Faaulufale le Malumalu Tapua’i Ekalesia Aso Fitu o le Toe Afio Mai i Uosigitone

Seattle - WA

O le vaiaso nei na Faaulufale ai le Malumalu Tapua’i a le Ekalesia Aso Fitu o le Toe Afio Mai i le aai o Spanaway, i le Setete o Uosigitone. 

O lea Ekalesia e lauiloa i le igoa, Southside Samoan SDA Church, ma e silia i le to’a 100 le aofa’i o ona sui totino e aofia ai le autalavou ma fanau laiti.

E silia i le to’a 100 valaaulia mai nofoaga eseese i totonu lava o Amerika na auai i le molimauina o lenei sauniga taua. O i latou nei e aofia ai susuga i Faifeau ma o latou Faletua, o Ta’ita’i o Ekalesia, susuga i Toeaiina, aemaise ai uo ma paaga masani a le Ekalesia. 

O nisi o Ta’ita’i o le Ekalesia i le galuega Samoa i totonu o Amerika na auai i lenei faamoemoe e aofia ai le Peresetene o le Galeuga a Ekalesia Samoa uma i Amerika, susuga Pastor Manuao Maui’a, faapea ai ma le Faifeau Sinia, susuga Pastor Dr. Erika Puni.

O le Tamā matua o le Ekalesia, 92 tausaga o lona soifua, susuga i le Toeaina ia Saofa’ilēta Siolo Leutele na tuu i ai le fa’aaloalo na te ootiina le lipine e tatala aloaia ai le sauniga.

O le Peresetene o le Koneferenisi a Uosinitone susuga Pastor Doug Bing sa ta’ita’ia le sauniga e faapaia ai le Malumalu Tapua’i a le Ekalesia. 

Na faataua e le alii Peresetene i le feau sa ia laugaina le taua o le faataulagaofo e le gata o lona soifua aemaise ai o ana taleni mo le Atua. Sa ia taua fo’i ma faamamafa le taua o le galuega ua fausia e le Ekalesia, o se Malumalu lea e tapua’i ai tagata lotu i le Atua.

Ae na faamamafa e le alii Peresetene i lana saunoaga, e ui e taua le Malumalu ua fausia, ae sili atu le taua o le tagata i le Atua. O le tagata, e pei ona saunoa Pastor Bing, o iina le malumalu e afio ai le Agaga Paia o le Atua.

Na taua e le alii Faifeau o le Ekalesia, susuga Pastor Anthony Lavea le agaga vivii i le Atua ina ua mae’a aloaia le galuega sa alo atu i ai le Ekalesia. Sa ia faafetaia fo’i tagata Ekalesia i le filigā ma le galulue punoua’i e tautua le Atua i soo se vaega o Lana galuega.

Na faapea foi ona faafetaia e le Ta’ita’i Toeaina o le Ekalesia, susuga Komisi Siolo matafale uma o le Ekalesia i le faamalolosi i le galuega, e ui i le tele o lu’itau. Sa ia taua fo’i le to’atele o nisi na alolofa ma fesoasoani atu i le galuega, e le gata i Ekalesia, o Faifeau, aemaise ai fo’i uo ma aiga. 

Na faapitoa le faafetai a le Ta’ita’i o le Ekalesia i le Peresetene o le Koneferenisi, susuga Pastor Bing ona o le lagolago malosi i le unaia o lenei galuega seia oo lava ina faamae’aina.

E tusa ai o le tala o le galuega, na muamua faatau e le Ekalesia le fanua e silia ma le 2 eka, faatoa amata ai loa sailiga tupe mo le fausiaina o le Malumalu. I la tuana’i ai o nai tausaga na faatino ai le galuega, na mafai ai loa ona faaulufale i le vaiaso na te’a nei.

E 2 aso sa faagasolo ai lenei faamoemoe a le Ekalesia. O le aso lona 2, na faatinoina ai le taumafataga ma fa’aaloaloga faa le aganu’u e masani ai Samoa i aso faapenei.