Fa’asea matua i le le sa’o ona filifili o sui o le Au Soka filifilia a AS

Ua fa’aalia e ni isi o matua lagona fa’asea ona o le le fa’amaoni o le auala na filifilia ai sui o le au soka filifilia a tama’ita’i a le atunu’u, lea ua fa’amoemoe e tausinio i le ta’amilosaga a le Pasefika e faia i Fiti i le vaiaso fou.

O le ta’amilosaga lea a le OFC (Oceanaia Football Confederation) o lo o aofia ai Amerika Samoa, Vanuatu, Fiti ma Solomona i le isi poll, ma ua fa’amoemoe o se ‘au e manumalo mai i le poll lea, e aga’i atu e ta’aalo ma ‘au a le Pasefika o loo fa’atali mai i le isi poll e aofia ai Niu Sila ma Tahiti, o ni isi o ‘au malolosi o le ta’amilosaga.

Na taua e ni isi o matua lagona le fiafia ma le fa’asea, ona o le le tonu o le auala na filifilia ai tama’ita’i e malaga i le au fili a Amerika Samoa.

E fa’avae lagona fa’asea ma le le fiafia o ni isi o matua, ona ua tele masina ma aso o pologa ma tigaina a latou fanau i koleniga a le ‘au, ae oo atu i le vaiaso mulimuli o le a sauni le ‘au e malaga, ae faia loa le fa’aiuga e taofi ai nisi o tama’ita’i mai Amerika Samoa nei e to’a 6 ua leva ona koleni, ae tu’u le fa’amuamua i tama’ita’i Amerika Samoa mai Amerika lea na fa’atoa taunu’u mai i le vaiaso na te’a nei mo le ‘au fili a le atunu’u.

“O le itu e tiga ai lo’u loto, ua tele masina o pologa la’u tama i koleniga a le ‘au, e usu mai le faiaoga e piki atu la’u tama i le 5:00 i le vaveao, ae fa’atoa momoli mai i le 7:00 i le afiafi i aso uma, e le aoga la’u tama i se feau a le matou aiga, ae alu uma lona taimi i koleniga a le ‘au, e tigaina ma pologa, a o lea ua oo i le aso mulimuli ae ave le fa’amuamua i tama’ita’i mai Amerika e le i koleni,” o le fa’asea lea a se tasi o Tina.

Na taua e le Tina le faigata o lona vaai atu isi ana tama ua foliga fa’anoanoa, tagi ma ua pei o se tagata ua leai se fa’amoemoe, ina ua ia maua le tala e le lavea o ia i le ‘au fili a tama’ita’i mo Fiti.

“Afai na iloa e le Asosi Soka a Amerika Samoa (FFAS) e le pikia la’u tama ma isi tama’ita’i e to’a 6 lea ua nonofo, aisea na latou fa’atigaina ai i latou i koleniga i nei masina e tele, ae le fa’atalitali pea se’i vagana ua oo mai tama’ita’i mai Amerika ona fa’atoa tu’u lea i ai o le avanoa e koleni ai.”

Na teena e se sui o le FFAS tu’uaiga fa’apea ua mafua ona nonofo tama’ita’i e to’a 6 sa auai i koleniga ona ua tuu le avanoa i tama’ita’i mai fafo e malaga ai i le ‘au fili a tama’ita’i.

Na taua e Sandra Fruean e fa’apea, o le ‘au lea ua malaga atu nei mo Fiti, sa fili mai i tama’ita’i mai Amerika na malaga mai i le vaiaso na te’a nei, atoa ai ma tama’ita’i sa koleni i Amerika Samoa nei.

“E le i faia to’atasia e se tagata poo se faiaoga le filifiliga o le ‘au, na fili uma lava e faiaoga uma ma i latou na auai i le koleniina o le ‘au, sa maimoa ai fo’i ni isi o matua i koleniga ma le ta’aloga sa faia e fili mai ai le ‘au fili a tama’ita’i. O i latou ua filifilia, o i latou ia sa maualuga ma maoa’e lo latou silafia i le fa’atinoina o le ta’aloga, e lei faia i se auala fa’aitu’au pe faailoga tagata,” o le saunoaga lea a Fruean.

Na taua atili e Fruean e fa’apea, o tama’ita’i mai fafo ua filifilia i le ‘au, o tama’ita’i na soifua a’e i Amerika Samoa nei, ae o lo o aooga i latou i Amerika, o lea fo’i ua maua lo latou avanoa e malaga mai ai e fai ma sui o Amerika Samoa i ta’aloga a le Pasefika.

O le itula e 10:00 i le taeao ananafi na tuua ai e le ‘au le atunu’u mo Samoa. A mae’a le latou ta’aloga fa’avevela ma le ‘au fili a tama’ita’i a Samoa, ona malaga atu ai loa lea i Fiti mo le ta’amilosaga ua tu’upoina mo le vaiaso fou.