FA’ASALALAUGA FA’ALAUA’ITELE MO LE SILAFIA E LE MAMAMLU O LE ATUNU’U

Pago Pago, AMERIKA SAMOA

Aso Lulu, Mati 17, 2021

PAGO PAGO, Amerika Samoa - Sa fa’ataunu’uina se fonotaga a le Komiti Fa’afoe o le KOVITI-19 ia Mati 15, 2021 i le Matagaluega o le Puipuiga o le Saogalemu Fa’alotoifale o le Atunu’u. O lenei fonotaga, sa saunoa ai le Ta’ita’I komiti le Afioga I le Kovana Lutena aua le tapenaga o le malaga lona tolu mo Aperila.  O lenei fo’I fonotaga sa fa’aalia ai manatu aua le fa’alelei atili o le tapenapenaga o le malaga lona tolu ia Aperila.

Na saunoa le I le saunoaga a le Afioga i le Kovana Lutena Talauega Ale, o le Ta’ita’ifono o le Komiti Fa’afoe o le KOVITI-19, na ia ta’ua ai sa iai ni mea itiiti e tatau ona toe taga’i i ai. Sa iai foi se fa’asiliga o le lelei ona sauniuni i le aumaia o pasese ma faaoo atu i le nofoaga o le a  faanofoesea ai le mamalu o le pasese mo se taimi pu’upu’u.  E faafetaia ai le galulue faatasi o Matagaluega Ta’itasi o le Malo, le lagolago mai a vaega tuma’oti, ma le tatalo a le atunuu atoa. 

Na ta’ua foi e le Afioga a Talauega sa aveese mai e le Ofisa o le Tiute nisi o uta a pasese e taga’i i ai ma iloilo.  O lana saunoaga, e le ma’alofia lea tulaga ona e faatagaina le vaega faamalosi tulafono e faaauau o latou tiute mo le puipuiga o le mamalu lautele.  

O le aofa’i o pasese i le malaga lona lua e 188.  Ua ripotia mai e le Susuga Dr. Aifili Tufa o le Matagaluega o le Soifua Maloloina, ua mae’a ona faia suega o le KOVITI-19 a le aumalaga i le Aso Faraile, Mati 12, ma o i’uga o ia suega uma, e MAMA (NEGATIVE).  Na tatala le avanoa mo aiga i le Aso Toona’i, Mati 13 e faaoo atu ai faamomoli mo aiga/ ‘aumalaga.  O le suega lona lua ma o le suega mulimuli foi lea ua faatulaga i le Aso Faraile, Mati 19.  E mafai ona fa’ao’o faamomoli i aiga mai le Aso Gafua - Aso Toonai (2:00 pm - 5:00 pm), Aso Sa (11:00 am - 3:00 pm).  Ua faatulaga e tatala mai le fa’anofoesea i le Aso Gafua, Mati 22.  

Tala i Tuipuipui Vaccination Updates

I le faitauga o Mati 14, 2021, ua 47.4% o tagata o le atunuu e agavaa mo le tuipuipui ua mae’a ona tuipuipuia i se tuiga e tasi pe lua.  Mai lea aofa’iga, e 32.1% o tagata agavaa mo le tui ua ta’i-2 tuiga.  Ua tumau ai pea Amerika Samoa i le tulaga aupito maualuga o setete ma teritori o le Iunaite Setete atoa ua tuipuipuia.

Ua fa’aalia i fa’amaumauga a le Matagaluega o le Soifua Maloloina, o loo mafuli le to’atele o i latou ua tuipuipuia i le vasega o tagata matutua: 41 – 50 tausaga; 51 – 60 tausaga; ma le 61 aga’i i luga. I le tuufaatasiga o ia vaega ta’itasi e tolu, ua silia i le 60% lo latou faitau aofa’i o e agavaa ua mae’a tuiga muamua.  E 39.7% o le vasega 41-50 tausaga, 41.2% o le  51-60 tausaga, ma le 50.8% o le 61 aga’i i luga ua atoa tuiga (ta’ilua). O se tala fiafia lenei pe a manatu i le maualuga o le lamatia o tagata matutua i le gasegase matuiā o le KOVITI -19.

