Fa’atonusili e le USDOL ia Saulo e totogi le tama’ita’i sa galue ia te ia

O le vaiaso na te’a nei na tuuina mai ai e le Matagaluega o Leipa a le malo tele o Amerika (USDOL) sa latou fa’aiuga tusitusia, e fa’atonu ai Florence Saulo e totogi le tupe na te lei totogiina i le tama’ita’i mai Filipaina sa galue ia te ia, talu mai le aso 2-15 o Iuni o le tausaga nei.

O Saulo, o ia lea sa avea ma sponsor a le tama’ita’i o Joselyn M. Intila mo le lata i le 10 tausaga. O ia fo’i lea sa fa’a faigaluegaina Intila i lana pisinisi Fale Su’isu’i.

O Intila na fa’atonu e le Komiti Fa’afoe a le Ofisa o Femalagaaiga na te tuua Amerika Samoa ma toe fo’i atu i Filipaina mo le umi e tasi le tausaga, e mafua mai ina ua musu o ia e fa’afou lona ID e agava’a ai ona nofo pea i Amerika Samoa. O le aso 31 Me o le tausaga nei na mae’a ai le aoga o le ID nofomau a Intila.

Na taua e se sui sooupu a le USDOL i le Samoa News e fa’apea, o le mataupu e pei ona fesiligia ai lo latou ofisa, e fa’atatau i se tagata faigaluega e lei totogi e le kamupani sa galue ai i le piriota totogi mulimuli lava o lana auaunaga, ma o se gaioiga ua soli ai tulafono a le feterale i tulaga o galuega, aemaise ai le Tulafono mo Galuega a le malo tele.

I le mae’a ai o se suesuega sa faia, na malie ai loa le pule o le kamupani sa fa’a faigaluegaina lea tama’ita’i, na te totogiina atu le tupe o loo nofo aitalafu ai i lana tagata faigaluega. O le aos 27 Iulai na maua ai e lea tama’ita’i lona totogi.

Na taua atili e le sui sooupu a le USDOL e fa’apea, e leai se sala na tuuina atu e le latou ofisa i le pule o le kamupani e tusa ai o le fa’aletonu sa tula’i mai.

Sa ia taua atili e fa’apea, o le suesuega sa faia e le USDOL, na mafai ai ona auiliili ni isi o tulaga e fa’atatau i le fa’amalosia lea o tulafono tau i tagata faigaluega ma galuega fa’atino.

O le alia’e mai ai o le fa’aiuga a le USDOL e pei ona fa’atonuina ai Saulo na te totogi le tupe ia Intila, ua alia’e mai ai se fesili i le mafua’aga na ala ai ona ia fa’a faigaluegaina Intila mai le aso 2 e oo atu i le aso 15 o Iuni, e ui sa ia silafia lelei, o le aso 31 o Me na mae’a ai le aoga o le ID nofomau a Intila.

O se kamupani na te fa’a faigaluegaina se tagata mai fafo e aunoa ma se pepa nofomau a lea tagata, ua manino mai ai le soli o tulafono tau Femalagaaiga a Amerika Samoa.

Ae tusa ai o tusi ma fa’amaumauga ua maua e le Samoa News, o lo o manino mai ai le tulaga lea, ina ua mae’a le aoga o le ID a Intila i le aso 31 o Me, sa ia malie ai loa e toe fo’i atu i lona atunu’u. E le gata sa ia totogi lona pasese e toe fo’i atu ai i Filipaina, e pei ona fuafua ai o le aso 9 o Iuni e malaga ese atu ai ma Amerika Samoa, ae o le aso 4 o Iuni na tuuina atu ai lana tusi fa’amavae i lona pule.

Na maua e le Samoa News le kopi o le tusi fa’amavae a Intila sa tuuina atu i lana pule, atoa ai ma le talosaga sa tuuina atu e lana pule ina ia toe fo’i atu e galue mo ia.

Na taua e Intila i lana tusi fa’amavae ia Saulo lona fa’afetaia o mea lelei e tele sa ia faia mo ia i tausaga e 9 o le mafutaga, atoa ai ma le avanoa ua mafai ai ona ofo atu sana auaunaga mo lana kamupani. Ae ona o ni isi o tulaga e pei ona tula’i mai, ua ia manatu ai ua tatau ona toe fo’i i lona atunu’u.

I le tusi a Saulo sa tuuina atu ia Intila tauala atu i lana Facebook, sa ia talosagaina ia Intila ina ia toe fo’i atu e galue mo ia, ma ua ia sauni fo’i e faia ni isi mea lelei mo ia e aofia ai le le toe totogiina o sana rent.

Na manino i le tusi a Saulo lona augani ia Intila ina ia toe fo’i atu e galue mo ia, ona e le mana’o e fa’aletonu lana pisinisi Su’isu’i ona o tagata sa masani ona o atu, ae o le a amata ona le toe oo atu.

E ui na iloa e Intila ua mae’a le aoga o lona ID faigaluega, ae na ia talia le talosaga a Saulo ma ia toe fo’i atu ai loa ma galue mo Saulo mo vaiaso e lua, lea e pei ona aofia ai le aso 2 e oo atu i le 15 o Iuni.

A o fa’atino e Intila galuega lelei mo Saulo i totonu o le piriota faigaluega lea, na faia ai e Saulo se gaioiga tulaga ese, e ala i lona tuuina atu o se tusi i le Taitaifono o le Komiti Fa’afoe o Femalagaaiga i le aso 6 o Iuni, e talosagaina ai le toe fa’afo’i o Intila i Filipino, ma ia fa’asa ona toe ulufale mai mo le umi e 10 tausaga.

E le gata i lea, sa ia tuuina atu fo’i se tusi i le Pulesili o le Ofisa o Femalagaaiga ia Peseta Dennis Fuimaono i le aso 11 Iuni, e fa’ailoa ai lona le toe mana’o e sponsor Intila, ona o tu’uaiga i lona le usitaia lea o tulafono tau Femalagaaiga.