Faaopoopo pea le aofa’i o tagata aafia i le KOVITI-19

Talu ona pipisi le faama’i o le KOVITI-19 i soo se vaega o le atunu’u talu mai le aso 23 o Fepuari o le vaiaso na te’a nei, ua to’a 63 le aofa’i o tagatanu’u ua faamaonia le aafia i lenei vairusi.

E 10 tagata na faamaonia le aafia i suega sa faia i le aso Toona’i na te’a nei, Fepuari 26, ma siitia ai loa le numera i le 63 mai le 53 sa i ai i le aso Faraile o le vaiaso na te’a nei. 

E to’a 9 tagata na faamaonia le aafia i le fa’ama’i i suega sa faia e le Soifua Maloloina ma le to’atasi mai le Falema’i o le LBJ.

I le faaopoopo pea o le aofa’i o le atunu’u ua faamaonia le aafia i le siama o le faama’i oti o le KOVITI-19 talu ona faagasolo mai le poloaiga a le Kovana e tapunia ai le atunu’u mo le vaiaso atoa, lea na amata mai le vaeluaga o le po o le aso Gafua, Fepuari 21, 2022, ua lapataia ai pea le atunu’u atoa ina ia galulue faatasi e tausia le saogalemu o tagata uma e ala i le faaitiitia lea o le soona feoa’i atoa ai ma le fa’aaogaina pea o tali fofoga (mask) i soo se taimi e tuua ai le fale.

I le polokalame a le Vaega o loo gafa ma Puipuiga o le Faama’i o le KOVITI-19 (Task Force) faapea ai ma sui o le Matagaluega o le Soifua Maloloina o lo o faaauau pea ona faasalalau tu’u sa’o e le KVZK-TV i le vaiaso na te’a nei, o lo o fautuaina ai e Taitai o le atunu’u tagatanu’u uma o Amerika Samoa ina ia galulue e faaitiitia le pipisi o le faama’i e ala i le tausisi i ta’iala ua faatulaga mai mo le vaega o le Lanu Mumu (Code Red) e pei ona i ai le atunu’u i le taimi nei.

O i latou e to’a 63 ua faamaonia le aafia i le faama’i e aofia ai le to’a 1 mai Fagaalu; to’a 3 mai Fagasa; to’a 1 mai Failolo; to’a 1 mai Faleniu; to’a 6 mai Iliili; to’a 11 mai Leone; to’a 17 mai Nu’uuli; to’a 1 mai Pago Pago; to’a 1 mai Puapua; to’a 17 mai Tafuna; to’a 2 mai Vaitogi ma le to’a 2 mai Vatia.

O le fautuaga mo le atunu’u atoa, afai sa i ai se taimi na lua feiloa’i ai ma se tasi o i latou nei ua faamaonia le aafia i le faama’i, pe ua e faalogoina fo’i se suiga i lou soifua maloloina e aofia ai le vevela o le tino, tale, faigata ona manava, pe ua le manogi fo’i se mea’ai, ia vave faafesoota’i Falema’i Itumalo i Amouli, Leone poo Tafuna mo se suega faanatinati mo oe.

O lo o fautuaina fo’i le atunu’u ina ia tausisi i ta’iala ua mae’a ona tuuina atu e pei o le tausisia o le nonofo valavala mo le 6 futu, faaaoga le tali fofoga ma ia nofo i le fale pe afai e leai se manaoga faapitoa e ala ai ona tuua le aiga. 

Ua fautuaina fo’i matua ma le au matutua ina ia faafesootai le numera o le telefoni #219 poo le 633-5871 ma talanoa i se Foma’i pe afai e maitauina se suiga i le soifua maloloina o fanau laiti. Afai ua mae’a ona faia ou tui puipui, o le a leai se tulaga e atugalu ai pe afai ae maua oe i ‘auga e pei ona taua mo le 3 e oo atu i le 5 aso. Ae afai loa e tuana’i aso nei ae o lo o tumau pea ‘auga e pei ona taua, ona faafesootai loa lea o lala o le Falema’i mo se fautuaga mai se Foma’i.