O le faai’uga o le vaiaso na te’a nei na mae’a ai le taumafaiga muamua o tuipuipui e faia i taavale i le malae va’alele i Tafuna, ma e to’atele na toe fa’apa’i fiafia mai i lea taumafaiga.  O loo fa’atulaga e le DOH se isi tuiga i taavale mo le masina a sau nei.  O loo faaauau pea e le Matagaluea le faia o tuipuipui o le lautele i le Maota o Lee i le vaiaso nei (Mati 15 – 19, Aso Gafua, Aso Lulu, ma le Aso Faraile), 8 i le taeao - 3 i le aoauli.  E fautua atu le Matagaluega ia aumaia se pepa faailoa, e iai se ata ma le pepa o le falema’i, ma afai o le tui lona lua, aumai le pepa o le tuiga muamua. Mo tuipuipui i taavale, faamolemole valaau le Nofoaga Faatonu o le DOH i le 219 poo le 633-5871 e resitala ai.

Malaga Toe Taliu Mai o Aperila 15 (April 15th Repatriation Flight)

Ua mautu nei le malaga lona tolu o le toe taliu mai i le Aso Tofi, Aperila 15.  O loo fuafua se aumalaga e tusa ma le 200 i le 220 le aofa’i e pei ona fautuaina e le Matagaluega o le Soifua Maloloina.  Mo le fa’atumau o faigamalaga i le lumana’i mo le toe taliu mai i fanua, ua faamalosia e le Komiti Fa’afoe o le KOVITI-19 le totogi muamua o le vaega a le tagata malaga e le aofia i le tau e totogi e le porokalama a le Medicaid ma le LBJ.  Na’o le to’asefulu tagata o le malaga muamua ma le lua ua mae’a ona totogi o latou pasese, e ui ina sa latou sainia se maliliega ma le  ta’utinoga o le a totogi.

O le a feiloa’i nisi o le Vaega Galulue i le vaiaso nei e fa’atalanoa se faiga e totogi ai pasese e toe taliu mai e le o aofia i polokalama a le Medicaid ma le LBJ ina ia mafai ona fa’ata’atia ni a latou fuafuaga o peimeni ma malaga ae le’i resitala i le nofoaga o le fa’anofoesea i Honolulu. O le a fa’asalalau atu ia auiliiliga pe a mautu.

O loo fa’agasolo foi se fa’atatau e fa’afaigofie ai mo nai pasese e faamamā toto mo le malaga ia Aperila. Ona o popolega o le mamalu o le atunu’u o lo’o faimalaga mai, e le mafai ona fa’atinoina togafitiga mo i latou la fa’anofoesea i se taimi umi I Samoa ma Hawaii.

O le Fa’aaoga tatauina o Faigamalaga Fa’apitoa 

Ua ripotia se taumafaiga lē amiotonu o nisi pasese na malaga ese atu i vaa togipau a le Medicaid mo nisi mafuaaga e le o ni gasegase.  Ua tau sa’ili auala e ‘alo’ese ai mai aiaiga ma fa’agasologa ae toe foi mai i malaga fuafua mo tagatanuu ua leva ona toe fia foi mai.  Ua fautuaina e le Komiti Fa’afoe ole KOVITI-19 le mamalu o le atunu’u e tuu le avanoa mo i latou o loo iai mana’oga ogaoga e fia foi mai ai.

Ua taunuu mai i le Ofisa o le Kovana, Matagaluega Soifua Maloloina, ma sui autu o le Komiti Fa’aoe o le KOVITI-19 le mau valaau, imeli, ma le oo mai o nisi o aiga i masina ta’itasi talu ona amata ia Fepuari malaga toe taliu mai. E toe fa’amanatu atu e le Komiti Fa’afoe, o talosaga e ave i le Ofisa o le Kovana e le fa’amautinoaina ai pe faasili a’e ai le avanoa o se nofoa i le vaalele toe taliu mai ona o le tapulaa o le aofa’i o nofoa i malaga ta’itasi.

E tatau lava ona fai le tiute patino o tagata malaga e resitala i le aupega-tafa’ilagi(website) a le Matagaluega o le Soifua Maloloina i le:  https://americansamoapublichealth.com/ ma ia fa’amautinoa ua tuu fa’atekonolosi pepa malaga ma pepa nofomau i le faamalama a le Ofisa o le Loia Sili: https://www.legalaffairs.as.gov/repatriation-document-upload ina ia iloa ai pe agavaa i le faitauga o tagata e toe taliu mai.

I le ma lea, e aafia le faatumau o malaga toe taliu mai pe a faaauau le lē totogia o pasese o e malaga mai.  Ua talosagaina ma le faamaulalo tagata sa malaga mai ia Fepuari ma Mati e le i totogia o latou pasese, ia oo mai poo se isi o lou aiga na te faia.  E mafai ona faatulaga peimeni i le Ofisa Medicaid i le 684-699-4777 i se vave e mafai ona oo i ai.