Fa’aopoopo malaga a le Hawaiian Airlines, amata ia Me aso 17

Pago Pago - AMERIKA SAMOA

Ona o le manaoga o femalagaiga i le va o Honolulu ma Pago Pago, ua toe faaopoopo ai e le Hawaiian Airlines ni malaga faaopoopo se tolu - i po o Aso Lulu - mo le masina o Me, ma o lona uiga, ua vave amata le faigamalaga pisi o le taumafanafana mo le 2023.

O lo’o lipotia e fa’apea, o lo’o tumu malaga a le Hawaiian Airlines ma o le mafuaaga foi lea o le malaga o nisi e ui i Apia ina ia maua ai le malaga a le Fiji Airways mo Honolulu. 

I se fa’aaliga fa’alauaitele a le Hawaiian Airlines mai lona ofisa i le teritori, sa fa’alauiloa i le po o le Aso Lua, e fa'apea o le "manaomia o femalagaaiga i lenei masina" o lo'o fa'aopoopoina ai e le Hawaiian Airlines malaga e tolu i le po o le Aso Lulu ia Me 17, Me 24 ma Me 31.

O le taimi o le faigamalaga e tutusa ma malaga a le kamupani vaalele i vaiaso taitasi ile po o Aso Gafua ma Aso Tofi.

"O le vaitau o le taumafanafana 2023 na faʻaalia ai le amataga o le malaga faanatinati" ia Iuni 07, lea "o le a amata nei" ia Me 17 ma faaiʻu ia Aukuso 30, e tusa ai ma le fa’aaliga a le Hawaiian Airlines.

E tatala fa'ailoga siaki ai ato a le au malaga i le 4pm i le aoauli e oo atu i le 10:15pm i le ma e tatala le nofoaga e siaki ai le saogalemu mai le 8:30pm i le 10:30pm i po o vaalele.

Na faalauiloa e le kamupani vaalele ia Mati o le tausaga nei le malaga lona tolu i vaiaso taitasi i le Aso Lulu mo le pisi o masina o femalagaaiga i le taumafanafana e amata ia Iuni 07 e oo atu ia Aukuso 30. Ae peitai o lea o le a vave amata.

O le pisi o masina o femalagaiga i le taumafanafana i luga o le auala i Honolulu Pago Pago e mafua ona o tagata o le atunuu o loo agai atu i Amerika mo tafaoga ma aso malolo, ae o tagata Samoa ma isi o loo aumau i Amerika e malaga atu i le teritori - e faapea foi mo tafaoga ma asiasi aiga.

O tamaiti aʻoga faʻapitonuʻu o loʻo agai atu i kolisi ma iunivesite i Amerika o le a faʻatumauina foi femalagaiga o le taumafanafana.

O le kamupani vaalele a le Hawaiian Airlines i tausaga ua mavae na ia faia se malaga lona tolu i vaiaso taʻitasi i masina o le taumafanafana, ae o le faʻamaʻi o le COVID-19 i le lalolagi atoa, ua mafua ai le tapunia o tuaoi ua taofia ai isi malaga i le taumafanafana mo Pago Pago talu mai le tausaga 2020.

So'o se fesili fa'afeso'ota'i le ofisa o le Hawaiian Airlines i le 699-1875 po'o le 699-1876 ma itula faigaluega mai le 7am i le 3:30pm - Aso Gafua i le Aso Faraile.