Faatonu Fa’amasinoga se ali’i e toe fo’i i Samoa pe a uma ona tuli le faasalaga

Pago Pago - AMERIKA SAMOA

O se tasi o tuutuuga o le faasalaga nofovaavaaia a le susuga a Apisai Faatiga, afai ae mae’a ona tuli lana faasalaga faa falepuipui e 20 masina i le Toese i Tafuna, ona ia tuua lea o le teritori o Amerika Samoa ae toe fo’i atu i lona atunu’u o Samoa na malaga mai ai, ma nofo mau ai mo le umi o lana nofovaavaaia e 5 tausaga.

O le susuga a Faatiga, lea na taofia pea i le toese i Tafuna ina ua taofia o ia e Leoleo i le tausaga na te’a nei, ina ua le mafai ona ia totogi le tupe e $35,000 sa fa’atulaga e tatala ai o ia i tua, na tula’i i luma o le Fa’amasinoga Maualuga i le masina na te’a nei mo le lauina o lana fa’asalaga.

Sa tula’i mo ia le ali’i loia fautua lagolago ia Ryan Anderson, ae o le tama’ita’i loia sili lagolago ia Kristine Soule’ na tula’i mo le malo.

E 3 tagi eseese a le malo sa faia fa’asaga ia Faatiga

I le tagi muamua, na molia ai o ia i le moliaga o le faiaiga faamalosi ma se tama’ita’i, taofia faapagota o se tagata i se auala fa’asolitulafono, faapea ai ma le fa’aoolima i le tulaga tolu. I le tali lona lua, na tu’uaia ai o ia i lona fa’aaoga fa’asolitulafono o se a’upega, taofia faapagota o se tagata i se auala faasolitulafono, faapea ai ma moliaga e 2 o le fa’aoolima i le tulaga tolu. Ma le tagi lona tolu, na tu’uaia ai o ia i le moliaga mamafa e tasi o le sola ese mai le toese ao taofia ai o ia.

Ae i lalo o le maliliega na sainia e le ua molia ma le malo, lea fo’i na talia e le fa’amasinoga maualuga i le masina o Oketopa na te’a nei, na tali ioe ai Faatiga i moliaga mamafa e 2 e aofia ai lona tagofia o itutinosa o se tama’ita’i i se auala fa’amalosi, faapea ai ma le moliaga o lona fa’aaoga fa’asolitulafono o se a’upega mata’utia e lei lesitalaina.

I le tali ioe ai o Faatiga i moliaga e pei ona ta’usala ai o ia, sa ia ta’utino ai e fa’apea, i se taimi o le aso 23 o Aokuso o le tausaga i ona tua atu, 2020 i Amerika Samoa, sa ia una’i ai le tama’ita’i na a’afia aga’i i le afi o lana ta’avale, ma ia tagofia ai ona itutinosa i se auala e fa’amalie ai lagona tu’inanau sa ia te ia, e aunoa ma le malie i ai o lea tamaitai. 

Sa ia taua atili fo’i e fa’apea, i totonu o lana ta’avale i le aso e pei ona taua, sa ia taofia faamalosi ai le tamaitai na a’afia e aunoa ma lona loto i ai, sa ia tagofia ona itutinosa atoa ai ma lona fa’amalosia o ia la te feusua’i.

I le isi fa’alavelave, na ta’utino ai le ua molia i lona fa’aaoga fa’asolitulafono o se aupega mata’utia, e ala i lona tu’u i luma o foliga o le tama’ita’i na a’afia ina ia fa’afefe ai o ia. Na taua atili e le ua molia e fa’apea, o lana gaioiga sa faia na mafua mai i se taugaupu i le va o ia ma le tama’ita’i na a’afia.

E le i manatu le ua molia e tuuina atu sana fa’amatalaga poo sana faatoesega e tusa ai o solitulafono ua ta’usala ai o ia, e pei ona masani ai le Fa’amasinoga - o le tuu atu lea o le avanoa i soo se tasi ua nofosala mo sana faamatalaga faai’u ao lei tuuina atu le faaiuga a le Fa’amasinoga.

Na taua e le ali’i loia ia Anderson e fa’apea, ua lava o ia e fai ma sui o le ua molia na te fa’aleoina lana fa’atoesega atoa ai ma sana fa’amatalaga i luma o le fa’amasinoga. Na taua e Anderson i le fa’amasinoga le salamo moni o Faatiga e tusa ai o lana solitulafono sa faia, ma ua ia lagona fo’i le leaga o le mea sa ia faia.

Na talosaga Anderson i le fa’amasinoga mo se fa’asalaga fa’anofovaavaaia, ina ia mafai ai ona toe fo’i atu le ua molia i lona aiga i Samoa. Sa ia talosagaina fo’i le fa’amasinoga ina ia poloaina Faatiga e toe fo’i atu i lona aiga i Samoa, ona o tulaga fa’aletonu i ona pepa nofomau. 

