea, o le lagona lava fo’i lea o lona Ofisa i le taimi nei, ia tu’u atu le va’a e fa’atautaia e se isi kamupani tua, ina ia fa’a faigofie ai ona fa’atino le galuega, ma taofia ai le fa’aee atu o le tele o le mau galuega e fa’atino e le malo.

Saunoa atili Moefa’auo e fa’apea, o lona talitonuga o lo o i ai, e ono maualuga le totogi o uta e tu’u atu e le kamupani tua lea i le atunu’u, ona o lo o naunau fo’i i latou e maua sa latou tupe faasili, ae o le itu taua, o le a mafai ai ona foia le fa’afitauli ua tele tausaga o fetaia’i pea ma le itumalo, o le fa’aletonu lea o auala o femalagaaiga mo le itumalo.