Faapopoleina taitai soifua maloloina i le filifiliga o RFK Jr.

SAMOA

Ua ripotia mai e vaega fa’asalalau i le lalolagi atoa, le iai o se faapopolega i taitai o matagaluega ma ofisa ‘ese’ese o le soifua maloloina, i a’afiaga e ono tula’i mai, pe afai ae taunu’u ona filifilia o Robert F. Kennedy Jr., e avea ma fa’auluuluga o le Matagaluega o le Soifua Maloloina, talu ai ona o ia o se tagata, e le talitonu i le aoga o tui puipuia.

E o’o lava foi i nisi o taitai mai Samoa, ua o latou fa’aleoina lo latou atugalu tele, talu ai nisi o saunoaga faalele a Kennedy i tausaga ua tuanai, e faatatau ia Samoa.

Afai ae pasia le tofiga fou a Kennedy, o le a faapea ona ia pulea le matagaluega pito sili ona tele i le lalolagi atoa, e gafa ma auaunaga tau i le soifua maloloina, ma lana paketi e $1.7 tiriliona.

O lenei matagaluega e matua’i tele lava ma e gafa ma le fa’atautaiga o inisiua o le soifua maloloina, mo tagata e toatele i Amerika, e aofia e ua matitiva, le atoatoa le malosi o le tino faapea ma tama ma tina matutua. 

O lenei foi matagaluega e mataituina su’esu’ega uma mo tui puipuia, o faama’i ma o latou fofo.  Aemaise ai le mataituina o vailaau ma fualaau o lo’o fa’aaogaina e tagata lautele, atoa ai ma taumafa.

Na saunoa le alii polofesa, le afioga Aiono Alec Ekeroma, le faatonusili o le matagaluega o le soifua maloloina lautele mo Samoa, e ono avea Kennedy ma malosiaga i se taumafaiga a le toatele o le lalolagi atoa, e taofia ia tui puipuia, ae le gata i lea, e mafai foi ona ia fa’aitiitia vaegatupe e tufatufaina atu i ofisa eseese o le soifua maloloina.

Ma sa le ‘alo faamatalaga a Aiono i lona faapea mai, o le a pa’u i luga o Kennedy le maliliu o le faitau afe o fanau iti i le lalolagi atoa, ona o le ia faatagaina le sosolo o faama’i pepesi.

Sa tomanatu Aiono i le faama’i o le misela lea na pisia i le 2019 i motu o le Pasefika.  Mai i le to’a 200,000 tagata o Samoa, na a’afia ai tagata e to’a 5,700 ae maliliu ai le to’a 83, ma o le toatele o i latou na maliliu, o fanau iti.  Sa faatumulia totonu o falemai ma i’u ai ina fa’aleoina se Setete o Faalavelave Fa’afuasei.

Ina ia fofoina e Samoa lenei faama’i, sa faapea ona agai atu ai tagata faigaluega o le ofisa o le soifua maloloina, ma faia uma tui puipuia mo tagata uma o le atunu’u e le’i faia ni a latou tui puipui.  O aiga ia, na faatonuina e tautau ni fu’a lanu mumu i fafo o latou maota ma laoa.

I le fa masina ae e le’i pepesi le misela, na asiasi atu ai Kennedy i Samoa ma na fetaui ai ma tagata e tete’e i tui puipuia.  Ma sa ia ta’ua foi e faapea, o le faama’i lea na pepesi i Samoa, e ‘mild’ pe le o se tulaga ogaoga.

Na fa’aalia e Aiono e faapea, o se tasi o lesona na aoaoina mai e Samoa i lea faalavelave, o le toalaiti o tagata o lo’o faia a latou tui puipuia ma o se tulaga e ono a’afia tele ai le atunu’u.

O le faapopolega i taitai o le soifua maloloina o le lalolagi, i le filifiliga o Kennedy e na te fa’atautaia le Matagaluega o Tautua o le Soifua Maloloina ma Tagata Lautele, o le a a’afia ai le toatele, talu ai le mata’i e atunu’u uma o le lalolagi ia le malo o Amerika, i ana galuega fai ma auaunaga.

Ua loa ona fesiligia e Kennedy ia ofisa feterale sa mataituina le gaosia ma le puipuiga o tui puipuia, ma ia u’una’ia ia faamatalaga tau faaleaga ma faasagatau i tui puipuia ma sa ia lu’itauina foi ia tui puipuia o lo’o fautuaina mai e le CDC, e ao ona fa’aaogaina i fanau iti.

Sa fa’avaeina foi e Kennedy ma o lo’o avea nei o ia ma Taitaifono o se tasi o faalapotopotoga ta’uta’ua i totonu o Amerika, e faasagatau i tui puipuia (Children’s Health Defense).

O se vaitaimi ua te’a atu, na fa’ailoa atu ai e le so’oupu a Kennedy i le ‘Washington Post’, le le fa’atu’i’ese o Kennedy i tui puipuia, ma sa faapea foi ona saunoa Kennedy i le amataga o lenei masina, e na te le ave’esea ni tui puipuia mai i so’o se tasi.

Ae o le a fa’aauau pea ona faia a latou su’esu’ega ma fa’ailoa atu i tagata ina ia mafai ona faia ni a latou filifiliga tonu ma le sa’o.