Fa’atulagaina fa’au’uga lona 82 a le ASCC i le aso Faraile o loma nei

Pago Pago - AMERIKA SAMOA

O le aso Faraile o loma nei, Me 16, 2025 i le 10 i le taeao, o le a fa’ataunu’uina ai le fa’au’uga lona 82 a le Kolisi Tu’ufa’atasi a Amerika Samoa (ASCC) i se sauniga o le a faia i le Fale Ta’alo a Kanana Fou.

I le taimi sa lomia ai lenei fa’asalalauga, e to’a 74 fanau aoga ua fa’amaonia o le a taua’aoina a latou fa’ailoga ma tusi pasi mai i le kolisi, ae e mafai ona toe iai se fa’aopoopoga i lea fuainumera pe a mae’a uma su’ega a le a’oga.

O le afioga i le Epikopo Kolio Tumanuvao Etuale, le Fa’aao o le Ekalesia Katoliko i Samoa, o le a pule fa’amalumalu i lenei sauniga taua.

O le lauga autu o le aso ua faapea ina filifilia ai le tina o Adrian Fa’amalolo Vasai, se tasi ua loa lana tautua i totonu o le Kolisi, ae o lo’o avea nei ma Faatonusili o le matagaluega a le Vocational Rehabilitation.

O Vasai, o se alo tamaitai a le afioga ia Vasai Fred Aisali Vasai lea ua fa’ilagi le folauga – mai Aua ma le faletua ia Ruta Tuiofetua Fanene o Nu’uuli.

E malaga mai o ia mai i le afio’aga o Aua ae na soifua mai o ia i Honolulu, Hawaii.  E to’atolu nai ona alo, o Shalom Ruta, Iverson Vasai ma Dyson Tui Tama.

Na soifua mai Vasai a’o iai lona tua’a i totonu o le vaega’au o le Fuava’a a le Iunaite Setete.  Sa tuputupu ifo o ia i totonu o Amerika.  Ma ina ua ritaea lona tua’a i le 1977, sa faapea ona toe taliu mai lo latou aiga i Amerika Samoa.

Sa fa’amae’aina aoga tulaga muamua a Vasai, i le aoga a Aua i le 1980 ma fa’aauauina ai ana a’oa’oga maualuga i le Aoga Maualuga a Fagaitua, lea na fa’au’u mai ai i le 1984, a’o avea o ia ma totino o le NHS faapea ma Failautusi a fanau a’oga uma sa auai i le a’oga.

Na faapea ona fa’aauauina ana a’oa’oga i le ASCC, lea sa fa’au’u mai ai i le tausaga e 1987 ma lona fa’ailoga o le AA (Liberal Arts), ma sa fa’amanuiaina ai o ia i se sikolasipi e fa’aauau ai ana a’oa’oga.

I le taumafanafana o le 1989 sa faapea ona galue ai Vasai i le Maota Fono a Amerika Samoa ma fa’au’u mai ai i le Iunivesite a BYU i Hawaii ma lona fa’ailoga o le BA (Political Science).

Ina ua ia toe taliu mai i le tertori i le 1990, sa avea Vasai ma faiaoga i le aoga maualuga a Samoana i le mataupu o le ‘Social Studies’ lea na avea ai o ia ma ta’ita’i o lea mataupu mo le ono tausaga.  Sa avea foi o ia ma faufautua i le kalapu o le ‘Close-up’ mo le valu tausaga faapea ai ma le Sosaiete a le NHS mo le fa tausaga, atoa ai ma le Ofisa a fanau aoga mo le tolu tausaga.

I le 1998 sa fa’apaleina ai o ia o le Faiaoga o le Tausaga a Samoana, ma avea ai ma se tasi o sui tauva mo le Faiaoga o le Tausaga a le Teritori (TTOY).

A’o iai o ia i Samoana, sa taliaina ai o ia i totonu o le ulua’i polokalama mo faiaoga e saili ai o latou fa’ailoga o le Masters ma le Fa’afoma’i (Cohort), i le Iunivesite a Golden Gate i San Francisco.  Ma na fa’amanuiaina taumafaiga a Vasai ma ia ausia ai lona fa’ailoa o le Master’s (Public Administraion) i le 1997.

O le 1999 sa amata ona galue ai Vasai i totonu o le Kolisi a le ASCC ma e 18 tausaga sa ia galue ai i le kolisi.

I le 2007-2011 na malaga atu ai Vasai i Honolulu, Hawaii ma avea ma faiaoga i se a’oga Katoliko.  Ae i le tausaga e 2016, i lona toe taliu mai i le teritori, sa toe fa’aola ai e Vasai ia le Kalapu o le ‘Political Science’ i le ASCC.  O se kalapu ua o’o mai lava i nei vaitaimi, o lo’o alu malosi lava.

E tolu tausaga sa avea ai Vasai ma sui Faufautua i le sosaiete o le Phi Theta Kappa a le Kolisi ma sa faapea ona tusia lona suafa i totonu o le lisi o nisi o faiaoga maoa’e i totonu o Kolisi a Amerika, i le 2003.

Faatasi ai ma lona tautua i totonu o a’oa’oga, sa faapea foi ona galue malosi Vasai i totonu o lona aiga, ekalesia ma nu’u.  Sa soifua mai Vasai i totonu o le Ekalesia a Iesu Keriso o le Au Paia e Gata Ai ma e tele ni tofiga fa’aletalalelei sa tofia ai o ia, e le gata i totonu o lana uarota i Aua ae faapea foi lana Siteki a Pago Samoa.

O se tamaitai osi aiga, i ona aiga i Nu’uuli, Iliili, Futiga ma Aua.  O lo’o avea foi o ia ma peresetene o le Komiti a Tina ma Tamaitai i Aua (Teine o le Amu’ula), ma o i latou ia o lo’o tu malosi i le fa’amamaina ma le teuga o le nu’u, fa’atautaia o ta’aloga mo fanau talavou aemaise le lagolagoina o le Au Va’a a le nu’u – Paepaeulupo’o.

I isi vaega o lona soifuaga, o lo’o avea foi Vasai ma totino o le Komiti fa’ale Setete mo le tautuaina o tagata o Amerika Samoa e iai mana’oga faapitoa fa’aletino ma le mafaufau, faapea le Komiti mo A’oa’oga Faapitoa ma nisi faalapotopotoga e gafa ma le tautuaina o fanau e iai mana’oga faapitoa i le tino ma le mafaufau.

Mo nisi fa’amatalaga e tusa ai ma le fa’au’uga o loma nei, e mafai ona valaau atu i le 699-9155 ext. 0004.