Fa’atali se fa’aiuga o le mataupu a Siaosi Laulu

O le aoauli ananafi na amata iloilo ai e ali’i ma tama’ita’i Iloilo Iuga se fa’aiuga o le mataupu a Siaosi Laulu, i le mae’a ai lea ona o latou fa’afofoga i fa’amatalaga tauto a molimau sa fesiligia ma su’esu’eina i luma o le Fa’amasinoga Maualuga i lenei vaiaso.

E to’alima molimau na valaauina e le itu a le malo ma o nisi o molimau e aofia ai le tama’ita’i Leoleo Su’esu’e sa autu i ai le su’esu’eina o lenei mataupu ia Det. Gaui Seanoa atoa ai ma le tama’ita’i o lo o tu’uaia sa a’afia i lenei mataupu, ae na o le to’atasi le molimau a le itu tete’e sa valaauina e molimau, o ia fo’i lea o loo taua sa i ai fa’atasi ma Laulu i le taimi o le taeao o le aso 7 Tesema 2015 o loo tu’uaia na tula’i mai ai le mataupu lea o loo tu’uaia ai Laulu e le malo, i lona ulufale fa’amalosi lea i totonu o le potu a le tama’ita’i na a’afia ma faia i ai uiga mataga ia te ia.

O le ulua’i molimau na valaauina e le malo o le tama’ita’i o loo tu’uaia sa a’afia i lenei mataupu, lea sa ia fa’aalia i lana fa’amatalaga le tele o taimi e fai atu ai e le ua molia gaioiga ma uiga mataga ia te ia, e aofia ai le tago atu i lona nofoi (tulou), ma tauanau o ia la te feusua’i.

Na taua e le tama’ita’i lea i lana molimau e fa’apea, mai le tele o taimi sa fai atu ai e le ua molia uiga mataga nei ia te ia, e i ai taimi e 2 na ia faia ai nei uiga ae o loo tilotilo atu i ai lana uo tama, o ia taimi o totonu o le umukuka o le fale mautotogi sa latou nonofo fa’atasi ai, fa’apea ai ma le Paka Liona i le aso o le pati o lona aso fanau ia Novema 13 2015, ina ua pu’e fa’atasi le latou ata ma le ua molia ma lona to’alua, ae fa’afuase’i ai ona tago atu le ua molia i lona nofoi.

Ina ua fesiligia le molimau i le fa’alavelave lea na tula’i mai i le aso 7 Tesema, sa ia taua ai le fa’ateia o ia i le ulufale fa’amalosi atu o le ua molia i totonu o lona potu ae o loo sulu lona solo fa’atoa uma ona taele, ma tago atu ai le ua molia i lona itutinosa, ma ia lagona ai le tiga.

O isi molimau na mulimuli fesiligia e le malo e aofia ai le uo tama a le tama’ita’i na a’afia fa’apea ai le ulugali’i lea e sosoo a latou potu i le fale mautotogi, e lei i ai i latou i le taimi na tula’i mai ai le fa’alavelave, ae sa latou fa’amatala i luma o le vaega iloilo iuga le taimi na vili atu ai le tama’ita’i na a’afia ma fa’amatala atu le fa’alavelave sa tupu.

Ae ina ua fesiligia e le loia a le itu tete’e molimau eseese uma nei, na atagia mai ai le eseese o a latou fa’amatalaga sa tu’uina atu i luma o le fa’amasinoga.

Na taua e le tama’ita’i na a’afia e fa’apea, ina ua mae’a ona tupu le fa’alavelave, sa ia viliina ai loa lana uo tama o loo faigaluega fa’apea ai le ulugali’i lea e sosoo a latou potu, ma fa’amatala i ai le fa’alavelave sa tupu, peita’i ina ua fesiligia e le itu tete’e le ulugalii ma le uo tama a le tama’ita’i na a’afia, na atagia mai ai i a latou fa’amatalaga, fa’atoa latou iloa lava le fa’alavelave sa tupu ina ua latou taunu’u mai i le potu.

O le isi mataupu na tele i ai fesili a le itu tete’e, o le mafua’aga na tuai ai ona fa’afeso’ota’i e le tama’ita’i na a’afia le Ofisa o Leoleo e logo i ai le fa’alavelave sa tupu, ae na fa’atalitali mo le 5 itula fa’atoa vili ai Leoleo, ae na tali le tama’ita’i na a’afia e fa’apea, sa manatu e talanoa muamua i lana uo tama ona fa’atoa vili ai loa lea o Leoleo.

O le molimau mulimuli a le malo na fesiligia, o le tama’ita’i Leoleo ia Det. Seanoa, lea sa ia taua i lana molimau le taua tele o mau fa’amaonia e lagolago ai le tagi fa’asaga ia Laulu, peita’i e le’i mafai ona maua ia mau fa’amaonia mai totonu o le potu sa tula’i mai ai le fa’alavelave.

Na fesili le loia a Laulu ia Douglas Fiaui ia Det. Seanoa pe sa ia maua ni mau fa’amaonia i totonu o le potu e lagolagoina ai le tagi fa’asaga ia Laulu, na tali le molimau e leai.

Na taua e le molimau e to’atasi a le itu tete’e i luga o le nofoa molimau e fa’apea, e leai se fa’alavelave na tula’i mai i le va o Laulu ma le tama’ita’i na a’afia, e leai fo’i ni fa’ailoga poo ni gaioiga na tutupu i totonu o le fale mautotogi o loo latou nonofo ai e atagia mai ai sa i ai se fa’alavelave sa tupu.

Na finau fo’i le itu tete’e i le fa’amasinoga ina ua mae’a le taimi na valaau ai molimau uma a le malo, ina ia solofua isi moliaga o loo tuuaia ai Laulu e le malo, ona e le o i ai ni mau fa’amaonia e lagolago ai nei tu’uaiga, peita’i i le mae’a ai ona iloilo e ali’i fa’amasino o lea talosaga, sa latou tu’uina mai ai le fa’aiuga e teena ai le talosaga.

Ua taoto atu nei i se fa’aiuga a ali’i ma tama’ita’i iloilo iuga se fa’aiuga o le mataupu e pei ona tu’uaia ai Laulu e le malo, i moliaga mamafa e fa e aofia ai lona tagofia o itutinosa o se tama’ita’i, faia o amioga fa’asotoma, atoa ai ma moliaga e lua o le talepe fale i le tulaga muamua ma le tulaga lua.