Faasea le Faipule mai Itumalo o Saole i le ripoti a le ‘nusipepa’

Pago Pago, AMERIKA SAMOA

Na fa’aalia e le afioga i le ali’i Faipule mai le Itumalo o Saole ia Titiali’i Kitara Vaiau lona le fiafia tele i se ripoti sa faasalalauina i luga o le ‘nusipepa’ i le vaiaso na te’a nei, lea ua mafua ai ona tele faamatalaga le manuia a nisi o le atunu’u ua faia faasaga ia te ia i luga o upega o fesootaiga (Facebook).

“E le matagofie upu ma tala mamafa na lafo e tagata ia te a’u i luga o le Facebook, o ni faaupuga ua ova le le mafaufau ma le faalumaluma aiga” o le saunoaga lea a Titiali’i i luma o le Maota i lona si’ufofoga maualuga ma le malosi. 

Sa ia taua e faapea, na te lei iloa ni faamatalaga sa faia faasaga ia te ia, ae o lana fanau o lo o aumau i fafo na telefoni mai ia te ia ma faailoa mai faaupuga o loo lafo e le atunu’u.

Na faliu Titiali’i i le itu o lo o nofo atu ai le sui o le Samoa News, ona ia ia saunoa lea e faapea, “E tatau ona outou fiafia i le avanoa o lo o outou maua e mafai ai ona faataga outou e ulufale mai i totonu o le Maota ma faalogologo i taimi o felafolafoaiga ma Tauaofiaga a le Maota, ae o le mea moni lava ia e le faatagaina lea tulaga lea.”

“O la’u fautuaga ia te oe le sui o le nusipepa, tusi i lalo na o mataupu taua e saunoa i ai afioga i Faipule, ae aua le tusia uma i lalo le mau gasu.”

Na toe fo’i e le afioga a Titiali’i e faapea, o le mafua’aga fo’i lea na tula’i ai le Faipule mai Aua (afioga Faimealelei Anthony Fu’e Allen) ma faasea i se tasi aso, ona o mataupu na sau i luga o le nusipepa e faatatau ia te ia.

Ina ua mae’a le Tauaofiaga a le Maota o Sui i le aso lea, na maua ai le avanoa e fesiligia ai e le Samoa News le afioga ia Titiali’i i le mafua’aga ua ia tu’uaia ai le ripoti a le Samoa News, o le mafua’aga lea o le soona lalafo o tagata o le atunu’u o tala mataga faasaga ia te ia i luga o le Facebook.

Ina ua fesiligia Titiali’i pe i ai se vaega o le ripoti a le Samoa News na sese, na saunoa le ali’i Faipule, e leai se vaega o le ripoti o faaletonu. Pau le itu na ia faasea ai, o le ripoti a le  Samoa News lea na mafua ai ona tele tala mataga ma le le mafaufau na fai e le tagata lautele faasaga ia te ia. 

O le vaiaso i ona tua atu na faailoa ai e Titialii i luma o le Maota o Sui lona finagalo mo se avanoa e si’i ai totogi o Senatoa ma Faipule a le Fono Faitulafono. I lona talitonuga, e le o lava ma talafeagai totogi o lo o i ai nei e faatino ai galuega e moomia e Senatoa ma Faipule i totonu o le Ofisa e aofia ai ma le faatauina o mea e mana’omia e faatino ai a latou galuega.

Na taua e Titiali’i e faapea, ua silia ma le 2 tausaga talu ona tatala i lalo le Maota Fono a le atunu’u, ma ua leai ai ma ni Ofisa e fa’atino ai galuega a Senatoa ma Faipule. Ae a sii totogi, ona maua lea o se vaega tupe faaopoopo e faatau ai laulau, kesi, nofoa, ma ni telefoni e fa’aaoga i totonu o Ofisa.

E oo lava fo’i i le meaalofa e $10,000 mai le malo lea na faameaalofa atu mo afioga i Senatoa ma Faipule i le tausaga na te’a nei, e talitonu le afioga i le ali’i Faipule mai Saole, e le taitai lava lea vaega tupe e faatino ai manaoga. 

