Faia se iloiloga a le Komiti o le Soifua Maloloina a le Senate i le maualuga o le fuainumera o tagata maliliu i le LBJ

Pago Pago - AMERIKA SAMOA

Na avea le fesiligia e le Taitai Komiti o le Soifua Maloloina a le Senate, le afioga Senatoa Tuiasina Dr. Salamo Laumoli, o le afioga Senatoa Satele Aliitai Lili’o, ma valaauina le suafa o Satele, i lana (Satele) i le maualuga o le fuainumera o tagata maliliu i le falemai, e le gata i tagata matutua ae faapea fanau, ina ia aua ne’i aofia i le iloiloga i le taeao ananafi, sa faapea ai ona ia solia tulafono o le maota o le Senate.

O le taeao o lea so Gafua, na fa’aleoina ai e le afioga Satele sona atugaluga e tusa ai ma le maualuga o le fuainumera o tagata maliliu mai i le LBJ, e aofia ai ma nisi na taofia ae na maliliu ina ua te’a mai i tua.

Sa saunoa le afioga i le Senatoa mai i le itumalo a le Vaifanua e faapea, e na te le o iloa po o su’esu’eina e le falemai le mafuaaga o nei maliu, ae o se tulaga e ao ona taga’i iai le Senate.

I tauaofiaga masani a le Senate i le aso Lulu na se’i mavae atu nei, sa valaau ai e Tuiasina le suafa o Satele ma talosagaina le le talanoaina o lenei mataupu, ae o le a auai atu taitai mai i le LBJ i le aso ananafi, ma fa’amaumauga o le fuainumera o maliu ua faamaumauina i le falemai, talu mai le 2021, ona mafai lea ona ia tagataga’i iai. 

I le taofi a le afioga Tuiasina, o se tasi ua loa na avea ma foma’i, “e foliga mai o le falemai o le fale oti.  Ou te tautala ai ma le faaeteete ma le ava tele, e lagona e manumanu le tava’e i ona fulu, e tasi a le tatou falemai ma le igoa o le tatou malo.  Afai ae talanoaina le mataupu lea i se iloiloga a le Senate, e pei ua foliga o se mea ua mo’i.  Ae le mo’i, ona popole ai la lea, ona tele lea o le afaina.”

Sa saunoa foi Tuiasina, e tutusa uma lava falemai.  E iai maliu, e toatele foi tagata e manuia ma malaga i o latou aiga.  Ma e ui ina e le faasalalauina atu, ae toatele atu gasegase e faamanuiaina pe a mae’a a latou talavai i le falemai.

Sa avea le folasaga a Tuiasina ma tulaga sa le’i nofo lelei i le finagalo a le afioga i le Senatoa Togiola T.A. Tulafono ma ia talosagaina ai le peresetene o le Senate ma le Taitaifono o le Komiti o Tulafono a le Senate, ina ia toe fautuaina le afioga Senatoa Tuiasina e tusa ai ma tulafono o le maota maualuga.

Na saunoa Togiola, “Sa tatau ona fautuaina le afioga i le Sentoa mai i le Tualatai, i a tatou tulafono tumau.  A o’o ina tautalagia a tatou mataupu faapea, e sa ona e ta’u le suafa o le Senatoa.  E te saunoa i le Afioga i le Alii Senatoa, mai i le itumalo e sau ai.  Ae le ta’ua o tatou suafa i totonu o le talanoaga o mataupu”.  

Na saunoa foi Togiola, “E tatau ona faamalosia tulaga o a tatou tulafono, e le mafai ai ona tupu o le mea lea.  E le fa’aaloalo i le tatou va tapuia, o Senatoa i le Senatoa, o lona itumalo.  Lea na alai ona fai a tatou tulafono tumau”.

O le lona lua o tulaga sa fa’aalia ai le le fiafia o le afioga Togiola, o le “Taumafai o le Senatoa e faatonu le Senatoa mai i le Vaifanua, i ana saunoaga”.  

Sa fa’aalia e Togiola e faapea, “E saunoa tu’u saoloto le Senatoa mai lona nofoa, i soo se faafinauga i totonu o le maota.  O le a lava le tulaga e o’o iai, o le tulaga lena o le tatou galuega.  A faitio le senatoa i mea e o’o iai lona silafia ona o le faia o lana galuega, mai i lona nofoa i lona itumalo, saunoa saoloto”.

Na fa’aalia le ‘auai o le finagalo o le peresetene o le Senate, i le manatu fa’aalia a Togiola ma ia saunoa mai ai e faapea, “E toe faamanatu atu i afioga Senatoa, e le faatonuina e leisi Senatoa leisi Senatoa.  O la e faitau mai tagata, ae aua nei toe tupu nei mea.”

Na toe tula’i le afioga Satele ma fa’aleoina lona agaga faafetai i le afioga Togiola, mo le toe faamanatuina mai o tulafono a le Senate e latou te mulimulita’i ai i le faatinoga o latou tiute faapea le va feagai ai ma afioga Senatoa.

Sa faamanino foi e Satele e faapea, “O faamaumauga ia e tatalaina i le mamalu lautele (public information), ae o data ia e faailoa mai ai foi, ma o atugaluga ia a le tatou atunuu.  A o’o mai foi iinei, e le o se fesiligia foi o le tomai foi ua iai ia susuga i fomai ma e o loo galulue i le maota o le atunuu.”

O le afioga i le Taitaifono o le Komiti o Tulafono a le Senate ia Magalei Logovii sa ia faailoa mai foi, o afioga Senatoa ua filifilia e avea ma Taitaifono o Komiti eseese, e le tatau ia i latou ona tula’i mo matagaluega po o ofisa o lo’o latou va’ava’aia.

Sa saunoa Magalei, a talosagaina e senatoa ia faamaumauga i so’o se mataupu mai so’o se ofisa po o matagaluega a le malo, e le tu le taitaifono i le ofisa.

O le iloiloga lea sa faataunuuina i le aso ananafi, sa taloina e le Taitaifono o le Komiti o le Soifua Maloloina, le afioga Tuiasina Laumoli, i le aso Gafua, e iloiloina ai le mataupu lata mai nei, lea na lokaina ai se sikulaki (security guard) a le falemai, ina ua alu atu e piki sana atigipusa mai i le falemeli, ae maua ai vaega o fualaau faasaina, o le Aisa.

Sa saunoa Tuiasina, ua faateteleina lenei faafitauli.

Ma na fautuaina e le peresetene o le Senate ia le taitaifono o le komiti, ina ia latou su’esu’eina auiliili foi ia le paketi a le falemai, lea e aofia ai ni ‘pharmacists’ se to’alima.

Na fa’aalia e le afioga Tuaolo, o le totogi a le ‘head pharmacist’, e $179,000 ae o le aufaigaluega, e ta’i $150,000.  Ae i sana suesuega mai i le ‘Centers for Medicare and Medicaid Services, CMS’, o tagata faigaluega i potu talavai, e totogi i le $110,000 - $120,000.

Sa saunoa le peresetene o le Senate, ua sili atu le totogi o le aufaigaluega a le potu talavai nai lo foma’i.  Ma na ia ta’ua e faapea, o mataupu nei e tatau i le Taitaifono o le Komiti ona fesiligia i le taimi e iloiloina ai le paketi a le falemai. 

E tusa ai ma faamaumauga o le paketi na fa’ao’oina mai e le Kovana i le Maota Fono, o le paketi mo le falemai mo le tausaga tupe 2025, e $85.6 miliona.  Ae peitai, o le paketi fuafuaina lea sa faaoo mai e le falemai i se vaitaimi lata mai, na o’o i le $130.9 miliona.