Faatasiga vasega fa’auu 2004 mai le Nuuuli Voctech High

SEATTLE, Washigton--O le fa’aiuga o le vaiaso na te’a nei, sa fa’atasia ai le fanau na fa’auu mai le Nuuuli Voctech High i Amerika Samoa i le tausaga 2004 i le Setete o Uosigitone, Iulai 30 se’ia oo ia Aokuso 2, 2021.

O le fa’amoemoe o lenei vasega o fanau ua mae’a maua galuega ma ua fai o latou sao i aiga, ua i ai fo’i mafutaga a nisi o lo ua mae’a  faiaiga, ina ia toe fa’atasitasi i latou ma se’i mata’i poo a ni mea ua mafai ona matou fesoasoani a’i ai le tasi i le tasi, ae maise o se sao fo’i e toe tuufa’atasia ina ia mafai ona aoga atu i le Laumua sa utuvai ai a’o talavou.

O le talatala lea a le tofa Tauinaola Salemeana’i Samantha Tatupu, mai le afio’aga o Pavaiai, se tasi fo’i o lo’o faigaluega i le Ofisa Tutotonu o le afiogga Uifa’atali Aumua Amaata Coleman Radewagen i Amerika Samoa, ao le peresetene filifilia foi o le latou Asosi a tama ma Teine tuai o le Nuuuli VocTech High 2004, lea ua toe filifili e ta’ita’ia fo’i le latou lea fa’alapotopotoga i le vaitausaga nei.

“O le mafuaga lava o le matou fa’amalosi e toe fa’atasia i matou, ona ua logo foi le nai ama, logo le nai atea, ua faiilagi le folauga a se tasi o lupe sa i le fuifui. O se sa matu olo fa’atasi, ae o lea ua folau atu i lagima. O mea fa’apea e fa’ailoa ai uso ma tuafafine moni lava, ma e malosi tele o matou lagona e tatau lava ona matou soofa’atasi a’o le’i o’o mai fo’i se isi tala fa’anoanoa i se tasi o totoe o i matou,” o se faamatalaga lea a le susuga le peresetene.

O le mafutaga a le vasega fa’auu 2004 sa fa’atasia mai i le Setete o Uositone, ma sa fa’atasia mo le fa’aiuga atoa o le vaiaso na te’a nei. Ua fa’ailoa fo’i sa tuufa’atasia e i latou se latou fa’amanatuga o le soifua o alii talavou e to’alua o le latou vasega ua tu’ua le mafutaga i le lalolagi nei. O le fa’amoemoe atoa lea sa latou fa’atasi ai, ma taumafai fo’i ina ia fa’amautu atili a latou gaoioiga aua le lumana’i o le latou fa’alapotopotoga.

“O le fa’amoemoe lava ia taumafai ona fa’auia atu se fesoasoani mo le isi pe a pagatiai fa’anoanoaga, ae maise lava i mafutaga ua mavae i le oti. O aso fa’apena e iloga ai uo mamae ma i latou e moni le alofa. O le faiuso ma le fai tuafafine o mea e sili ona taua i le tatou agaifanua. O le toe fa’apupula mai lea a Peresetene o le fa’alapotopotoga. 

Ua le gata la i lena, ae o le latou taumafaiga lenei ua amata tuufa’atasia ina ia fai se latou sao mo le Laumua sa latou utuvai ai ao talavou ma soifua i se olaga tausaili o le atamai ma le poto lautele. O le latou fa’alapotopotoga la ua fa’aigoaina o le A’apa Atu Campaign.

O i la’ua ua tu’ua le mafutaga sa alaala i la’ua i Hawaii o Joseph Leleua ma Hokule’a Fiapa’i. O lo ua mae’a nei ona latou faamanatuina le soifua sa latou ola fa’atasi ai a’o vasega 12 faatasi i le tausaga e 2004.

O lo ua fa’aauau pea lava latou sootaga i ala o upega tafa’ilagi ina ia fa’amaopoopo ai lea latou fuafuaga mo le lumana’i. Ua avea nei le ulua’i fonotaga lenei ma le vasega o sui totino ua alaala i Utah, Oregon, Hawaii ma Washington ma ala ua ma’ea fa’atulaga ai le latou laulauatofi. O lo ua tofia ai le latou Peresetene Tauinaola Jeremiah Tatupu, le Failautusi ma le Tauteupe o Tauaga ma le Sui o Fa’asalalauga Leo Adolf Aiono…mo lenei lava taimi ae se’i toe fofoga mai uma le au ofisa autu o lenei tausaga i se taimi mulimuli mai.