Faamavae aloaia Rev. Amaama mai le tofi Failautusi Aoao

A o fa’atali ai se fa’aiuga a le Vaega Iloilo o le Fa’amasinoga Maualuga a Amerika Samoa, i le talosaga a Rev. Amaama Tofaeono e uiga i le mataupu e pei ona taoto ai le tagi a le Ekalesia Faapotopotoga Kerisiano i Amerika Samoa (EFKAS), tauala mai i le Komiti a le Au Toeaiina fa’asaga ia te ia ma lona faletua ia Rev. Joan Aleluia Tofaeono, o le vaiaso nei lea ua aloaia ai le fa’amavae o Rev. Amaama mai le tofiga o le Failautusi Aoao a le Ekalesia sa ia tauaveina mai i le tausaga e 2016.

O le tusi fa’amavae a Rev. Amaama ua tuu aloaia atu nei i le Fono Tele a le Ekalesia EFKAS, lea ua fa’amoemoe e usuia i le masina o Iulai 2018 i le laumua i Kanana Fou.

O le Fono Tele a le Ekalesia ia Iulai 2016, na filifilia ai Rev. Amaama e ala i le palota e avea ma Failautusi Aoao mo le umi e 4 tausaga.

Sa ia taua i lana tusi e fa’apea, na te le toe fa’amasinoina le sa’o poo faaletonu o tulaga e pei ona satia ai lana galuega fa’a Failautusi Aoao, ae o tulaga ua alia’e mai atoa ai ma le faigata ona latou galulue fa’atasi ma isi sui o le Laulau Fono a le Fono Tele e saili se leleiga Faakerisiano, o le mafua’aga lea o lona taofi ina ia fa’aseetuagalu ma fa’amavae aloaia mai i le nofoa.

“Ua ou faia lenei fa’atatau i le agaga fa’aaloalo tele, ae e afua mai i se ioega ma le finagalo autasi o le Fono Tele ma le EFKAS e ana le tofiga na ou tautua ai”, o se vaega lea o le tusi a Rev. Amaama.

“Ou te avatu foi malu-i-pu’ega i lo outou mamalu tele, pe afai ua matau ane ua sosopo le manu vale i le fogatia, ma ua ou le usitaia le fa’ai’uga a le Au Toeaina, o le aveeseina lea o lo’u tofi o le faifeau fa’au’uina. O lea fa’ai’uga na afua ai ona fa’atula’ieseina a’u mai le tofiga o le Failautusi aoao, ma ua i’u ina molia ai a’u e le Taitaifono o le Fono Tele ma le Komiti Au Toeaina i le Fa’amasinoga a le Malo. O lo latou taofi i le Fa’amasinoga, ua talafeagai la latou fa’ai’uga o le aveese lea o lo’u tofi faifeau e fai ma ala e fa’amuta ai la’u galuega fa’afailautusi a le EFKAS”.

“I le ava tele ma le fa’aaloalo e tatau ai, vae ane lo outou mamalu, ou te manatu e le ose fa’ai’uga sa’o lenei fa’atatau e tusa ma aiaiga o le Fa’avae o le EFKAS. O lo o manino lava i le Fa’avae o le Ekalesia, o le taualuga o fa’ai’uga uma lava a Komiti ese’ese a le Ekalesia, o lana Fono Tele. O le ioega lava a le Fono Tele e fa’amausaliina ai mataupu ma i’uga uma a totino ta’itasi o le Ekalesia”.

“Na fa’au’uina a’u e fai ma faifeau a le EFKAS, na fa’amautuina e le Fono Tele i la latu ioega ‘autasi, e ui ina sa filifili e le Au Toeaina e pei ona fa’agasolo ai tulaga fa’apenei. E ui lava foi ina mafai e le Au Toeaina ona latou fa’asalaina se faifeau a le Ekalesia, ae e le mafai ai ona avea lea ma ala e ave’esea ai le tofi o le faifeau fa’au’u. O le Fono Tele lava, e afua i lo latou finagalo autasi, latou te va’atele, fa’amautu ma taualuga iai fa’ai’uga uma”.

Saunoa Rev. Amaama e fa’apea, ua iloa lava le auivi autu o le Ekalesia, o le pule aoao lava o Iesu Keriso lea, o le ao foi o le Ekalesia, ae o tagata kerisiano fa’atuatua uma lava, o itutino o le tino o Iesu Keriso. O i latou nei e faia faaiuga uma faaletino ma faaleagaga, e mafai fo’i e se itutino ona tumaoti, ae tatau ona faia e itutino uma se fa’aiuga.

“O le fa’ai’uga a le Fa’amasinoga ou te tu’ua ai le maota o le Failautusi Aoao lea na ou nofoia ona o le tofiga a le Fono Tele, o lo o ta’oto pea i le Fa’amasinoga a le Malo le talosaga apili mo le toe iloiloina. Ou te matua talitonu e tusa ai o aiaiga o le Fa’avae a le EFKAS, o le Fono Tele lava e faia le fa’ai’uga e ave’esea ai lo’u tofiga o le faifeau fa’au’uina a le Ekalesia, atoa ai ma lo’u tofiga o le Failautusi Aoao, ae e le o le Au Toeaina po o le Taitaifono o le Fono Tele”.

“O le manumanuga sili iinei, ona ua le amana’iaina e le Taitaifono o le Fono Tele ma le Au Toeaina le Fono Tele a le EFKAS e fa’amautuina fa’aiuga uma ma le pulega fa’aekalesia. Peita’i ane, ua ia i latou sailia le malosi o le Fa’amasinoga a le Malo ina ia mafai ai ona aveesea ma fa’atula’ieseina a’u. Ae i nei fa’atata’uga uma, ua latou ave’esea ma ta’u fa’atauva’aina ai le pule mamalu fa’aleAtua a le Ekalesia Aoao, ma ua aunoa foi ma se agaga fa’akerisiano o le fefa’amagalo’ai o i matou lava, atoa ai ma le fa’alologo i le musumusuga mana a le Agaga Paia i ala tatau e ao ona uia”.

O le fa’anoanoaga o Rev. Amaama, o le auina atu lea e le Komiti a le Au Toeaiina o le mataupu i le Fa’amasinoga, ma ua oo i ai le malosi o Fa’amasino, ae sa tatau ona soalaupule pea le lotoifale o le Ekalesia.

“Ona o mafua’aga ua ou ta’ua i luga, ua ou tu’uina atu ai lenei fa’amavaega tusitusia mai lo’u tofiga o le Failautusi aoao na filifilia e le Fono Tele. Ua ou faia lenei fa’atatau ina ia fo’ia ai le le femalamalama’i ma fe’ese’esea’iga ua tula’i mai ma tausia ai le filemu, ma ina ia o gatasi ma le Fa’avae o le EFKAS, ae e le ona o se fa’ai’uga e faia e ali’i Fa’amasino o le Fa’amasinoga a le Malo o Amerika Samoa. O le a fa’amutaina la’u auaunaga o le Failautusi aoao a le EFKAS, pe a ioeina e ala i le palota ma le maliliega aufa’atasi a sui-usufono a le Fono Tele, ia Iulai 2018”.