Fa’amavae le Loia Fautua mai lana galuega

O le vaiaso na te’a nei na tauaao aloaia ai e le Ofisa o le Kovana le tusi fa’amavae a le susuga a Douglas Fiaui, mai le tofiga o le Loia Fautua mo tagata lautele.

O le aso Lua o le vaiaso na te’a nei na tauaao atu ai e le Ofisa a le Loia Fautua le tusi fa’amavae a Fiaui i le ofisa o le ali’i Kovana ia Lolo Matalasi Moliga. O Fiaui, o loo i ai o ia i Amerika i le taimi nei mo malologa fa’a galuega e 12 vaiaso le umi.

O le fa’amavae mai ai o Fiaui mai lana galuega, ua tula’i mai ai le ofisa o le Loia Fautua i se tulaga fa’aletonu, e le gata i le le lava o loia, ae fa’apea fo’i ma mea e mana’omia e fa’atino ai galuega.

E lei finagalo le sui Loia Fautua ia Michael White e tuuina mai sana saunoaga i le Samoa News e tusa ai o le fa’amavae mai o Fiaui mai lana galuega.

O le aso Sa nei e tuua ai e White le atunu’u mo malologa fa’ale galuega mo le umi e 4 vaiaso, ona totoe ai loa lea o loia e to’alua i le Ofisa o Loia Fautua. O le tasi o loia e to’alua o le a totoe ua fa’amoemoe e mae’a lana konekarate i le masina fou, ma fuafua ai loa o le aso 12 Iuni na te tuua ai le atunu’u.

O le fa’amavae mai o Fiaui mai lona tulaga o le Ta’ita’i o le Ofisa na matua fa’ateia ai le ofisa atoa. E 4 aso talu ona tuana’i le poloaiga mai le Fa’amasino Sili e fesiligia ai le mafua’aga o le tuua ai e Fiaui o le galuega mo le umi e 12 vaiaso, ae tauaao loa e le Fa’amasinoga i le vaiaso na te’a nei lana tusi fa’amavae.

O le itu na mafua ai ona fesiligia e Kruse le mafua’aga o le umi o le taimi o le malologa a Fiaui mai lana galuega, ona o ali’i e to’alua o loo ia tauaveina a laua mataupu sa tatau ona faia a laua fa’amasinoga autu i le masina na te’a nei atoa ai ma le masina lenei, peita’i ua toe tolopo uma mo le faaiuga o le tausaga ona e le o avanoa Fiaui.

Na fesili Kruse i loia fautua lagolago e to’alua na auai i totonu o le potu fa’amasino i le taimi na valaau ai mataupu a i laua e to’alua o loo tauave e Fiaui, i le mafua’aga o le tuua ai e Fiaui o le galuega mo le 12 vaiaso, ae na fa’aalia e ali’i loia ia, o Fiaui o loo malaga mo ana tafaoga.

E lei manuia taumafaiga a le Samoa News i le vaiaso na te’a nei e tau saili mai ai se finagalo o Fiaui i le mafua’aga o lona fa’amavae mai i lona tofiga. Ae na taua e se tasi e malamalama i le fa’atautaiga o le ofisa le tulaga faaletonu o le ofisa i le taimi nei, ona ua le iloa poo ai o le a ia faia faaiuga mo le manuia o le ofisa.

Na taua e le molimau lea i le Samoa News, le mana’omia ona fa’a faigaluega o ni loia faaopoopo mo le ofisa, peita’i e le o iloa poo ai e faia lea faaiuga i le taimi nei.

“O ni isi o manaoga e aofia ai le fa’aola o computer. O le taimi nei, e alu atu lava le loia ma lana laptop e fa’ataunuu ai a latou galuega ona e le tele o computer e le ola. E oo i pepa e faatino ai galuega a loia e alu atu lava le loia ma ana pepa. E le o iloa i le taimi nei poo i ai se tupe e fa’atau ai nei mea uma mo manaoga a le ofisa”, o le fa’amatalaga lea a le molimau.

Na faamaonia mai e le fesoasoani faapitoa a le kovana ia Iulogologo J. Pereira le tauaao lea e le ofisa o le kovana o le tusi faamavae a Fiaui.

O Fiaui na ia tauaveina mai le tulaga o le Loia Fautua i le amataga o le 2013, ina ua mae’a ona tofia o ia e le kovana ma faamaonia e le Fono Faitulafono. Sa toe filifilia fo’i o ia i lea lava tofiga i le amataga o le tausaga na te’a nei.

I le taimi sa ia tauaveina ai lenei tofiga, sa i ai taimi na valaauina ai o ia e molimau i luma o le Fono Faitulafono, mo le talanoaina o ni isi o mataupu e fa’atatau i tupulaga talavou o lo o fa’aauau pea ona a’afia i solitulafono eseese.

I se tasi o iloiloga sa faia i le tausaga na te’a nei i luma o le maota o sui, lea na ta’ita’iina e le Komiti o Fa’amasinoga, na taua ai e Fiaui le toatele o tupulaga talavou ua fai ma masani le fefoifoia’i i faamaumauga a le fa’amasinoga.

O ni isi o i latou nei na amata solitulafono mai lava ao laiti, ma ua pei o se amio masani le fa’aauau pea ona a’afia i solitulafono eseese. Sa ia taua fo’i i le Fono le manaoga mo le fa’a faigaluegaina o ni loia faaopoopo e fesoasoani i le fa’atinoina o galuega a le ofisa, peita’i o le fa’afitauli, e le lava le tupe e fa’a faigaluega ai ni loia se to’atele.