Fa’atulaga Komesina faiga fou mo ta’avale a le Ofisa o Leoleo

Ua fa’amaonia mai e le afioga i le Komesina o le Matagaluega o Leoleo i se talanoaga ma le Samoa News i le vaiaso nei, lona fa’ataotoina lea o se faiga fou (policy) e mulimulita’i ai le Ofisa atoa o Leoleo, mo le vaaia atoa ai ma le tausiaina lelei o ta’avale a le matagaluega, ina ia mautinoa e leai se ta’avale e toe soona tu’uina atu i soo se Fale Inisinia tua e lipea ai pe afai ae tula’i mai ai ni tulaga fa’aletonu, se’i vagana ua tu’uina atu sana fa’atonuga aloaia ona fa’atoa mafai lea ona fai soo se ituaiga gaioiga.

O lea faiga e pei ona saunoa le tofa Le’i Sonny Thompson i le aso ananafi, na afua mai ina ua maitauina le tele o ta’avale a le Matagaluega o Leoleo o loo tutu solo i Fale Inisinia eseese i le atunu’u e fa’atali ai le taimi e toe lipea ma fa’afou ai, ma ua oo i le tulaga ua le gafatia e le Ofisa o Leoleo ona fa’atupe le totogiina o galuega e toe fa’afou ai nei ta’avale.

O le tele o ta’avale a le Ofisa o Leoleo o loo tutu solo i Fale Inisinia tua, o ni isi o ta’avale ua tuai ma ua pala tino, o isi fo’i ta’avale ua le toe aoga atoa le tino ma le afi, ae o isi fo’i ta’avale ua fai si umi o tutu i Fale Inisinia, ma ua talosagaina e pule o Fale Inisinia le Matagaluega o Leoleo ina ia totogi atu le umi talu ona tutu a latou ta’avale i o latou fanua.

“E tusa ai ma le ripoti sa tu’uina mai i lo’u Ofisa, e tusa ma le $56,000 le tupe atoa a le Matagaluega o Leoleo e fa’aalu e lipea ma toe totogi ai tupe uma o loo aitalafu ai le Ofisa i Fale Inisinia tua nei, ma ua faia ai loa le fa’aiuga e sili pe a fa’atautu’i ta’avale uma nei, nai lo le toe alu ai o se vaega tupe tele a le malo e toe tau fa’aleleia ai, ae sili pe a sefe lenei tupe tele e fa’atau mai ai ni isi ta’avale fou mo le Ofisa o Leoleo”, o se vaega lea o le saunoaga a Le’i i se fa’atalatalanoaga ma le Samoa News i le taeao ananafi.

O le mataupu e fa’atatau i ta’avale a le Ofisa o Leoleo e pei ona fesiligia ai le tofa a Le’i, na mafua mai i ni fa’asea mai le lotoifale o le Ofisa o Leoleo sa tu’uina mai i le Samoa News, fa’asaga i se tasi o ta’avale tuai a le Ofisa o Leoleo lea ua tu’uaia le foa’i e se tasi o Leoleo Sinia i se tasi o Leoleo e aunoa ma le silafia e le pulega a le Ofisa o Leoleo.

O le ta’avale a le Ofisa o Leoleo e pei ona taua o lo o a’afia i le mataupu lea, ua tele ni masina o tu i tafatafa o le Fale Tineimu i Fagatogo e le o toe fealua’i, ona o ni isi o vaega o le tino o le ta’avale ua le toe aoga, ma o le tausaga na te’a nei o lo o taua i fa’asea na tula’i mai ai lenei mataupu, i le taimi ae le i tofia le tofa a Le’i e avea ma Komesina o le Matagaluega o Leoleo.

E tusa ai ma le ripoti sa tu’uina mai i le Samoa News lea fo’i na fesiligia ai le tofa a Le’i i le taeao ananafi, o le ta’avale a le Ofisa o Leoleo e pei ona a’afia i lenei mataupu, na foa’i e le Leoleo Sinia ma le isi Leoleo, ina ua le mafai e le Leoleo Sinia ona totogi lana aitalafu i le Leoleo lea, ma ia faia ai loa le fa’aiuga e foa’i le ta’avale a le Ofisa o Leoleo ma le Leoleo e fa’apaleni ai le tupe o lo o ia aitalafu ai.

Na taua e le tofa a Le’i lona le silafiaina o lenei mataupu, e leai fo’i se ripoti na o o atu i lona Ofisa e tusa ai o lenei mataupu.

E talitonu le Samoa News, ua poloaina e le afioga i le ali’i Komesina le faia o se su’esu’ega fa’alotoifale a le Ofisa o Leoleo e tusa ai o lenei mataupu.

E le gata la o lea ua fa’ataoto e le Komesina o Leoleo se faiga fou e puipuia ai le toe soona aveese atu o ta’avale a le Ofisa i Fale Inisinia tua e aunoa ma lona silafiaina, ae soo se taimi e a’afia ai se ta’avale a le Ofisa o Leoleo i se fa’alavelave, e tatau lava ona faia se su’esu’ega po o ai e sese, ma, afai e sese le Leoleo se fa’afoeina le ta’avale, e tatau ona totogi e le Leoleo le ta’avale ua fa’aletonu ia te ia.

“Ina ua tofia a’u e le Kovana i lenei tofiga, sa ia fautuaina a’u ina ia ou alu e vaai ma siaki ta’avale uma a le Ofisa o Leoleo o loo tutu i Fale Inisinia uma i le atunu’u, ma vaavaai le tulaga o lo o i ai lo latou aoga ma le lelei, o le mafua’aga lena na asia ai loa e ni sui o lo’u Ofisa ta’avale uma a le Ofisa o loo tutu solo i tua, ma faia ai loa le fautuaga ina ia aumai uma ta’avale nei ma toe fa’afo’i atu i le Ofisa e Pulea Meatotino a le malo o loo lesitalaina ai, ma fuafua ai loa le faia o se fa’atau tu’i mo nei ta’avale ina ia mafai ai ona toe fa’aaoga, nai lo le tutu ai lava i Fale Inisinia ma leaga atu ai”, o se isi lea vaega o le saunoaga a le ali’i Komesina o Leoleo.

Ae i le fa’amautuina pea o le tulaga lelei o ta’avale o lo o fa’aaogaina e Leoleo e fa’atino ai la latou tautua i le atunu’u, na taua ai e le ali’i Komesina le i ai o sana fuafuaga, i le fa’a faigalugaina lea o se tagata e i ai le agava’a i tulaga tau ta’avale, poo se inisinia fo’i, ina ia gafa ma le tausia lelei o ta’avale i aso uma ina ia mautinoa o loo utu le suau’u, siaki le ma’a ma vaaia tulaga uma e moomia ona siaki i soo se taimi e mae’a ai ona fa’aaoga ta’avale a le Ofisa o Leoleo.