“O tatou o sui o le Fono Faitulafono o loo fausiaina tulafono mo le manuia o le malo, a o lenei e laiti o tatou totogi. E o’o lava i le faatupeina o Ofisa mo Senatoa ma Faipule e le lava. E leai ni laulau, leai ni kesi, o ni nofoa, e oo lava fo’i i telefoni e fa’aaoga i galuega a Senatoa ma Faipule o lo o i ai.”

O le mataupu i le si’i o totogi o Senatoa ma Faipule, e le o se mataupu fou i totonu o le Fono Faitulafono a Amerika Samoa. I nai tausaga ua mavae atu, na faaulu ai e le Maota o Sui se tulafono e si’i ai totogi o Senatoa ma Faipule i le Nofoaiga lona 35 a le Fono Faitulafono.

E 13-4 le palota na pasia ai e le Maota o Sui le latou pili peita’i e lei faia i ai se faaiuga a le Senate, ma taoto ai lava le Pili i le Komiti seia oo ina tapunia lea nofoaiga. O nisi o Faipule sa to’afa i ai sui na palota leai i le pili e aofia ai le afioga a Larry Sanitoa ma le afioga a Vailoata E. Amituana’i, lea o lo o la nofoia pea nofoa a laua itumalo i le nofoaiga lona 37 lenei o lo o nofoia i le taimi nei.

I lalo o le Tulafono, e $30,000 totogi o le Peresetene o le Senate ma le Fofoga Fetalai o le Maota o Sui, ae $25,000 totogi o Senatoa ma Faipoule. O le Faipule o Swains e $20,000 lona totogi i le tausaga. 

E ese mai i totogi o Senatoa o Faipule, e i ai fo’i a latou alauni ua mae’a ona pasia faaletulafono. E $40,000 le Peresetene o le Senate ma le Fofoga Fetalai, ae $30,000 Senatoa ma Faipule.

I le masina na te’a nei, na fesiligia ai e Faipule le Teutupe a le malo, le Tofa i le Tootoo ia Malemo Tausaga, i le mafuaaga e tipi ese ai saofaga mai alauni a le Fono. Na taua e le afioga i le ali’i Faipule ia Vailiuama Steve Leasiolagi, e le talafeagai le masani lea ua tele tausaga o ona maitauina, o le aveese mai lea o saofaiga o le lafoga (FICA) ma le Medicare mai tupe o alauni a Senatoa ma Faipule.

I lona talitonuga, o tupe o alauni e le o ni totogi poo ni tupe na maua mai i ni galuega faatino, ae o faamanuiaga lava ua mae’a ona faatulafono. Na talosaga Vailiuama i le Teutupe a le malo e toe silasila toto’a i le mataupu i alauni, ona ua tele tausaga o ona maitauina pea lea faaletonu.

Na lagolagoina e le afioga i le ali’i Faipule mai le Itumalo o Vaifanuatele ia Lavea Fatulegaee P. Mauga le finagalo o Vailiuama. Na taua e Lavea e faapea, i lona talitonuga, e le tatau ona tipi ese mai lafoga ma le medicare i tupe o alauni a le Fono.

Na talosagaina e le Fofoga Fetalai ia Savali Talavou Ale afioga i Faipule ina ia silasila toto’a i ituaiga mataupu e fesiligia ai molimau a le malo, ina ne’i maitau mai molimau a le malo e le o malamalama afioga i Faipule i le Tulafono. Na faailoa e Savali i Faipule, o latou e fausiaina tulafono e tatau fo’i la ona latou malamalama i le tulafono.

Mo le mataupu i lafoga ma le medicare lea o lo’o tipi ese mai i tupe o alauni a le Fono, na faamanino e Savali e faapea, e tatau lava ona faatino tulaga o tulafono a le malo feterale. E le gata i lea, o se tualga taua fo’i lea ma lelei mo Faipule, e tele ai tupe latou te agavaa ai pe a tali a latou saogalemu, ona o lea ua tu’u faatasi o latou totogi ma tupe o a latou alauni.

E i ai nisi o Faipule sa latou faailoa i le Samoa News, latou te lagolagoina le tipi ese mai o lafoga ma le medicare mai a latou alauni, ona o lo o fesoasoani i tupe o penefiti o le saogalemu pe afai ae oo i le taimi e agava’a ai i latou.