Fa’ateia fa’amasinoga ripoti fa’atatau Falema’i mo gasegase mafaufau

Na tau fai fa’ateia uma afioga i Fa’amasino o le Fa’amasinoga Maualuga fa’apea ai le Fa’amasinoga Fa’aitumalo i ripoti na mafai ona tauaao atu e le itu a le malo fa’apea ai le ali’i foma’i o lo o galue mo le tausiaina lea o i latou uma e a’afia i le gasegase o le mafaufau, e fa’atatau i le fa’afitauli o lo o fetaia’i ma le Falema’i mo Gasegase o le Mafaufau i le atunu’u, lea na fa’atoa tatalaina i ni nai masina e lei mamao atu.

O lea fa’afitauli e aofia ai le 10 o potu o le falema’i ua mae’a ona fausia ma tatala ae na o le to’a 3 gasegase o lo o mafai ona tausia ai i le taimi nei.

O le vaiaso nei na fofogaina ai i luma o le fa’amasinoga maualuga mataupu fa’asaga i tagatanu’u se to’atolu a Amerika Samoa, ua 100% le fa’amaonia le a’afia o i latou i le gasegase o le mafaufau, ae le o mafai ona taofia i latou i le falema’i mo togafitiga, se’i vagana ai le taofia o i latou i le falepuipui i Tafuna i le taimi nei.

O i latou uma nei e to’atolu, e aofia ai ali’i e to’alua ma le tama’ita’i e to’atasi, na taofia e Leoleo i le toese i Tafuna talu mai le vaiaso na te’a nei, ona o tu’uaiga o le fa’atupu vevesi i nofoaga faitele, ae ina ua su’esu’e atili e le Foma’i o le Mafaufau o lo o galue i le Falema’i o le LBJ, o ia fo’i lea o lo o faia togafitiga mo i latou e to’atolu o lo o taofia i le Falema’i o le Mafaufau, na fa’amaonia ai le tutupu o fa’afitauli ia i latou nei, ina ua fa’atamala i le inuiina lea o a latou fualaau.

E lei taliaina le atunu’u lautele atoa ai ma le Samoa News i totonu o le potu fa’amasino i le taimi na iloilo ai e le fa’amasinoga mataupu fa’asaga ia i latou nei e to’atolu, ae ina ua fesiligia e le Samoa News loia e fa’atatau i lenei mataupu, sa taua ai le fa’ateia o le fa’amasinoga i le ripoti a le Foma’i, e na o le to’a 3 gasegase o lo o mafai ona taofia ma tausia i le Falema’i o le Mafaufau i Faga’alu, e ui e 10 potu o le falema’i o lo o i ai.

Na taua e loia le fa’ateia o le afioga i le fa’amasino sili ia Michael Kruse e fa’atatau i lea mataupu, ma ia fautuaina ai itu e lua ina ia mautinoa e maua e i latou e to’atolu togafitiga talafeagai mo i latou, ma ia mautinoa e fa’aauau pea ona latou maua le avanoa e inu ai a latou fualaau.

O le mae’a ai o le iloiloga sa faia i luma o le afioga i le fa’amasino i le aso Gafua na te’a nei, na toe faia ai loa lea o le isi iloiloga i luma o le fa’amasinoga fa’aitumalo i le taeao ananafi, mo le mataupu a le isi ali’i e to’atasi o lo o taofia pea i le falepuipui i Tafuna i le taimi nei, i le mae’a ai lea ona poloaina e le fa’amasinoga maualuga o le isi to’alua ina ia tatala i tua i lalo o le vaavaaia a le Matagaluega o le Soifua Maloloina, ma ia mautinoa e fa’aauau pea ona usitaia e i laua fa’atonuga mo le inuina o a laua fualaau.

Na fa’ailoa e le afioga i le ali’i fa’amasino ia Fiti A. Sunia i le taeao ananafi e fa’apea, e le tatau ona taofia se tasi e a’afia i le gasegase o le mafaufau i le falepuipui, ona o le mafua’aga ina ia mautinoa ai e inu lana fualaau.

Sa ia saunoa atili e fa’apea, soo se tagatanu’u e a’afia i le gasegase o le mafaufau, e i ai ona aia tatau e tatau ona puipuia e le malo ma le fa’amasinoga, e aofia ai le aia tatau e agava’a ai o ia mo togafitiga o le mafaufau, ina ia mautinoa e mulimulita’i o ia i le inuina lea o ana fualaau.

O le taeao nei lea ua fa’amoemoe e toe fa’aauau ai le mataupu fa’asaga i le ali’i e to’atasi lea o lo o taofia pea i le falepuipui, ma le faamoemoe e fa’amautu ai le tatalaina o ia i lalo o le vaavaaiga a le falema’i.

Ina ua fesili Sunia i le ali’i o lo o molia po o fea e fia nofo ai, na vave le tali a lea ali’i, “ou te fia nofo i le falema’i, e le lelei le falepuipui mo a’u”.