Fa’amuta fa’afuase’i galuega a Faipule ina ua gasegase Sui Fofoga Fetalai

Na fa’amuta fa’afuase’i galuega fa’atino a le maota o sui i le taeao ananafi, ina ua le atoatoa le malosi o le afioga i le Sui Fofoga Fetalai sa taitaia le maota, le afioga i le ali’i Faipule mai le Itumalo o Manu’a #1, Fetu Fetui Jr.

O le mae’a ai o le tauaofiaga a le maota mo le umi e le atoa se 10 minute i le taeao ananafi, na auina atu ai loa le sui fofoga fetalai i le maota gasegase mo le siakiina o le tulaga o lona soifua maloloina.

E ui e le o se tulaga na ono fa’apopoleina ai le maota aemaise ai o le atunu’u ma le itumalo, ae na fa’aalia lava e ni isi o afioga i Faipule ma tagata faigaluega a le maota o sui i le Samoa News, lagona misi alofa ona o le tulaga fa’aletonu na a’afia ai le soifua maloloina o le afioga i le sui fofoga fetalai o le maota.

Sa tulaga lelei lava le amataga o le tauaofiaga, ae o le taimi o folafolaga na maitauina ai loa tulaga fa’aletonu i le soifua maloloina o le sui fofoga fetalai, ma taofia fa’afuase’i mai ai e le sui fofoga fetalai galuega a le maota, ao le taimi lea o lo o saunoa ai le Faipule mai Swains ia Su’a Alexander Eli Jennings e tau fa’atulaga lana iloiloga.

O le mae’a ai o le malologa puupuu e 5 minute, na fautuaina ai loa e le Failautusi o le maota o sui, le faletua ia Fialupe Lutu afioga i Faipule, ina ia taofia ni folafolaga o lo o manatu e fia fa’aleo, ona o le manatu e fa’amuta loa galuega a le maota ona o tulaga fa’aletonu i le soifua maloloina o le sui fofoga fetalai, ma fa’ai’u ai loa e le afioga i le ali’i faipule ia Gafatasi Afalava le tauaofiaga i le tatalo.

O le itula e 8:30 i le taeao nei lea ua fa’atulaga e faia ai le iloiloga a le maota o sui, mo le fa’aauauina lava o le talanoaina o pili tupe a le kovana ua mae’a ona tu’uina atu i luma o le fono faitulafono.

I isi tala mai le Fono Faitulafono, o le itula e 8:30 i le taeao o le aso Lulu ua fa’atulaga ai le iloiloga a le Komiti o Fa’amasinoga a le maota maualuga, e talanoaina ai le tulafono taufa’aofi mai le faigamalo, mo suiga i le Tulafono mo Tagata e faamaonia i solitulafono o le faia o uiga mataga i fanau laiti.

O le itula e 8:30 i le taeao o le aso Tofi lea ua fa’atulaga ai le iloiloga a le Komiti o le Paketi a le maota maualuga, mo le talanoaina lea o le tulafono sa talosagaina e le faigamalo a Lolo ma Lemanu, mo se pili e fa’afou ai le fua o lafoga a Amerika Samoa, ina ia mulimulita’i i le fua o lo o i ai lafoga a le Ofisa o Lafoga a le malo tele (IRS).