Fa’asala i le Toese Tina talavou na maua i ai fualaau faasainaa

E 6 masina i le Toese i Tafuna lea ua fa’asala ai e le Fa’amasinoga Maualuga se Tina talavou ina ua ta’usala o ia i le solitulafono o lona umia faasolitulafono o vaega o le pauta faasaina o le aisa, atoa ai ma le moliaga mamafa o le gaoi.

O le vaiaso na te’a nei na tula’i ai Julie Uiese i luma o le Faamasinoga mo le tuuina atu o lana faaiuga. Na tatala lava i tua Uiese ina ua ia totogi le $10,000 sa faatulaga e le Faamasinoga, e faatali ai taualumaga o lana mataupu.

E 2 tagi a le malo na ulua’i tu’uaia ai le ua molia. I le tagi muamua, na molia ai o ia i le moliaga o le umia faasolitulafono o le pauta faasaina o le aisa, faapea ai ma le moliaga o lona umia faasolitulafono o vaega o le laau faasaina o le mariuana.

I le tali lona lua, sa tuuaia ai le ua molia i le moliaga o le gaoi, atoa ai ma le moliaga e tasi o le faia o faamaumauga tau faasese.

Ae i lalo o le maliliega na sainia e Uiese, lea fo’i na talia e le Fa’amasinoga Maualuga, na malie ai le ua molia e tali ioe i le moliaga muamua na toe teuteu e le malo, le moliaga o le umia faasolitulafono o vaega o le pauta faasaina o le aisa, faapea ai ma le moliaga o le gaoi.

I le tali ioe ai o Uiese, sa ia ta’utino ai e faapea, i se taimi o le aso 29 o Iuni 2019, na maua ai e Leoleo fualaau faasaina ia te ia, a o pisi ai Leoleo e tau saili se ta’avale mautotogi sa ia aumaia mai se Kamupani Car Rental i Tafuna.

Na ta’utino atili le ua molia e faapea, na alu ma aumai se ta’avale mautotogi mai se Kamupani Car Rental mo le umi e 2 aso, ona toe faafo’i lea. E silia i le vaiaso o ia faaaogaina le ta’avale mautotogi e aunoa ma le toe faafo’i i le Kamupani, o le mafua’aga lea na ia sola sola ese ai mai le Pulega o le Kamupani Car Rental.

Ae na avea le aga’i atu o Leoleo e saili le ta’avale ma itu na maua ai ma fualaau fa’asaina ia te ia, ma molia ai loa o ia e le malo i lenei mataupu.

Ina ua maua le avanoa o Uiese mai le Fa’amasinoga, sa ia faatoese ai loa e tusa ai o lana solitulafono sa faia, ma ia talosagaina ai se isi avanoa mo ia e faaauau ai pea ona mafuta i lana fanau laiti. Na faatoese fo’i le ua molia i le Tamaitai Pule o le Kamupani Car Retal na aafia i lana solitulafono, ina ia faamagalo sona sese.

Na talosaga le alii Loia Fautua lagolago ia Rob McNeill na tula’i mo Uiese mo se faasalaga faanofovaavaaia mo le ua molia, ina ia maua ai le avanoa e mafuta ai pea o ia e tausi lana fanau laiti e to’alua.

Na faailoa e McNeill, o lo o taofia fo’i i le Toese le toalua a Uiese mo le tuliina o sana faasalaga umi, e mafua mai i ni solitulafono matuia na ta’usala ai o ia e le Fa’amasinoga.

Na faailoa e McNeill e faapea, afai ae tuuina atu e le Fa’amasinoga se faasalaga faa falepuipui ia Uiese, o le a leai se isi na te tausia lana fanau laiti e to’alua. Saunoa McNeill e fa’apea, o fualaau faasaina na maua ia Uiese, sa faamoemoe e fa’aaoga mo ia lava. E oo fo’i i le ta’avale mautotogi lea na ia faaaogaina, na taua e McNeill le mana’omia e le ua molia o se ta’avale e fa’atino ai fuafuaga mo ia ma lona aiga, e ui sa ia iloa lelei, e le sa’o le auala na ia faaaogaina ai le ta’avale.

