Faatonu e se tamaloa ia sona toalua e pule i lona ola

Pago Pago - AMERIKA SAMOA

Sa lokaina i le amataga o le masina o Oketopa se tamaloa e 39 tausaga le matua, ina ua molia i lona taumafai e faamata’u i lona to’alua ma le la fanau.

E tusa ai ma fa’amaumauga a le malo, o le taeao o le aso 6 o Oketopa, 2024, na o’o atu ai se valaau mai i se tina ma ripotia atu ai le faatupu misa o lona to’alua i totonu o le latou aiga.

E le gata i lea, sa ta’ua foi e le tina le taufa’afefeina o ia ma lana fanau, e lona to’alua.

[O le a le lomia e le Lali ia suafa o i latou na a’afia ma molia, i lenei mataupu, aua le puipuiga o fanau iti.]

Na agai mai leoleo i le nofoaga na tupu ai le faalavelave, ina ua maua le valaau mai i le tina o le aiga ma sa fa’atalanoaina ai e leoleo ia le tina.

Sa ia faamatalaina i leoleo e faapea, sa alu le ua molia, a’o iai le tina o le aiga i le fale a sana uo, ma mana’o le ua molia, e la te talanoa.

Ae ina ua o la savavali ese mai i le fale o le uo, na ta’ua e le tina, ia le ‘e’e atu o lona to’alua ia te ia ma palauvale atu ia te ia, ma faafefeina le tina e ala i le faatonuina o le tina, e alu e pule i lona ola, ae o lea o le a ia (le ua molia) tago, e pu’eina.

Na faamatala foi e le tina, le valaau atu o le ua molia, i le aoauli o le aso 4 o Oketopa, ma fa’ailoa atu ia te ia, o le la ua mae’a ona ia (le ua molia) pikiina mai se la alo tamaitai e 6 tausaga, mai i le aoga.  Ma fesiligia ai le tina, e le ua molia, pe mana’o e ave atu itu tino tipitipi o le la alo.

Sa ta’ua e le tina lona ‘ai’oi mai i lona to’alua e ave atu le la teineititi, ma ina ua taunu’u atu lona alo, sa faatonuina loa e le tina ia lona to’alua (le ua molia), e alu ‘ese loa, a leai, o le a ia (tina) valaauina leoleo.

Na faamatala e le tina, o le taimi lea sa faatonuina ai o ia e lona to’alua e tago e pule i lona ola, sa taumafai ai le ua molia, e titina lona (tina) ua, ae oso atu lona (tina) tausoga i le taofiofi le ua molia.

Ina ua faatalanoaina e leoleo ia le tausoga a le tina, sa ia ta’ua le mana’o o le ua molia, e fasioti le tina.  Sa faamatala e lea molimau e faapea, a’o iai o ia i le fale, na alu atu le tina na a’afia, ae alu atu le ua molia i le tuli faatamilomilo ia le tina ma fa’amata’u i le fa’ao’oina ia te ia (tina) o le oti.

Sa ta’ua e le tina e faapea, e le o se taimi muamua lea ua tupu ai se faalavelave faapenei, ma le fa’afefeina o ia ma le la fanau, e le ua molia.  Sa faamatala e le tina le fai atu o lona toalua, o le a ia fasiotia le la fanau teine ona ia pule lea i lona ola.

O moliaga na tu’ua’ia ai le tamaloa, e aofia ai;

Faitauga 1:  Fa’ao’olima i lona tulaga e tolu (sauaga i totonu o aiga); o se vaega ‘A’ i solitulafono mama, e mafai ona nofosala ai i le falepuipui, i le tausaga atoa, po o se sala tupe e $1,000 po o faasalaga uma e lua.

Faitauga 2:  Faatupu Vevesi i totonu o aiga (sauaga i totonu o aiga); o se vaega ‘C’ o solitulafono mama, e mafai ona loka ai i aso e sefululima, po o se sala tupe e $300; po o faasalaga uma e lua.

Faitauga 3 & 4:  Fa’ao’olima i lona tulaga e tolu (sauaga i totonu o aiga).  O se vaega ‘C’ o solitulafono mama, e mafai ona nofosala ai i le falepuipui i aso e sefululima, po o se sala tupe e $300; po o faasalaga uma e lua.

E $100,000 le tupe sa faatulagaina e mafai ona tatalaina ai le ua molia mai i le falepuipui, e faatalitali ai lona faamasinoga.