Faatonu se alii toe totogi oloa sa ia gaoia mai le Faleoloa sa galue ai

Ua faatonu e le Faa’amasinoga Maualuga se ali’i ina ia toe totogi le tupe mo le tau o oloa sa ia gaoia mai i le Faleoloa na galue muamua ai.

E 5 tausaga lea ua faanofovaavaaia ai e le Fa’amasinoga le susuga a Faleulu Esau, ina ua ta’usala i lona fesoasoani e ave faagaoi oloa mai le faleoloa sa galue ai.

E ui na manatu le Fa’amasinoga e toe fa’afo’i Esau i lona atunu’u na malaga mai ai pe a mae’a ona tuli lona fa’asalaga, peita’i ua faamalumalu e le Fa’amasinoga le fa’ataunu’uina o lea tuutuuga, fuafua lava i le usita’i o Esau i poloaiga o lana nofovaavaaia.

O le aso Faraile o le vaiaso na te’a nei na tula’i ai Esau i luma o le Fa’amasinoga mo le tuuina atu o lana fa’asalaga. O le ali’i Loia Sili lagolago ia Doug Lowe na tula’i mo le malo, ae o le susuga i le ali’i Loia Fautua ia Rob McNeill na tula’i mo Esau.

Na ulua’i tu’uaia Esau i moliaga mamafa e 2 o le gaoi faapea ai ma le ave faagaoi o ni meatotino sa tuuina atu i lalo o lana vaavaaiga. Ae i lalo o se maliliega na sainia e Esau ma le malo, lea fo’i na talia e le Fa’amasinoga i le masina na te’a nei, na malie ai loa le malo latou te toe faia se teuteuga i le tagi sa latou fa’aulu fa’asaga ia Esau, ina ia fa’ailoa ai le moliaga feololo o le taupulepule lea ma isi tagata e gaoi ni mea totino.

O le moliaga o le taupulepule ma isi tagata e gaoi mea totino a se isi tagata, o le vaega D lea o solitulafono mamafa, lea e mafai ona fa’asala ai se tasi i le toese mo le umi e le silia i le 5 tausaga, pe fa’asala fo’i i le salatupe e le silia i le $5,000, poo le fa’asala fo’i i fa’asalaga uma ia e lua.

I le tali ioe ai o Esau i le moliaga sa ia ta’utino ai e fa’apea, i se taimi o le amataga o le tausaga na te’a nei, na latou taupulepule ai ma nisi o ali’i sa latou galulue i le Faleoloa o le Y & J Store e gaoi ni oloa.

O le gaioiga sa latou faia e aofia ai lo latou la’uina lea o pusa Lialia i luga o se ta’avale. O le tau aofa’i o oloa sa latou gaoia e tusa ma le $3,913.04.

Ina ua maua le avanoa e fa’aleo ai le talosaga a Esau ma lana loia, sa talosagaina ai McNeill le Fa’amasinoga mo se fa’asalaga faanofovaavaaia mo le ua molia.

Na taua e McNeill e fa’apea, ina ua tatala i tua Esau e fa’atatalitali ai le faaiuga o lana fa’amasinoga, sa alu o ia ma saili lana galuega e tausi ai lona aiga. O le taimi nei, o lo o galue o ia i lana galuega fou, ma o ia fo’i o se tagata ua faatuatuaina i lea galuega.

O ia o se Tama e galue malosi mo le tausiga o lona to’alua aemaise si ana fanau e to’atolu, o lo o tulaga lelei pea fo’i lona ID mai le Ofisa o Femalagaaiga. Na talosaga

Na faailoa fo’i e McNeill i le Fa’amasinoga le sauni o Esau e toe totogi le tupe mo oloa sa ia ave faagaoi.

Na lagolagoina e le loia a le malo le folasaga a McNeill, ma ia talosagaina ai fo’i le Fa’amasinoga ina ia faasala le ua molia i se fa’asalaga faanofovaavaaia. E talitonu le malo, ua matua salamo le ua molia e tusa ai o lana solitulafono.

Na taua e le loia a le malo i le Fa’amasinoga e faapea, na pau lava le itu o lo o naunau i ai le pule o le Faleoloa na a’afia, o le toe totogi atu lea o le tupe mo le tau o ana oloa na gaoia e le ua molia.

Na taua atili e le malo e fa’apea, e tatau ia Esau ona ia totogi atoa le tupe lea sa ia malie ai i totonu o le maliliega e totogi, afai e leai, o le a avea lea ma itu na te le usitaia ai tuutuuga o le latou maliliega ma le malo.

O lenei mataupu e pei ona saunoa le Fa’amasinoga, na alia’e mai i le Y & J Store, ina ua taupulepule le ua molia ma nisi o tagata faigaluega e ave faagaoi ni pusa Lialia.

A o la’u e i latou pusa oloa ma tu’u i totonu o se ta’avale, na i ai se taimi na manino lelei ai i le masini pu’eata a le Faleoloa le itu sa tu ai Esau, ma faigofie ai loa ona iloa o ia. Ina ua suesueina e le Pule o le Faleoloa i latou nei, sa latou ta’utino ai loa i le moni o tu’uaiga.

Na taua e le Fa’amasinoga e fa’apea, e le gata na molia Esau, ae na molia fo’i ma isi alii sa latou galulue fa’atasi i le Faleoloa na a’afia ona o lenei lava mataupu.

Saunoa Fa’amasino Sili ia Michael Kruse e fa’apea, ua talitonu le Fa’amasinoga i fa’amatalaga uma ma folasaga sa tuuina atu e Loia e itu e lua e fa’atatau i lenei mataupu.

Na pau lava le itu na taua e Kruse ua manatu le Fa’amasinoga e fai ma faamama avega mo se fa’asalaga mo Esau, o lona ta’utino lea i le Ofisa Faanofovaavaaia, o le a ia toe totogiina uma le tupe mo le taui o mea na ave faagaoi. O lea ta’utinoga e pei ona taua e Kruse, ua atagia mai ai le salamo faamaoni o Esau mai lana solitulafono sa faia.

E 5 tausaga na manatu le Fa’amasinoga e faasala ai Esau i le Falepuipui i Tafuna, faapea ai ma lona totogiina o le salatupe e $5,000. O ia fa’asalaga uma o le a faamalumalu, ae o le a nofovaavaaia o ia mo le 5 tausaga i lalo o tuutuuga e ao ona ia usita’i i ai.

O ni isi o ia poloaiga e aofia ai lona tuliina o masina e 20 i le toese i Tafuna e aunoa ma le tatalaina o ia i tua. Ua manatu le fa’amasingoa e taofi le tuliina o le 20  masina i le taimi nei, se’i vagana ua tuuina atu se isi poloaiga a le fa’amasinoga.

Ua poloaina fo’i Esau na te tuua le atunuu ae toe fo’i atu i Samoa i lona atunu’u na malaga mai ai, peita’i o lea tuutuuga o le a faamalumalu, fuafua lava i le faamaoni o Esau e tausisi poloaiga a le fa’amasinoga.

Ua poloaina fo’i o ia na te toe totogi le tupe e $3,913.04 i le Faleoloa o le Y & J Store mo le totogi o oloa na gaoia.