Faatulaga le faamasinoga a se alii na fasiotia se tamaitai leoleo i Samoa, mo le tausaga fou

Apia - SAMOA

Ua toe tolopoina i le masina o Mati o le tausaga fou, ia le faamasinoga a se alii sa na fanaina se tamaitai leoleo mai Aleisa, ma maliu ai, i le lua tausaga ua tuanai.

O le susuga ia Edward Jireh Fanueli lea o lo’o molia i le maliu fasia o le tamaitai leoleo ia Mele Segisolo Lapana, ma o le aso Lua (i Samoa) na tula’i ai i luma o le faamasinoga mo ona iloiloga, ona o le faalavelave lea na tupu ia Tesema 24, 2022.

Ae peitai, ua fautuaina e le Faamasinoga Maualuga le toe tolopoina o lona faamasinoga ia Mati 24, 2025, ona o le le lava mai o se fomai fa’apitoa (pathologist) a le malo.

O le fa’alua ai lea ona tolopoina le mataupu a Fanueli.

Ua mae’a ona faaulu e Fanueli lana tali tete’e i moliaga faasaga ia te ia, e aofia ai le moliaga o le fasioti tagata, o le moliaga o le fasioti tagata le fuafuaina, o le moliaga o fa’ao’o o ni manu’a tuga i se tagata, moliaga o le umia o se a’upega ma le moliaga o le umia o se a’upega e le faalaiseneina.

O le susuga i le alii loia ia Leiataualesa Jerry Brunt, o lo’o tula’i mo Fanueli, lea o lo’o molia ma tu’ua’ia i lona fanaina o Lapana i le fale a le ua molia, i Aleisa.

Sa te’ena e le faamasinoga ia Fepuari o le tausaga ua mavae, ia le talosaga a Fanueli mo se vaegatupe faatulagaina e mafai ona tatalaina ai o ia i tua, e faatalitali ai lona faamasinoga.

Ma ina ua toe tolopoina lona faamasinoga, sa toe faauluina e lana loia lea lava talosaga e tasi.

O lo’o ta’ua i faamaumauga e faapea, sa faia se faigauo a le ua molia ma le tamaitai leoleo ua maliu, i le taimi na tupu ai lenei faalavelave.