Faataunuuina iloiloga mo paketi fuafuaina a le malo mo le tausaga tupe 2025

Pago Pago - AMERIKA SAMOA

O le aso Lua na se’i mavae atu nei, na toe o’o atu ai le Tausitupe a le Malo, le susuga ia Malemo Tausaga ma le Faatonsuili o le Ofisa o Paketi, le faletua ia Catherine Saelua, i luma o Komiti o Tupe Faasoasoa ma Paketi a le Senate ma le Maota o Sui, ina ua tolopoina le iloiloga muamua i le aso Gafua, mo le talanoaina o le paketi faauluina mo le Tausaga Tupe o le 2025.

Na mafua ona toe tolopoina lenei iloiloga mai i le aso Gafua, ona ua le ‘autasi finagalo o afioga i sui faitulafono ma molimau a le malo, e tusa ai ma Tupe Lotoifale taumateina i le aofaiga e $165,907,000, o se tasi lea o alagatupe, mai alagatupe e fa i totonu o le paketi sa faauluina.

O isi alagatupe e tolu, e aofia ai Tupe Foa’i Faapitoa a le Feterale- $282,683,500 miliona; Galuega Faigata e manaomia ona faia - $274,463,000 miliona; o Fuafuaga mo Faaleleiga Taua e $10,629,667 miliona.  A tu’ufa’atasia alagatupe nei e fa, e maua le aofaiga e $733,683,167 miliona, o le paketi fuafua lea mo le tausaga tupe o le 2025.

Ae peitai, sa saunoa le afioga i le Senatoa ia Magalei Logovii, o ia foi o se tasi na avea ma Tausitupe a le malo i tausaga ua tuanai, o le aofaiga o tupe sa aoina i le iva masina ua tuanai atu, ae i sona talitonuga, e le mafai e le malo ona aoina le $165.9 miliona e pei ona taumateina mo le tausaga tupe 2025.  O lo’o ua taofi Magalei, o se aofaiga moni e mafai ona aoina, e $139,728,596 miliona, pe $140 miliona foi – ae e le mafai ona aoina le aofaiga e $165.9 miliona.

Lea na fa’atuina ai e le sui Taitaifono o le Komiti, le afioga Senatoa Utu Sila Poasa, ia se manatu ina ia toe tolopoina iloiloga mai i le aso Gafua, se’ia mae’a ona o latou fa’asoa ma molimau a le malo, e tu’ufa’atasia seisi paketi e mafai ona ausia.  I le finau a Utu, e le mafai ona faavaeina se paketi i ni taumatega le mautonu, ma o se tulaga e ao ona fa’amanino.

Sa lagolagoina e afioga Senatoa ia Malaepule Saite Moliga ma Soliai Tuipine Fuimaono ia le mau a Utu mo le tapunia o le iloiloga i le aso Gafua, ae se’i tu’uina atu se taimi i Taitaifono o Komiti o Paketi ma Tupe Faasoasoa, o maota e lua, ia Utu ma le afioga i le Faipule ia Vailoata Amituanai, e latou te soalaupuleina ai le vaega o tupe aoina lotoifale, lea e i totonu o le paketi.

Sa toe faamanatu atu foi e le Fofoga Fetalai o le Maota o Sui ma le Peresetene o le Senate, i molimau a le malo, o le mafuaaga ua o’o ai tupe aoina lotoifale i le paketi o le tausaga tupe 2024, i le $165 miliona, ona o le $22 miliona lea sa faaopoopoina iai.

Na saunoa le afioga Savali Talavou Ale, le Fofoga Fetalai o le Maota o Sui, e mana’omia ona tu’ufa’atasia se paketi e mafai ona ausia ma e manaomia ona fofoina le vaega o tupe aoina lotoifale, a leai, o le a o latou pasiaina se aofaiga e le mafai ona ausia ma e ono a’afia ai galuega ma gaioiga a le malo. 

Na fa’aleoina foi e Savali lona faanoanoa i Taitaifono o Komiti e lua, ona o le faia o faaiuga e faatatau i le paketi ma ia finau mai, o le aia lea a le Maota Fono.

Ina ua palotaina le toe tolopoina o lenei mataupu, e toatele sui faitulafono sa auai i le manatu ina ia taofia iloiloga i le aso Gafua.  Na iai foi se maliliega ina ia feiloai Taitaifono o Komiti o maota e lua ma le Tausitupe faapea le Faatonusili o le Ofisa o le Paketi, e soalaupuleina lenei mataupu.

Ae peitai, ina ua tapunia le iloiloga i lea taeao, sa tu’ua e molimau a le malo ia le Maota Fono.

I le iloiloga sa fa’ataunu’uina i le aso na soso’o ai, sa fa’alauiloa mai ai e le afioga Utu le le’i taunu’u o le latou fono ma le Tausitupe faapea le Faatonusili o le Ofisa o Paketi, e pei ona sa faamautuina i le palota a sui faitulafono i le aso Gafua.

Na saunoa Utu, o se tulaga e ao ona tuliloaina, aua sa faia se faaiuga e le toatele o sui o le Maota Fono ma e pe a ma le lima minute, e mafai ona faia ai lea fonotaga ae le’i toe amataina iloiloga o lenei mataupu.

Sa saunoa foi Utu e tusa ai ma le $36 miliona lea ua mae’a ona fa’aaogaina e le Faigamalo e aunoa ma le pasiaina mai e le Fono, o se mataupu ua tuana’i atu.

