Faia suiga a le Maota o le Senate i le i’ugafono mo se tupe faaopoopo e $22 miliona

Pago Pago - AMERIKA SAMOA

Sa faafaigata ona taofia le maligi o loimata a le afioga i le Senatoa ia Utu Sila Poasa, a’o ia finauina le ta’atia o le $15.9 miliona lea e aofia i totonu o le pili o tupe faaopoopo e $22 miliona, a le Kovana, seia toe soalaupuleina pe a toe amataina tauaofiaga a le fono faitulafono i le tausaga fou.

O le $22 miliona lea, o lo o ta’ua e le faigamalo, o tupe na totoe mai i le tausaga tupe e 2022, sa faauluina mai, e faaopoopo i le tala o le tupe a le malo mo le tausaga tupe 2024.

Na fa’amaualalo le afioga i le Senatoa ona o le agaga loto vaivai, ae ua ia lagonaina lava le taua o lenei mataupu ma o se tupe tele le $15.9 miliona, ma i sona talitonuga, e tatau ona o latou agai i luma ma le faaeteete.  Na saunoa foi Utu, e tele lava le taimi e mafai ona o latou iloiloina ai le aua sili ona lelei e mafai ona fa’aaoga iai nei tupe, aua se lelei mot agata o le atunu’u.  I sona talitonuga, o se taimi lelei lea ua tuuina mai e le Atua e toe to manatu ai, i le auala e taitai iai le malo.

O le manatu fa’aalia a le afioga i le Senatoa, na faia i le iloiloga aufaatasi a le Komiti o le Koneferenisi a le fono faitulafono, i le taeao o le aso Tofi, i totonu o le Maota o le Senate.

O le afioga i le Faipule ia Vailoata Amituanai o lo o fa’afoeina lenei komiti, ae lagolago iai le afioga i le sui Fofoga Fetalai ia Fetui Fetu.  O totino o le komiti e aofia ai le afioga i le Faipule ia Manumaua Wayne Wilson, afioga i Senatoa ia Utu Sila Poasa, Malaepule Saite Moliga ma Satele Aliitai Lili’o.

O vaega autu sa le mafai ona ‘autaasi iai maota e lua, o le fa’aaogaina lea o le $15.9 miliona lea o lo o fa’aagaga mo Polokalama Faapitoa a le Ofisa o le Kovana.

Na ave’esea e le Senate ia le $15.9 miliona mai i le pili, ina ia toe iloiloina, ae peitai, na toe tu’u iai i totonu e le Maota o Sui, ae suia nisi vaega o le paketi e pei ona faaulu mai e le faigamalo.

Sa saunoa le afioga i le Senatoa ia Malaepule, na te’ena e le Senate suiga na faia e le Maota o Faipule ma ia fautuaina le pasiaina suiga na faia e le Senate i le pili.  Ma ia saunoa ai e faapea, ana le u’unaia e le Senate se auiliiliga o galuega e faatupeina i le $15.9 miliona, semanu e le maua mai lea ripoti mai i le faigamalo, ma le mafai ai ona faia suiga ua iai nei.

Na saunoa Utu, afai e latou te pasiaina le pili i lea taeao, e o’o atu i le taimi e toe tauaofia ai le fono faitulafo i le tausaga fou, ua le toe iai se tupe.  O lea, ua iai sona manatu, e sili ona fa’ata’atia ese mai le $15.9 miliona.

Ae peitai, na finagalo afioga i Faipule ia Vailoata, Manumaua faapea ma le sui Fofoga Fetalai, mo se avanoa e mafai ona faamanino ai a latou suiga na faia i lenei pili.  Ae peitai, sa mautu le mau a afioga Senatoa ina ia toe talanoaina lenei mataupu i le tausaga fou.

O lenei mataupu sa talanoaina i tauaofiaga masani a le Senate, lea na fautuaina ai e le afioga i le Peresetene o le Senate, ia Tuaolo Manaia Fruean, le faia o a latou lava suiga.

Na toe fa’aalia e le afioga Utu i le iloiloga a le Komiti faapitoa e faapea, lona naunautaiga ina ia aua le vavevave, ae ia toe ta’atia lenei mataupu se’i faaolatia mai i le tausaga fou.

Sa saunoa Utu, o lo o nofo malamalama uma totino o le komiti lona so’otaga i le kovana, ae i sona talitonuga faamaoni, o le taimi lenei ua tuuina mai e le Atua e toe Iloilo ai se faaiuga tonu aua le lelei o tagata uma.

Sa ia saunoa foi i le faamuamua o le Atunu’u.

Ae peitai i le finau mai a le afioga ia Tuaolo, na ia saunoa ai e faapea, o le taimi lelei lenei e fai ai a latou suiga, aua o lea ua tu’uina mai e le kovana le avanoa e faaulu ai o latou manatu i le fa’aaogaina o nei tupe.

I le faaiuga o lenei iloiloga, sa faapea loa ona palota ai le Senate e pasia le tupe fa’aagaga mo Polokalama Faapitoa, ae na faaopoopo iai ma ni a latou suiga:

$1.5 miliona e lomia ai le tusi tulafono a Amerika Samoa

$1 miliona mo le ‘drainage’ a Fagaima

$1.5 e faatau ai meafale mo le fale fou a le Maota Fono.

O suiga nei e faatupeina mai i le $2 miliona mo le Paka a le FAA ma le $3 miliona mai i Ala o Sulufaiga i taimi o faalavelave faafuasei, i Manu’a.

Ua toe o’o atu nei le pili i le Maota o Sui mo sa latou iloiloga, ae afai e le mafai ona maua se tasi i lenei pili, ona toe fo’i foi lea i le Komiti e toe soalaupuleina ai.

ILOILOGA A LE SSIC

I le faaiuga o tauaofiaga a le Maota Fono i le taeao lava o le Aso Tofi, na faataunuuina ai se iloiloga a le Komiti Suesue Faapitoa a sui faitulafono (SSIC), e faatatau lava i le vaa o le Kiterunner lea na malaga i Samoa ma toe fo’i mai e aunoa ma ni kilia mai i Samoa ma Pago Pago.

 O le molimau muamua na valaau, o le taitai sikulaki o Uafu, le susuga Chester Manaea.

Ina ua talosagaina e le afioga i le Senatoa ia Togiola T.A. Tulafono, ia le susuga Manaea ina ia fa’ailoa mai lona tagata, na agai atu le faletua ia Deanna Fuimaono, le loia a le SSIC ma fa’ailoa atu ia Togiola, o lo o iai pea sui o vaega fa’asalalau i totonu o le Maota ona o lea sa auai i tauaofiaga masani a le Maota Fono.

O lea na talosagaina ai e Togiola ia sui o vaega fa’asalalau ina ia tu’umuli atu ona e tapunia iloiloga a le SSIC i tagata lautele.