Faatonu le ali’i mai Samoa e toe fo’i pe a mae’a ona tuli lana faasalaga

Pago Pago, AMERIKA SAMOA

Ua faatonu e le Fa’amasinoga Maualuga se ali’i mai Samoa na ta’usala i lona umia faasolitulafono o fualaau faasaina, faapea ai ma lona tufatufa atu i ni ali’i talavou o le latou nu’u ma lona tuaoi ina ia toe foi i lona aiga i Samoa pe amae’a ona tuli lana faasalaga faa falepuipui e 20 masina, o se tasi lea o tuutuuga o lana nofovaavaaia e 5 tausaga na tuuina mai e le Fa’amasinoga i le vaiaso na te’a nei.

O se tasi o poloaiga a le Faamasinoga Maualuga sa tuuina atu i le susuga a Nickson Salu ina ua lau lana faasalaga i le masina na te’a nei, e le tatau ona ia toe tagofia fualaau faasaina poo le ‘ava malosi, pe toe faatasi atu foi i nofoaga ma fale kalapu o loo faatau ai le ‘ava malosi, poo lona mafuta atu foi i tagata o loo tagofie le ‘ava malosi.

I le masina o Oketopa o le tausaga na te’a neinei ao nofovaavaaia ai pea Salu mo le 5 tausaga, na faamaonia ai i se suega sa faia e le Ofisa Nofovaavaaia, le tagofia e Salu o le pauta faasaina o le aisa, ina ua maua i se suega sa faia le i ai o le vailaau o loo maua i le aisa i totonu o lona tino.

O le masina na te’a nei la lea na tula’i ai loa Salu i luma o le Fa’amasinoga Maualuga mo le tuuina atu o lana faaiuga. Ina ua maua lona avanoa mai le Fa’amasinoga, na faatoese ai loa lenei alii e tusa ai o lana solitulafono sa faia, ma ia talosagaina ai se isi avanoa mo ia se’i toe fo’i atu ai i tua e tausi lona aiga ma fa’aaoga aso o loo totoe o lona olaga e auauna ai mo nai ona matua, aemaise le tausiga o lona to’alua ma lana fanau.

Na taua e Salu ma loimata lona salamo moni e tusa ai o lana solitulafono, ma ua ia aoaoina fo’i se lesona taua mo lona olaga ao i ai i totonu o le Toese. Na ia ta’utino i le Fa’amasinoga lona lagona o le sese o le faaiuga sa ia faia, ma ua ia manatu ai, afai ae toe maua se isi avanoa mo ia, o le a ia fa’aaoga tatau loa lea avanoa.

Na talosaga le loia na tula’i mo Salu i le Fa’amasinoga ina ia toe tuu se isi avanoa mo lenei alii e aumau ai pea i Amerika Samoa, ma fa’aauau pea ona faanofovaavaaia. Na taua e le Loia Fautua le salamo moni o Salu mai lana solitulafono, ma ua ia aoaoina fo’i se lesona aoga talu mai aso e 109 na taofia ai o ia e faatali ai se faaiuga o lana mataupu.

Na finau le Loia a Salu e faapea, e le mafai ona fofo le faafitauli o le tagofia e Salu o le faaaoga o fualaau faasaina pe afai e toe ave foi o ia i le Toese e tuu ai. Pau le auala e mafai ai ona foia lea faafitauli, o le tuu lea o se avanoa e auai o ia i aoaoga faa faufautua ina ia fesoasoani ai i le faafitauli o lona tagofia o le ‘ava malosi.

Na talosaga le Loia a le malo ina ia tuu se isi avanoa ia Salu e toe timata ai lona olaga ma alu ese mai ai i le faafitauli o le tagofia lea o fualaau faasaina. 

E le i lagolagoina e le Faamasinoga Maualuga faafinauga a Loia, ae na manatu le Faamasinoga e aloaia pea tuutuuga o le nofovaavaaia sa tuuina atu ia Salu i le 2017.

Saunoa le afioga i le alii Faamasino e fa’apea, ina ua tula’i mai le mataupu fou faasaga ia Salu, na maua ai loa le avanoa o le Laulau a Faamasino latou te toe vaavaai ai i mau faamaonia o lenei mataupu sa tuuina atu i le taimi na lau ai le faasalaga a Salu i le masina o Tesema o le 2017

Sa latou vaavaai fo’i i tuutuuga o le maliliega sa sainia e Salu ma le malo, faapea ai ma mau faamaonia o le tagi a le malo sa faila faasaga ia te ia. O nei faamaumauga uma, ua tula’i mai ai se popolega i le finagalo o le Fa’amasinoga, ona o nisi o mafua’aga talafeagai.

