Fa’atali LBJ i se fa’aiuga o le asiasiga fa’afuase’i a le “CMS”

Ua fa’atalitali nei le pulega o le Falema’i a le atunu’u i Faga’alu, le LBJ i se fa’aiuga e tu’uina mai e sui o le vaega a le CMS (Centers for Medicare and Medicaid Services), e tusa ai o le latou asiasiga fa’afuase’i lea na asia ai le falema’i i le vaiaso na te’a nei, e pei ona fa’aalia e le Pulesili o le LBJ i luma o le fonotaga a le Kapeneta i le aso Faraile na te’a nei.

Ina ua maua avanoa o Ta’ita’i o Ofisa ma Vaega Tumaoti a le malo e fa’aleo ai a latou ripoti i le tulaga o loo i ai la latou auaunaga i le atunu’u, na tula’i ai loa Taufete’e J. Faumuina ma fa’amanino i le kovana ma le Kapeneta le talimalo ai o le falema’i i le asiasiga fa’afuase’i a le CMS.

Na taua e Taufete’e e fa’apea, soo se asiasiga lava a le CMS e sau i Amerika Samoa, latou te le fa’ailoaina mai lava, ae fa’afuase’i lava ona taunu’u mai o latou sui ma amata loa a la latou asiasiga, i le mata’ituina lea o auala uma o loo fa’atinoina ai le auaunaga a tagata faigaluega o le falema’i.

E tasi lava le mafua’aga e ala ai ona malaga fa’alilolilo mai asiasiga a sui o le CMS, o le taumafai lea e vaavaai pe i ai ni tulaga e le o lelei i le tautua a le Falema’i, ona tuuina mai ai loa lea iina o a latou fautuaga i auala e fa’aleleia ai tulaga e le o lelei, e pei ona taua i le saunoaga a Taufete’e i luma o le kapeneta.

“Ae ua avea la tulaga ia ua fai ma auala e le fiafia ai le to’atele o tagata faigaluega a le falema’i, ona ua manatu i latou, pau lava le mafua’aga e oo mai ai sui o le CMS i Amerika Samoa, o le o mai e maitau tulaga fa’aletonu, ae leai lava se taimi e o mai ai e momoli mai se fa’afetai ao se fa’amalo e tusa ai o galuega lelei o loo fa’atinoina e le aufaigaluega a le falema’i mo tagata o Amerika Samoa”, o le saunoaga lea a Taufete’e, ma ia taua ai le mae’a lea ona ia fa’alototele i lana aufaigaluega, e taua fo’i le galuega a le CMS o loo faia, ina ia mafai ai ona fa’aleleia atili le tautua a le falema’i i le atunu’u.

Na taua e Taufete’e i le Samoa News i le mae’a ai o le fonotaga a le Kapeneta e fa’apea, e faigata i tagata faigaluega ona talia le auala o loo fa’atinoina ai e le CMS la latou galuega ma asiasiga, ae i lana vaai fa’ata’ita’i, o se tulaga lelei lea mo le falema’i ina ia mafai ai ona iloa tonu e le falema’i tulaga o loo moomia ona fa’aleleia o lana tautua i le atunu’u.

“A leai asiasiga fa’apenei e le mafai ona matou iloa tulaga e le o lelei i le matou tautua, e ui lava fo’i e sa’o nai tagata faigaluega i se isi itu, peita’i o le itu taua o le fa’aauau pea o galuega lelei e tautua ai le atunu’u”, o le saunoaga lea a Taufete’e.

Pau le itu lea ua taua e Taufete’e o le a sosoo nei, o le fa’atalitali lea o le falema’i i se ripoti e tu’uina mai e le CMS e tusa ai o le fa’aiuga o le latou asiasiga sa fa’atinoina i le vaiaso na te’a nei.

I se tasi o asiasiga a le CMS e lei mamao atu mo le falema’i i Faga’alu, na fa’ailoa mai ai i se latou ripoti tusitusia le tele o vaega sa lape ai le falema’i i le fa’atinoina o le latou tautua mo le atunu’u, aemaise lava i le Vaega o Potu Fa’amamatoto.

O ni isi o ia tulaga le lelei sa taua i le ripoti a le CMS sa tuuina mai i le asiasiga o le tausaga na te’a nei, o le fa’atamala lea o le aufaigaluega i le fa’atauaina o le puipuiga o gasegase ma tagata faigaluega mai le a’afia ma pisia i fa’ama’i o loo a’afia ai le atunuu o loo latou togafitiina.