Fa’atasiga fa’apitoa a matua ma fanau tau’avea kosi pisinisi 2017

Ao le'i o'o mai le taimi o fa'au'uga o le Tau Malulu (Winter Graduation), ma ua tapena fo'i fanau uma e a'o'oga ma tau'avea kosi fa'apisinisi i le tatou Kolisi Tu'ufa'atasi a Amerika ia ausia maka lelei e fa'au'u mai ai, ua fa'atasia i latou ma latou faia'oga fa'apea ma le vasega o matua, ae maise o le Fa'auluuluga o le Kolisi, le Peresetele o Dr. Rosevonne Pato.

O le latou Asosi ua fa'aigoaina o le BAOA - Business Ambassadors of ASCC, ma sa latou vala'auina matua ina ia auai i se fa'atasiga fa'apitoa e fa'amalamalama ai e Faia'oga Pisinisi e to'atolu - Dr. Faofua Va'apu'u Fa'ato'afe, Professor Lam Yuen ma Profesor Taua'i - tulaga o lo'o togia ai mataupu tau'ave a le fanau.

Lona lua o le va'aiga lautele i le olaga a'oa'oina fa'apitoa o fanau e tau'avea kosi fa'apisinisi, e ao ina la'ei sa'o i la'ei e talafeagai ma le a'oa'oga ae maise o le tofi "Faipisinisi" pe faigaluega i pisinisi.

O le vaega lona tolu o le amio ia matua sa'o ona fa'atulaga, e leai ni ta'aloga e auai ai, ae tatau ona lava suesuega e tausa'ilia ai maka maualuluga e pasi ai. Afai e i ai se tasi e i ai se C- i lona le kuata mulimuli o lana a'oga, e le fa'au'u, ae toe nofo e fa'aleleia lona lea maka i le isi afa tausaga fa'ato'a fa'au'u ai.

Aisea e afua ai ona mata'alia faia'oga o lea itu o le Kolisi? Ona o le tulaga ma le va i fafo i nisi Iunivesite ma Kolisi e filifili le fanau a'oga e tau'avea ai ni a latou kosi mo fa'ailoga maualuluga. Ia le toe kiki mai e le Kolisi i fafo latou tusi talosaga mo avanoa e a'oga ai, aua e maualalo lona togi lena.

"E tatau fo'i i fanau e tauavea kosi fa'apisinisi ona fa'ataua tu ma agaifanua a nisi atunu'u o le lalolagi, aua e le mailoa lou alu atu i na malo e fa'afetaua'i i ai ni oloa, pe fa'afeso'ota'ia i ai ni au maketi e fia maua mo lau pisinisi, ae ua e malamalama lelei i tu ma agaifanua e fa'afaigofie ai lau sailiga po'o lou nofo ai i na malo,” o se toe talanoa lea a Dr Fa'atoafe i matua.

O avanoa fo'i sa tu'uina i faia'oga ta'ito'atasi ina ia fa'ailoa ni o latou taofi i matua, ia nofouta fo'i matua i le tulaga o a'oa'oga a fanau. Na tula'i se tasi o tina ma fesiligia pe aisea e le avatua ai ni Ripoti o latou fanau e pei o fanau i a'oga maualuluga ma tulaga muamua.

O le tali mai faiaoga, "Ona o aia tatau a le fanau ua a'o'oga i Kolisi e taofia ia i latou lava latou togi, ua uma le pule a matua i le fanau ua i le Kolisi, ma ua i latou le faitalia pe avane o latou togi i o latou matua, pe leai."

O lea aiaiga o se aiaiga fa'a-aia tatau a le tamaititi a'oga ma e sapaia tele e le vaega o lo'o pulea Kolisi ma Iunivesite i le Iunaite Setete ma Teritori o Amerika.

O le isi fesili sa fa'afesiligia ai e matua faia'oga o le vaitau o le Summer lea e le mafai ona avea ai i si mataupu o totoe a latou fanau, ae tu'u lava se'ia o'o i le toe afa tausaga o le tausaga a'oga.

Na fa'ailoa atu e faia'oga, "Ona o le vaitau o le taumafanafana e pu'upu'u e le mafai ona a'oa'oina atoa ai le tele o mataupu tetele ma tele fo'i unite e maua ai e le fanau i na mataupu. Afai ae faia i le summer na a'oga, e le taulia togi na i fafo i Iunivesite ma Kolisi pe a talosaga le fanau e fia fa'aauau latou a'oa'oga i fafo."

Na fofola fo'i le Tusi o Fa'amaumauga a lea vaega o A'oa'oga Fa'apisinisi, o lo'o fa'amaumau ai ata o le fanau sa tau'avea kosi fa'apisinisi, ma i'uga ua o'o i ai latou taumafaiga, ma galuega ua latou tutula'i mai ai i so'o se setete po'o teritori o a'o'oga ma alaalata'i ai.

"O lenei tusi e ta'i lua tausaga ma fa'afou ata o i ai i totonu, ua fa'amautu fo'i i nei fanau ina ia feso'ota'i mai ma fa'ailoa mai mea o i ai, po'o a latou tusipasi o lo'o tausaili, fa'ao'o mai ata o latou fa'au'uga, ao nisi o ata o latou galuega, ina ia fa'amauina e avea ma pine o le galuega a lenei itu o le Kolisi Tu'ufa'atasi o Amerika Samoa,” o se tala lea a faiaoga.

Na va'aia fo'i le fiafia o le tama'ita'i peresetene o le Kolisi, ina ua ia va'aia, e le o fa'ataga faia le galuega a le Itu o Aoaoga Pisinisi, ua latou fa'amaumau suafa o fanau sa autova'a atu i le Kolisi Tuufaatasi.

Ua fa'ailoa mai, "Ua tusa ma le to'afa aiga ua saili mai iinei fa'amaumauga mo latou fanau sa mae'a a'oa'oina i mataupu fa'apisinisi iinei, ina ia faia ai latou fa'amaumauga. O se mea sili lea ona matou fiafia ai."

O lenei tausaga ua fa'ailoa mai, e to'alua sui sa a'o'oga atu i le Kolisi Tu'ufa'atasi i lea itu, ua sailia nei o la'ua tusi CPA, Peter Peko ma Jasmine Maiava.

E lauiloa lea vasega fa'apisinisi i le toniga matagofie e a'o'oga ai i aso ta'itasi, ae maise o le latou toniga mitiafu faikola lanu moana e lomia ai le latou fa'ailo, ae o le puletasi lanumoana fo'i mo latou sauniga fa'apitoa ma vala'aulia.

I le aso Faraile nei, o le malaga ese atu lo latou Pule o le Itu o Aoaoga Fa'apisinisi a le Kolisi mo togafitiga, ma ua latou avea lea fo'i mafutaga faatasi ma matua ma ta'ita'i o le Kolisi e fai ma se toe fa'atasiga a'o le'i tu'uva'a ese atu lo latou tina i le potu a'oga, Dr. Fa'atoafe.