Fa’aoolima i le to’alua, a’o matamata le fanau e to’atolu

Pago Pago - AMERIKA SAMOA

O se tasi o mataupu fou ua i luma o le Fa’amasinoga Itumalo, i le alualu pea i luga, o tamaloloa e fa’aoolima i o latou ta’itoalua, e aofia ai tuuaiga fa’asaga ia Dion Te’o, i le sauaina o lona to’alua a’o matamata le la fanau. 

E pei ona fa’ailoa i pepa tagi a le malo i luma o le fa’amasinoga, o lo’o tu’uaia Te’o i moliaga e lima o le faia o sauaga i lona aiga – tasi le moliaga o le fa’ao’olima i le tulaga tolu, tasi le moliaga o le fa’atupu vevesi i totonu o le aiga, ma le tolu moliaga o le faia o ni gaioiga e ono lamatia ai le soifua manuia o se tamaititi.

E $5,000 le tupe ua fa’atulaga e le fa’amasinoga mo Te’o e tatala ai i tua.

Fa’ailoa i le tagi a le malo e fa’apea, na fa’afesoota’i e se tama’ita’i le Ofisa o Leoleo i Tafuna (TPS) i le aso 16 Oketopa 2023, ma fa’ailoa ai le fa’ao’olima o lona to’alua ia te ia, lea na ia tu’i lona ulu ma ona foliga. Na tali atu Leoleo i le valaau i Nu’uuli.

Na faailoa e le fafine o ia lava na aafia, ma faailoa atu i leoleo le tulaga. Sa ia fa’ailoa i leoleo, o lona to’alua o lo o tu’uaia na fa’aoolima, sa i tua o le latou fale.

Sa fa’ailoa e le fafine na a’afia le latou fale ma ina ua taunu’u leoleo sa latou matauina ai le tamaloa i luma o le fale. Ona aga’i atu ai lea o leoleo uma e to’alua i le ua molia ma fesili i ai po o le a le mea na tupu, ma sa ia tali mai, e faapea sa tula’i mai se feeseeseaiga ma lona toalua. Ona taofia lea o Dion Te’o ma auina atu i le TPS mo nisi suesuega.

I le molimau a le tama’ita’i na a’afia o lo o taua ai e fa’apea, o lo o tu’uaia o ia e lona to’alua i le faia o se faiga uo ma se tasi o le aulotu. Fa’ailoa e le fafine i leoleo, e tatau ona ia auai i se sauniga i le lotu i le aso lava e tasi, ma ina ua ia toe foi i le fale, na amata ai e lana tane se finauga ma ia.

Ina ua tula’i mai le la finauga, na tu’uaia ai le le fiafia o lona to’alua ma tu’i lona ulu ma ona foliga e silia i le fa’afitu ona po.

E le gata i lea, o lo o taua fo’i e le tama’ita’i na a’afia e fa’apea, na fa’ao’olima lona to’alua ia te ia i totonu o le potu malolo a o matamata mai lana fanau e to’atolu ma molimauina le mea na tupu. Na taua fo’i e le tama’ita’i na a’afia e fa’apea, sa fa’afefe e lona to’alua o ia e fasioti ia te ia i le po na muamua atu, ae na mafai ona ia tamo’e i fafo o le fale ma lana telefoni e vili ai leoleo mo se fesoasoani.

Sa ofoina atu se fesoasoani faafomai i le tamaitai na aafia, ae sa musu o ia. Ina ua taunuu i le TPS, na faailoa atu e leoleo ia Dion Teʻo o ia lea na ioe na malamalama o ia i ana aia tatau ma na o se faamatalaga tautala sa ia faia i le TPS.

E tusa ai ma le faamatalaga a le ua molia, sa ia ta’ua ai o loo fai se mafutaga faaleulugalii a lona toalua ma se isi tamaloa ma ua na o se feeseeseaiga lava i le va o ia ma lona toalua. Na ta’utino fo’i le ua molia e fa’apea, i le taimi o le la misa, sa ia tu’i fa’alua ai le ulu o lona to’alua i se moto ma fa’amata’u e fasioti o ia i le po na muamua atu, o se mea ula. Na taofia loa Te’o i le toese i Tafuna se’i vagana ua tula’i i luma o le fa’amasinoga.