Fa’asoa a se tina na ‘coma’ i le falemai ona o se mea inu sa ia taumafaina i se faletalimalo i Fiti

FITI

O le masina o Tesema o le tausaga ua mavae, na agai atu ai le tina ia Susana ma sona alo tamaitai, e 18 tausaga le matua, i se la tafaoga i le faletalimalo i Fiti (Warwick Resort).

Sa o la tafafao i totonu o se nu’u ma maulu i le sami.  Ona o le nofonofo lea i le ta’elega a le faletalimalo.  Lea na okaina ai e le alo tamaitai a Susana ia se vai inu mai i le pa a le faletalimalo i tafatafa o le ta’elega.

Na tago le alo tamaitai a Susana ia le vai inu i lona tina e tofo ai, ona sa fai mai a ia (alo tamaitai), e ‘ese lava lana tofo i le mea inu.  Na ta’ua e Susana i le vaega fa’asalalau a le ABC, e na’o na lua lava ana inumaga.

Ae i le lima itula na soso’o ai, sa matapogia fa’afuase’i ai.  Ma e tolu aso na taofia ai i se falema’i i Fiti.  Ona fa’atopetope atu lea o ia i se falemai i Ausetalia.

O le masina lava lea o Tesema, na salalau ai tala i nisi e to’afitu, lea na aofia ai ma Susana, sa taofia i le falemai ona o se masalosaloga, na iai se mea sa i totonu o le mea inu (pina colada) sa inu e Susana ma leisi to’aono, i le pa lea e i tafatafa o le ta’elega a le faletalimalo.

Ona o seisi fa’alavelave na tupu ia Novema i se faletalimalo i Laos, lea na maliu ai ni fanau talavou mai Ausetalia, ina ua onana i ni mea inu sa o latou inumia i le faletalimalo i Laos, sa maua ai totonu ia ‘methanol’.

Ma na iai se talitonuga, o le tulaga lava lea e tasi sa tupu i Fiti lea na a’afia ai ia turisi e to’afitu, lea na aofia ai ma Susana.

Ae peitai, i le masina o Mati, o le tolu a’i lea o masina talu ona tupu le fa’alavelave ia Susana, sa fa’amaonia ai i su’esu’ega na faia i Niu Sila, le leai o se ‘methanol’ i totonu o le mea inu sa taumafaina e Susana.

Lima masina talu ona tupu lenei fa’alavelave, ae e le i maua lava e Susana se tali i le mafua’aga na tupu ai le fa’alavelave ia te ia ma isi e to’aono ma e tusa ai ma le faamatalaga a Susana i le vaega a le ABC, o lo’o tumau pea sona talitonuga, na fa’aletonu le vai inu sa ona taumafaina, lea na ‘ona ai.

Na ta’ua e Susana, sa tutusa uma mea inu na o latou inu ina ma isi e to’aono.  Ma i sona talitonuga, o lo’o taumafai ia le malo o Fiti e nana lenei fa’alavelave, e puipuia ai le agai atu o turisi i le atunu’u.

Ma ua amata ona o latou talatalanoa i se loia, e saili seisi a latou la’asaga e faasaga i le faletalimalo.

Sa mua’i ioe ia le faletalimalo i Fiti mo se faatalanoaga ma le ABC, ae peitai, i se taimi mulimuli ane, na latou toe taofia ai le faatalanoaga.