Na lagolago e le loia a le malo ia Doug Lowe le talosaga a le itu tete’e mo se fa’asalaga faanofovaavaaia, ina ia aofia ai ma le tuutuuga o le tuli lea e le ua molia o se faasalaga faa falepuipui i le Toese i Tafuna.

Peita’i e manatu le malo, o le solitulafono o le umia o fualaau faasaina, o se tasi lenei o faafitauli ua numera tasi ia Amerika Samoa, ma ua to’atele fo’i i latou o lo o tuli a latou faasalaga i le Toese i Tafuna, e mafua mai ina ua faamaonia lo latou solia o lenei tulafono.

Na talosaga Lowe ina ia faasala Uiese i se faasalaga faa falepuipui mama, ina ia mafai ai ona aoaoina lona mafaufau mai mea sese sa ia faia.

Na taua e le Fa’amasinoga e faapea, na aafia muamua Uiese i le Tulafono i le 2 tausaga talu ai, ina ua maua e Leoleo fualaau faasaina i totonu o se ta’avale sa la fai malaga ai ma se isi fo’i Tama’ita’i, peita’i na sao mai Uiese mai lea mataupu, ina ua le mafai e le malo ona faamaonia le i ai o se fesootaiga a Uiese ma fualaau faasaina sa maua i totonu o le ta’avale.

Na toe faatepa e le Faamasinoga itu e lua i mau faamaonia o le mataupu e pei ona ta’usala ai Uiese.

Na taua e le Fa’amasinoga e fa’apea, a o pisi ai Leoleo e tau saili solo i vaega ta’itasi o le atunuu le ta’avale mautotogi lea na ave faagaoi e se tagata, na vaaia ai e Leoleo i se vaega o Futiga le ta’avale lea o lo o paka i tafatafa o se isi fo’i ta’avale i le taeao o le aso 29 o Iuni o le tausaga e 2019.

Na siaki e Leoleo le ta’avale ma iloa ai, o Uiese o lo o ia faafoeina le ta’avale mautotogi, ae o se alii talavou o lo o faafoeina le isi taavale lea o lo o tutu faatasima le ta’avale a Uiese. Ina ua faatonu e Leoleo ia Uiese latou te aga’i atu i le Ofisa o Leoleo i Tafuna mo le faatalatalanoaina o le mataupu e fa’atatau i le ta’avale mautotogi na ave faagaoi, na talosaga ai loa Uiese i Leoleo mo se avanoa e avatu ai le ato o loo i totonu o lana ta’avale i le ta’avale a le alii talavou sa la talanoa.

Na siaki e Leoleo le ato na ave e Uiese i le alii talavou lea ma iloa ai, o lo o i ai vaega o fualaau fa’asaina o le aisa ma le mariuana. Na faailoa e le alii Talavou lea i Leoleo, o Uiese e ana le ato sa maua i ai fualaau fa’asaina.

E 5 tausaga na manatu le Fa’amasinoga e tafoai ai Uiese i le Toese, peita’i ua faamalumalu lona tuliina o lea faasalaga, ae ua nofovaavaaia o ia mo le 5 tausaga i lalo o tuutuuga e ao ona usita’i i ai.

O nisi o ia tuutuuga e aofia ai lona tuliina o masina e 20 e aunoa ma le tatalaina o ia i tua, peita’i ua manatu le Fa’amasinoga, ua lava masina e 6 e tuli e Uiese, ae faamalumalu le 14 masina o lo o totoe ai.

Ua poloaina fo’i le ua molia na te totogi le salatupe e $5,000, ma aua ne’i ona toe umia pe fa’aaogaina fualaau fa’asaina.