Saunoa le afioga a Patea e fa’apea, o Salu na pu’e faapagota e Leoleo ma tu’uaia i le faalavelave lea na ia tuuina atu ai ni sikaleti mariuana i se tamaititi e aoga i se tasi o Aoga Maualuga ma le fa’amoemoe e alu lea tamaitiiti aoga ma fa’atau atu fualaau faasaina i isi fo’i tamaiti aoga.

Na faatino e le tamaititi aoga le mea na mana’o ai Salu, ma alu ai loa ma ula isi sikaleti mariuana, ae o isi sikaleti na fai ai lana tamai pisinisi e ala i le faatau atu i isi tamaiti aoga, ma i’u ina maua ai loa e se Leoleopo a le aoga ma auina atu ai loa lea o fanau aoga i le Ofisa, ma logo ai loa ma Leoleo.

Saunoa Patea e fa’apea, e ui i le matuia o tu’uaiga faasaga ia Salu, ae na manatu le Faamasinoga e tuu le avanoa ia te ia i le taimi na lau ai lana faasalaga, ma le talitonuga o le a ia savali i le ala sa’o ma aga’i atu ai i se olaga suia. E tele avanoa na tuu atu e le Faamasinoga ia Salu.

Na faamalumalu e le Famaasinoga lona tuliina o le 5 tausaga i le Toese, ae na nofovaavaaia ai o ia mo le 5 tausaga. E 20 masina na manatu le Faamasinoga e loka ai o ia i le Toese, ae na manatu fo’i le Faamasinoga e taofi lona tuliina o lea umi, ae fa’aaoga le 6 masina lea na taofia ai o ia i le Toese e faatali ai le faaiuga o lana mataupu, e fai ma ana faasalaga. 

O le aso na lau ai le faasalaga a Salu, o le aso foi lea na tatala ai o ia i tua e le Fa’amasinoga, ma le talitonuga o le a ia usitaia poloaiga uma a le Fa’amasinoga, e aofia ai le faasa lea ona ia toe soli se tulafono, faasa ona ia toe tagofia le ava malosi poo fualaau faasaina, atoa ai ma le faia o suega e faamaonia ai na te le o toe tagofia le ‘ava malosi poo fualaau fa’asaina.

Ae o le itu e faanoanoa ai, e le i atoa se 2 tausaga talu ona nofovaavaaia Salu, a o lea ua toe fo’i lava i lona olaga tuai sa i ai, ma ua maua ai le Fa’amasinoga, e le o aoaoina lava e lenei alii se lesona taua mo lona olaga.

Ona o lea tulaga, ua manatu ai loa le Fa’amasinoga, o le poloaiga a le Faamasinoga lea na taofi lona faatinoina, lea na tuuina atu i le 2017 e tuua ai e Salu laufanua o Amerika Samoa ae toe fo’i atu i lona atunuu na malaga mai ai, ua manatu le Faamasinoga e faatinoina loa i le taimi nei, ma ua poloaina ai loa Salu ina ia sauni loa e tuua Amerika Samoa ae fo’i atu i lona atunuu ma aumau ai mo le umi o lana nofovaavaaia e 5 tausaga.

O le taimi lava e tatala ai femalagaaiga a vaalele i le va o Samoa ma Amerika Samoa, o le taimi fo’i lea e tatau ai loa ona tuua e le ua molia le atunuu. O le a galulue faatasi le malo ma le Ofisa Nofovaavaaia mo le faatulagaina o pepa malaga e aofia ai ma le totogiina o le pasese. Ua faatonuina fo’i le sponsor a Salu ina ia galulue ma le Ofisa Nofovaavaaia mo le faatinoina o manaoga uma e tusa ai o lenei poloaiga.

O le tagi faasaga ia Salu na tulai mai i le masina o Fepuari 2017 ina ua maua ni ali’i talavou se to’alua o loo auai i se inugapia i luma o se faleoloa i Tafuna. Na taofia e Leoleo ali’i talavou nei e to’alua ae maua ai vaega o le laau faasaina o le mariuana.

Na suesue e Leoleo alii talavou nei e to’alua ma faamaonia ai, o mariuana na maua ia laua na avatu i le la uo o Salu. Na taua atili e ali’i talavou nei e to’alua i Leoleo Suesue, e masani lava ona avatu e Salu fualaau faasaina ia te ia i taimi latou te inupia ai.

Ina ua fesiligia e Leoleo ia Salu, sa ia faamaonia ai lona tuuina atu o pepa iila o loo i ai vaega ole laau faasaina o le mariuana i ali’i talavou nei i le taimi na latou inupia ai. 

Na taua atili e Salu e faapea, o le tele o taimi latou te tafafao ai ma ana uo talavou nei, e le gata na te tuuina i ai ‘ava malosi ae na te tuuina atu ai fo’i fualaau faasaina.