Faia pea galuega a le Ofisa o Femalagaiga; to’aitiiti tagata faigaluega

“E le o fa’atamala le Ofisa” i o latou tiute, o le saunoga lea a le sui taitai o le Ofisa o Femalagaiga (Immigration) ia Fagamalama Fualaau i luma o afioga i senetoa i le vaiaso ua te’a i se tasi o iloiloga a le Maota Maualuga.

O lea iloiloga sa mafua ona o se talosaga i le lua vaiaso talu ai a le afioga i le Senetoa, ia Tuaolo Manaia Fruean, e fesiligia ai lea Ofisa o le malo, i le tulaga o a latou galuega ona o tagata mai fafo ua ova aso i le atunu’u - overstayer - ae fa’atoa maua i le taimi e tulai ai i latou nei i luma o le fa’amasinoga ina ua tuuaia i solitulafono.

Saunoa le afioga i le senetoa ma fa’ailoa le tele o tagata “overstayer” o lo’o maua e le fa’amasinoga, ma lipotia e le nusipepa.

O molimau a le malo i le iloiloga a le Komiti o Fa’amasinoga a le Maota Maualuga e aofia ai le taina ia Fualaau, Loia Sili ia Talauega Eleasalo Ale, ma le ta’ita’i fono o le Komiti Fa’afoe a le Immigration ia Fanene Edda Wyberski.

Ina ua maua lona avanoa sa fa’ailoa ai e Talauega i le komiti e fa’apea, “i la’u vaai i galuega a le Immigration, masalo e toatele atu tagata ia e maua e le Immigration ua ova-stay ma toe fa’afoi, i lo’o tala ia e sau i luga o le nusipepa”.

O tagata mai fafo ua fa’afoi e le Immigration “e le o sau i le nusipepa, aua o le tele lava o taimi e le o iloa e le tatou atunu’u galuega fita lea o lo’o fa’afeagai” ma le Immigration Ofisa ma le Komiti Fa’afoe a le Immigration, o se isi saunoaga lea a Talauega.

“Ae ui lava i le fita ma le faigata o galuega [a le immigration] e le taitai ona lava tagata o lo’o fa’atinoina. Lona uiga, e i ai taimi ‘e se ai le atu i le ama’, ia ona sau loa laia i luga o le nusipepa, fa’apea a le tatou atunu’u ‘o lea e leaga uma lava le mea’,” o a Talauega lea.

Ae “o le upu moni ma le fa’amaoni, i le vaai i gaoioiga a le Ofisa ma tagata o lo’o va’avaia le tulaga o le Immigration, tele lava o galuega o lo’o fa’atinoina, e ui lava e leai se ova taimi,” o se isi lea tala a le Loia Sili i luma o le komiti.

I le saunoaga a Fualaau, sa ia fa’ailoa atu i afioga i senetoa, o lenei ofisa, “e matou te o mai i totonu, ua ova ma le 60 tagata sa faigaluega i le ofisa. O le taimi lenei e na o le 29 tagata o lo’o faia galuega.”

“O le to’aitiiti lena o tagata faigaluega o lo’o i ai i le taimi nei, ae o le tele o matou matafaioi, o lo’o taumafai pea e fa’ataunu’u uma galuega i le vaaia lea o le malae va’alele, vaaiga o le uafu, ma faia o galuega e tautua ai le atunu’u. E le o se galuega faigofie o lo’o matou taumafai i ai,” o se fa’amalamalamaga lea a Fualaau.

Sa fa’ailoa foi e Faulaau i le komiti a le Maota Maualuga, “O le matou ofisa, e na o le tasi le ta’avale. E le mafai e le ta’avale lea e tasi ona fa’atino galuega. O lo’o fesoasoani mai le afioga i le Loia Sili i isi taimi, e aumai lana ta’avale e fa’aaoga e le matou ofisa.”

“O le faigata lena o galuega o lo’o matou taumafai ai nei. E pei ona saunoa atu le Loia Sili, e le o totogi ni ovatimi a le Ofisa o le Immigration,” o se isi lea tala a Fualaau. “E ofo lo latou soifua e tautua le atunu’u, i so’o se auala e mafai ai ona fa’ataunuuina ai o matou tiute, a le o totogia ni matou ovataimi.”

Sa ia fa’amalamalama atili o lo’o i ai foi va’alele e taunu’u i le po, e pei o le Hawaiian Airlines, e faigaluega ai le Ofisa o Femalagaiga, “ae le o totogi i matou i ni ova taimi. E le o i ai foi se isi o lenei ofisa o fa’asea  i le le maua o ovatimi ae o lo’o faia pea galuega.”

“E le o fa’atamala le Ofisa i le faia o latou tiute i le taimi nei. O lo’o galulue foi matou, i le [mataupu] o tagata ua ova atu aso o lo’o nofofo i inei,” o se isi lea fa’amatalaga a Fualaau.

Ua le gata i lea, “o lo’o fa’ataunu’u o matou tiute i le tipoti ina [o tagata] ua ova aso i inei, ma e le mafai ona lauiloa e le atunu’u ona e le avea e i matou i le nusipepa mea na,” o a Fualaau lea. “O le galuega lava lena o lo’o faia nei e le matou ofisa.

Sa ia fa’ailoa foi e toatolu le aufaigaluega a le Immigration o lo’o gafa ma le mataupu lenei e siaki i latou ua ova aso o i ai pea i le atunu’u. O i latou foi ia o lo’o i ai i le fa’amasinoga i mataupu o lo’o mana’omia e le fa’amasinoga.

Ae o se fa’ailoa e le komiti ia Fualaau ma le Loia Sili, o le tulaga i le to’aitiiti o tagata faigaluega ma le tasi o le ta’avale o matatupu ia e fa’aui i le Ofisa o le Kovana i le taimi o le paketi ona tuuina mai lea i le Fono Faitulafono.