Faatonu se ali’i mai Fiti e toe fo’i pe a maea ona tuli lona fa’asalaga

Ua poloaina e le Fa’amasinoga Maualuga le ali’i mai Fiti lea ua tausala i moliaga mamafa e 3 o le talepe fale i le tulaga lua, ina ia tuua le teritori ae toe foi atu i lona atunu’u pe afai ae mae’a ona tuli lana fa’asalaga fa’a falepuipui.

E le gata i lea, ua poloaina fo’i e le afioga i le ali’i Fa’amasino ia Elvis P. Patea ia Rusiate Tabele na te totogi le salatupe e $3,000.

Ae talu ai e le o ia o se tagatanu’u o Amerika Samoa, ua poloaina ai e le Fa’amasinoga lana sponsor, o le Kamupani e taua o le Manuia Fisheries lea o lo o pulea e se ali’i faipisinisi Asia e igoa ia Mr. Kim. E 30 aso lea ua poloaina e le Fa’amasinoga ia Mr. Kim na te totogiina ai lea salatupe, afai e fa’atamala, o le a poloaina o ia e tula’i i luma o le Fa’amasinoga e fa’ailoa atu le mafua’aga ua ia le fa’atinoina ai ona tiute o lo o manino i lalo o Tulafono tau Femalagaaiga.

Na ulua’i tuuaia e le malo ia Tabete i moliaga mamafa e 6, e aofia ai moliaga e tolu o le gaoi atoa ai ma moliaga e 3 o le talepe fale i le tulaga lua. Ae i lalo o se maliliega na sainia e le ua molia ma le malo, lea fo’i na talia e le fa’amasinoga maualuga, ua malie ai le ua molia e tali ioe i moliaga mamafa e 3 o le talepe fale.

I le tali ioe ai o Tabete i moliaga e pei ona ta’usala ai o ia e le faamasinoga, sa ia ta’utino ai e fa’apea, i se taimi o le masina o Novema e faasolo atu ia Tesema o le tausaga na te’a nei, sa ia osofaia ai le pisinisi e taua o le Island Technology ma gaoi ni oloa sa i totonu.

E tusa ai ma fa’amaumauga a le fa’amasinoga, o Tabete, o se tagatanu’u o Fiti na ulufale mai i Amerika Samoa i le masina o Me, 2015 ma le fa’amoemoe e galue o se ali’i fagota i luga o se va’a fagota a le Manuia Fisheries.

O le masina o Novema 2015 na le toe galue ai loa Tabete o se tagata fagota i le kamupani a le Manuia Fisheries, ina ua leaga le va’a fagota, ma fealualua’i ai lava i le teritori e aunoa ma ni pepa nofomau. Na alu Tabete ma galue i le kamupani a le Island Techology ma le fa’amoemoe e maua ai se fesoasoani mo ia.

Peita’i ane, e le i lelei ona totogi e le kamupani o ia, e lei tausisi fo’i le pule o le kamupani i ana folafolaga sa faia i lea ali’i, ma tula’i mai ai loa le fa’alavelave e pei ona osofa’i ai e le ua molia le pisinisi ae gaoi oloa i totonu.

Ina ua maua le avanoa e fa’aleo ai sana fa’amatalaga mulimuli i luma o le fa’amasinoga, na fa’atoese ai Tabete e tusa ai o lana solitulafono sa fai, ma ia talosagaina ai se avanoa e toe fo’i ai i Fiti e tausi lona aiga.

Na taua e Tabete i le fa’amasinoga e fa’apea, e na o le $60 lona totogi sa maua i le vaiaso, ma e le taitai lava lea tupe e lafo i Fiti e tausi ai lona aiga. O le mafua’aga lena na ia manatu ai loa e fai se auala ina ia mafai ai ona toe fa’afo’i o ia i lona atunu’u, e ala i lona gaoi o meatotino mai le pisinisi sa galue ai.

Na taua e le loia a Tabete ia Michael White i le fa’amasinoga e fa’apea, o le to’atele o tagata e gaoi mai pisinisi sa galulue ai, e le manana’o e maua i latou, peita’i o Tabete, na mafua ona ia gaoia meatotino a le pisinisi ona sa manatu ina ia maua o ia ma mafai ai ona toe fa’afo’i o ia i lona atunu’u.

Na talosaga White i le fa’amasinoga mo se fa’asalaga faanofovaavaaia, lea fo’i na lagolago e le loia a le malo ia Christy Dunn ma talia fo’i e le fa’amasinoga.

E 7 tausaga i le falepuipui na manatu le fa’amasinoga e fa’asala ai Tabete i le moliaga e tasi mai moliaga e 3 ua ta’usala ai o ia, peita’i o le a fa’amalumalu lona tuliina o lea fa’asalaga, ae o le a faanofovaavaaia o ia i le 7 tausaga i lalo o tuutuuga e ao ona usita’i i ai.

O le a ia tuliina masina e 28 i le toese i Tafuna. O le a tuli na o masina e 12, ae o masina e 16 o le a totoe ai o le a taofi lona tuliina, ae poloaina loa o ia e tuua le teritori ma toe fo’i atu i lona atunu’u mo le umi o lana nofovaavaaia.

Ua fautuaina malosi o ia ina ia aua ne’i toe taumafai e ulufale mai i Amerika Samoa i totonu o le 7 tausaga. O le a tuuina atu fo’i lona igoa i le Lisi o tagata ua fa’asa ona toe ulufale mai i le teritori, lea o lo o vaavaaia e le Ofisa Faanofovaavaaia.