Na faailoa e Anderson i le fa’amasinoga e fa’apea, ua aoaoina e le ua molia se lesona taua mai le fa’alavelave ua ta’usala ai o ia, atoa ai ma le umi lea na taofia ai o ia i le toese, ma ua lava lea e fai ma suiga lelei i lona olaga. Sa ia talosagaina fo’i le fa’amasinoga ina ia aua ne’i toe i ai se isi fa’asalaga fa’a falepuipui e tuli e le ua molia, a ia fa’aaoga masina na taofia ai o ia talu mai le tausaga na te’a nei e avea ma ana fa’asalaga i lenei mataupu.

Na lagolagoina e le loia a le malo le talosaga a le itu tete’e mo se fa’asalaga fa’anofovaavaaia, atoa ai ma le poloaina e toe fa’afo’i atu ai o ia i Samoa. Na taua atili e le Loia a le malo i le fa’amasinoga e fa’apea, e talitonu le itu a le malo, ua talafeagai fo’i le fa’aaoga o masina na taofia ai le ua molia i le falepuipui, e fai ma ana fa’asalaga i lenei mataupu. 

Ae na taua manino e le Fa’amasinoga i lana folasaga ao lei tuuina atu lana faaiuga mo le ua molia e fa’apea, o Faatiga na ta’usala e le fa’amasinoga i ni solitulafono e pito sili ona ogaoga ma mamafa, o ni solitulafono sa ia fa’atino fa’asaga i se tama’ita’i sa avea ma ana paaga mo le tele o tausaga ma maua ai fo’i sana fanau e to’atele, ae le i manatu e fa’aipoipo atu ia te ia.

“E matuia le gaioiga sa e faia i le tama’ita’i na a’afia,” o le saunoaga lea a le Fa’amasonoga ia Faatiga, lea sa nofo i tafatafa o lana loia ma punou i lalo i le taimi atoa na lau ai lana fa’asalaga.

“Ua manatu le Fa’amasinoga, o lau talosaga ina ia poloaina oe e tuua le teritori ae toe fo’i atu i Samoa, o se gaioiga ua e faia ma le fuafua lelei ina ia e sola ese ai mai le fa’atinoina o ou tiute fa’a Tama, e ala i le tausia o lana fanau na maua mai i le tama’ita’i na a’afia i lenei mataupu.”

Na faamanatu fo’i e le Fa’amasinoga ia Faatiga tiute tauave o le Tama mo lana fanau, e aofia ai le tatau lea ona ia tausi ma fafaga ia tei latou. Ae o lana gaioiga ina ia toe fa’afo’i o ia i Samoa, ua atagia mai ai lona le manatu e fa’ataunu’u ona tiute fa’a Tama i lana fanau.

Na taua fo’i e le Fa’amasinoga i le ali’i ua molia le i ai o aafiaga o lana gaioiga sa faia, ae o lana gaioiga ina ia poloaina o ia e toe fo’i i Samoa, ua atagia mai ai lona naunau e sola ese mai nei mau aafiaga. E le i faailoa e le Fa’amasinoga poo a aafiaga e pei ona ia taua.

Mo le moliaga o le tagofia o itutinosa o se tama’ita’i e 7 tausaga ua fa’asala ai le ua molia i le toese i Tafuna, peita’i ua faamalumalu e le fa’amasinoga le tuliina o lea fa’asalaga, ae ua faanofovaavaaia o ia mo le 7 tausaga i lalo o tuutuuga e ao ona ia usita’i i ai.

O ia tuutuuga e aofia ai lona tuliina o masina e 28 i le toese i Tafuna, a mae’a, ona poloaina loa lea o ia e tuua le teritori ma aumau ai i fafo atu mo le umi e 7 tausaga o lana nofovaavaaia.

Mo le solitulafono mamafa o le fa’aaoga faasolitulafono o se aupega, e 7 tausaga lea fo’i ua fa’asala ai le ua molia i le toese i Tafuna, peita’i ua faamalumalu e le fa’amasinoga le tuliina o lea fa’asalaga, ae ua faanofovaavaaia o ia mo le 7 tausaga i lalo o tuutuuga e ao ona ia usita’i i ai.

O ia tuutuuga e aofia ai lona tuliina o masina e 28 i le toese i Tafuna, a mae’a, ona ia tuua lea o le teritori ae aumau ai i fafo atu mo le umi o lana fa’anofovaavaaia e 7 tausaga.

O ia fa’asalaga e lua o le a tuli fa’atasi, lona uiga, e na o le 28 lava masina o le a tuli e le ua molia i le toese i Tafuna. O lea faasalaga o le a aofia ai ma masina e 16 lea ua mae’a ona ia tuliina i le taimi nei, talu mai le taimi na taofia faapagota ai o ia i le masina o Setema o le tausaga e 2020