O le taimi nei o loo taumafai pea le Soifua Maloloina e faasoasoa tui o lo o totoe mo le atunu’u, a o faatali ai le taunu’u mai o le isi sapalai fou i se taimi e le o toe mamao. 

“O le fautuaga malosi mo tagata uma lava ina ia puipuia lava e oe lou lava saogalemu atoa ai ma le saogalemu o lou aiga. Ia faaaoga le tali fofoga ma ia nofo i le fale,” o le fautuaga lea a le ali’i Foma’i ia Dr. Aifili J. Tufa, o le sui o le Matagaluega o le Soifua Maloloina.

E le i faataunuuina tui mo le Koviti lea sa fuafua e faataunuuina i le aso Faraile na te’a nei i nofoaga masani. I se faasilasilaga faanatinati a le Matagaluega o le Soifua Maloloina na tuuina mai i le po o le aso Tofi o le vaiaso nei, na taua ai le tapunia uma o nofoaga e faia ai tui, ae faatoa toe faataunuu i le taeao o le aso Toona’i na te’a nei i le malae vaalele i Tafuna, e ala i le fa’aaogaina o ta’avale.

E pei ona faamanino e sui o le Soifua Maloloina i se fonotaga ma le Au Faasalalau i le amataga o le vaiaso na te’a nei, o le vairusi (virus) o le Koviti lea na pipisi atu ma aafia ai se vaega o tagata lautele o le atunu’u, na mafua mai i se tagata faigaluega a le Matagaluega o le Soifua Maloloina, lea sa galue i le nofoaga na faanofoesea ai le pasese o le Hawaiian Air na malaga mai i le aso 27 o Ianuari, 2022.

O le tagata faigaluega lenei ma lona aiga na faia i ai se suega i le vaiaso na te’a nei na faamaonia ai le aafia uma o le aiga e to’a 7 i le vairusi.

E ui ua na o se vaega o le motu o Tutuila lea ua masalomia le aafia i le vairusi, e pei ona i ai le itu i Sisifo, o lo o i ai lava le talitonuga o le Soifua Maloloina e ono aafia lava le motu atoa o Tutuila pe afai e fa’aauau pea ona pipisi le vairusi lenei e mafua mai i tagata o lo o fegasoloa’i i lea taimi ma lea taimi.

LAGONA O LE ATUNU’U

O le to’atele o le atunu’u na lolofi atu i nofoaga sa masani ona faatino ai tui e pei o le Fale Taalo a le Aoga Maualuga a Samoana i Utulei, sa latou faaalia le faasea ma le le fiafia i le Soifua Maloloina, ona o le leai o se faailo poo se faasilasilaga e ta’u atu ai a latou suiga.

Na maitauina e le Samoa News i le aso Faraile na te’a nei le to’atele o tagata na laulaututu i luma o le Fale Taalo a o isi o lo o faatalitali i luma o potu aoga o le aoga a Samoana.

Na taua e se tasi o Tina matua, e silia i le itula talu ona latou faatalitali ma lana fanau e to’a 3 mo le taimi e amata ai tui, ae faateia loa i latou ina ua alu atu se Tama ma faailoa atu, ua le taunuu tui sa fuafuaina.

Na taua e le Tina i le Samoa News e faapea, sa tatau lava i le Soifua Maloloina ona tusia sa latou faasilasilaga ma tuu i luma o le pa o le Fale Taalo, e aga’i atu le atunuu ma vaavaai i ai, nai lo le faia o a latou faasalalauga i luga o le Facebook Page, ae le o tagata uma o le atunu’u e tofu ma ni Facebook.

Na taua atili e le Tina matua lea e faapea, e le avea lana fanau i tui o lo o faagasolo i Tafuna, ona o le itu lea o le atunu’u o lo o pesi ai le fa’ama’i, ae faatalitali lava i le vaiaso fou lenei e toe tatala ai le faagasoloina o tui i nofoaga eseese a aofia ai ma le Fale Taalo a le Aoga a Samoana.

Mo le malaga a le Hawaiian Air i le aso 17 o Fepuari na te’a nei, o le Aso Faraile, Fepuari 21 na tatalaina ai I tua I latou, ina ua mae’a suesuega lona lua ma faamaonia ai le ‘Negative’ uma o a latou suega po o tui o le Koviti 19.