Faapaiaina fale a’oga ma se fale ta’alo fou i Aunu’u

Pago Pago - AMERIKA SAMOA

 O le vaiaso ua mavae, na faimalaga atu ai le afioga i le Kovana ia Lemanu P.S. Mauga ma le faletua ia Ella, o sui o le Maota Fono ma le kapeneta, i le motu o Aunu’u, aua le umusaina po o le faapa’iaina  o se falea’oga ma se fale ta’alo fou, a le aoga tulaga muamua a A.P. Lutali.

O le tamaitai pulea’oga ia Fa’aofia Siamu-Pulu sa na fa’afeiloaiina le mamalu o malo fa’aaloalogia ma le au vala’aulia ma ia faaleoina ai lona agaga fa’afetai ona o lenei faamoemoe ua leva ona o moemiti iai, lea ua taunu’u.

O le susuga i le Faafeagaiga ia Samuelu Tuilaepa o le Ekalesia Faapotopotoga Kerisiano a Amerika Samoa (EFKAS) i Aunu’u, sa taitaiina le sauniga faaleagaga mo le aso ma na ia faamamafaina ai le taua o le galue, e pei ona sa ia saunoa ai, na sau Iesu i lenei lalolagi ina ia galuega.  E na te le’i faamaumauina se taimi e talanoa ai, ae na galuega ina ia o tatou maua le ola e faavavau.

Sa faaleoina foi e le susuga i le Faafeagaiga lona agaga faafetai i le faigamalo, ona ua le na’o na talanoaina o lenei galuega, ae o lona fa’amae’aina.  I le faaiuga o lana lauga, sa faaleoina ai e le susuga ia Rev. Tuilaepa se fesili e faapea, O ai le faigamalo?  Ona ia toe tali lea e faapea, o tatou o le faigamalo ae o le Atua o le tatou taitai.

I lana lauga faapitoa, na saunoa ai le afioga i le Kovana ia Lemanu, e faapea, “O le upu moni a ia, e le faagaloina Aunu’u .  O Aunu’u foi, o tatou i le tuugatala a Amerika Samoa.”

Sa saunoa Lemanu e faapea, “Ou te lagona o silasila mai le afioga ia Lutali, aemaise o tua’a, o lo’o patipatia lenei aso.  Aua o le afioga ia Kovana Lutali e ona upu ia, “e le o upu ma faamatalaga ae o galuega.”

Na ta’ua foi e le afioga i le Kovana le agaga faafetai i le susuga i le Faafeagaiga.  “Sa’o lelei le malelega.  O le faigamalo e le o a’u, e le o le kovana lutena, e le o faatonusili a’o le atunu’u.  Fuafuaga foi e fai, e le o ma’ua ae fai ona o le atunu’u.”

Sa ia saunoa i sona faamoemoega maualuga, o le a avea neif ale fou ma nofoaga o le a maua ai se a’oa’oga ma tausia ai alo ma fanau, o taitai ia o le lumana’i.

I le tala’aga o le galuega, sa saunoa ai le tamaitai Faatonusili o le Matagaluega o Galuega Lautele (DPW) ia Faleosina Voigt, o le falea’oga fou, e lua ona fogafale, e aofia ai potu a’oga e fitu, o fale ta’ele e lua, o sitepu ma auala mo nofoa fa’ataavale.

Ae o le fale ta’alo, e 170 futu i le 80 futu lona umi ma le lautele, e iai ma sona ‘stage’ e gaosi i le sima ma o le fale atoa, o lo’o fausia i u’amea, e aofia ai ma le taualuga.

O le tau atoa o lenei galuega, e $2.6 miliona.

I le faaiuga o le saunoaga a le tamaitai Faatonusili, sa faapea loa ona ia taua’aoina atu le tusi pasi o lenei galuega faamae’aina i le Faatonusili o le Ofisa o Aoga a le malo, le susuga ia Talauega Dr. Samasoni Asaeli.

I le talanoaina o lenei galuega, sa saunoa ai foi le pule o le kamupani a le 2E Corporation, le susuga ia Ma’aelopa Tuiasosopo, le tele o faigata sa feagai ma le latou kamupani ma le aufaigaluega, e aofia ai le la’uina mai o sapalai mo le fausiaina o le fale, mai i Tutuila.

Ae peitai, sa saunoa Tuiasosopo, e ui i nei faigata ma fita, ae o le fa’amanu ma le fa’afetai, e i le Atua ona ua mafai ona faamae’aina lenei galuega i Lona alofa, taitaiga ma Lana puipuiga.  Sa fa’aalia foi e Tuiasosopo lona agaga fa’afetai i le faigamalo mo le avanoa ua maua e lana kamupani e latou te faia ai lenei galuega.  

E le gata i lea, sa faaleoina foi e Tuiasosopo lona agaga fa’afetai i tagata o Aunu’u ona o le tausiga lelei o i latou a’o latou feagai ai ma le galuega.

O le afioga ia Fonoti Uluiva Simanu sa avea ma fofoga taumolimoli a le afioaga o Aunu’u ma sa ia faaleoina le agaga fa’afetai mo nei fale fou ua fausia i Aunu’u.  Sa ia faamamafaina ai lo latou lagolago malosi i le atina’eina o a’oa’oga a le fanau, aua o le lumanai lea o nu’u ma afioaga.

O le faletua a le alii kovana, ia Ella Mauga sa na ia taua’aoina le lipine e tatala aloaia ai le faleaoga ma le fale ta’alo a Aunu’u.