Ae peitai, o le $22 miliona lea o lo’o totoe, e le o mana’o e fa’aaoga e faatutumu ai vaega e ono le au iai le malosi o le paketi, pe afai ae le au le aofaiga o tupe aoina lotoifale i le $165.9 miliona lea o lo’o ta’ua mai i le paketi a le malo, ae ua mae’a ona pasia le paketi mo le tausaga tupe 2025.

Na ta’ua e Utu e faapea, o le mafuaaga lea e maualuga ai le paketi a le malo, aua o lo’o fa’aauau pea ona o latou fa’aaogaina tupe fa’aopoopo e faatutumu ai vaega e le au iai lo latou malosi, ma o se tulaga e tupu i tausaga (fiscal year) taitasi.  Ma ua a’e sona manatu ina ia taofi loa lea tulaga.

Sa ia toe faamanatu mai e tusa ai ma le tulafono, o tupe maua uma lava e le o aofia i totonu o le paketi, i le tausaga tupe 2025, e le mafai ona fa’aaogaina mo seisi lava poloketi seia mae’a ona pasia ma faasoasoaina e le Fono Faitulafono.

Na saunoa Utu, o le ‘ese’esega o le $165.9 miliona lea o lo’o taumateina e le malo o le a maua mai i tupe aoina lotoifale, ma le $139.73 miliona lea o lo’o talitonu le Fono e mafai ona aoina, e le o se tupe laititi.

Ma afai e le ausia e le malo le latou aofaiga taumateina (projection), e na te le taofia le fa’aaogaina o le $22 miliona.  Ae peitai, e ao ona faia muamua ma mulimulita’i tulafono ma aiaiga uma, ona agai lea i luma ma se manatu mama.

Ina ua tu’uina atu le avanoa i le Tausitupe a le malo mo sana saunoaga, sa fa’aalia e Malemo le le toe iai o sana faamatalaga, ae o lea ua taoto i luma o le Fono Faitulafono ia le paketi fuafuaina a le malo o Amerika Samoa mo le tausaga 2025, ma lona fa’aaloalo lava.

Na fesiligia e Utu ia Malemo pe auai i le vaega sa ia faamalamalamaina po o finagalo e fa’aauau loa ma le paketi ua o fa’auluina mai.

Sa toe saunoa mai Malemo, e pei ona sa ia ta’ua muamua, o lea ua taoto i luma o Sui Faitulafono ia le Paketi fuafuaina a le malo mo le tausaga tupe e 2025, ma o a lava ni suiga e finagalo iai le Fono e faia, o le a latou taliaina.

O lea na fa’alauina ai e Utu le amataga o iloiloga o le paketi mo le tausaga tupe 2025, e amata mai i le Ofisa o Paketi.

E tusa ai ma le saunoaga a le Faatonusili o le Ofisa o Paketi ia Catherine Saelua, o le aofaiga o le latou paketi fuafuaina, e $1,175,000.

Aufaigaluega - $925,000; Sapalai - $30,100; Tautua FaaKonakarate - $50,000; Femalagaiga - $35,000; Equipment-$60,000; ma Isi - $70,000.

O le aofaiga o le aufaigaluega, e to’a 14.

E tasi le fesili a Magalei na fesiligia ai Saelua, pe fia ni ta’avale a le latou ofisa.  Sa tali Saelua, e tolu a latou taavale.  Na fa’atuina e Magalei le lafo ina ia pasia le paketi a le Ofisa lea, ma ia mafai ona tu’umuli atu le molimau.

Sa faaluaina e le Peresetene o le Senate le manatu ma ia ta’ua ai le leai o se suiga o le fuainumera o le aufaigaluega, mai i le tausaga ua tuanai.

Na soso’o ai ma le iloiloga mo le paketi fuafuaina a le Ofisa o Tupe, lea sa ta’ua e Malemo, e tutusa lava ma le aofaiga mo le tausaga tupe 2024, e $11 miliona.

Sa fa’aalia e Malemo, e tolu nisi tagata faigaluega faaopoopo i totonu o le latou ofisa, e aofia ai se Failautusi Lagolago e tasi ma nisi e to’alua mo le Ofisa o Tiute.

Na fesiligia e Utu po o iai se ‘Comptroller’, sa tali Malemo, e leai se ‘comptroller’ o iai i le taimi nei, ae sa fa’asalalauina lea avanoa i tausaga uma.

Sa fa’aalia e le Tausitupe, le taua o lenei avanoa faigaluega ma e silia ma le $200,000 le totogi.  Na ia ta’ua foi le iai o se tagata na fa’atalanoaina i le tausaga ua mavae mo lenei avanoa ma sa taliaina foi e lea tagata le galuega, ae peitai, ona o ni fa’alavelave le ma’alofia, sa toe fa’ama’amulu ai i le taimi mulimuli.

Sa ta’ua foi e Utu le taua tele o lenei avanoa faigaluega ma e manaomia i le Ofisa o Tupe ona saili se tasi e agava’a ina ia mafai ona mataituina tiute tau tupe a le ofisa, aemaise lava o tupe feterale.

O isi ofisa ma matagaluega sa iloiloina a latou paketi i le aso ananafi, na aofia ai le Ofisa o Leoleo, Ofisa o Mataupu tau Samoa, Ofisa o le Kovana ma le Ofisa o le Loia Sili.

I se taga’i a le Samoa News i le paketi fuafuaina a le Faigamalo mo le tausaga tupe o le 2025, e foliga mai e le o aofia ai le $36 miliona lea na fa’aaogaina e le Faigamalo e aunoa ma se fa’atagana mai i le Maota Fono, lea na avea ma tupe fa’aaopoopo mo le tausaga tupe 2024.

E le o va’aia i totonu o tupe faaopoopo mo le tausagatupe 2024, 2023 po o le 2022.