Fa’amatu’u mai e le DOJ vaegatupe mo Amerika Samoa

Pago Pago - AMERIKA SAMOA

SILIA MA LE $120,500 MO LE CJPA

Ua fa’amatu’u mai nei e le Matagaluega o Faamasinoga (DOJ) a le malo tele o Amerika, se vaegatupe e $120,523 mo le Ofisa o a le Criminal Justice (CJPA) a Amerika Samoa mo ana polokalama fa’atulagaina, e fesoasoani ia i latou o a’afia i fuala’au faasaina faapea ma sauaga.

O le polokalama e ta’ua o le RSAT (Residential Substance Abuse Treatment) e fesoasoani i malo e atia’e ma fa’atulagaina polokalama e fesoasoani i tagata ua a’afia soifuaga i fualaau faasaina ma ‘ava malolosi, i totonu o falepuipui faapea ai le faavaeina ma le fa’aauauina o le auaunaga ma le tausiga o tagata pe a tatalaina i tua. 

O le faamoemoega a le RSAT o le talepeina lea o le taamilosaga o fualaau faasaina ma sauaga, e ala i le fa’aitiitia o le mana’o, fa’aaogaina ma le feavea’iina fa’anana, o fualaau faasaina.  E fa’alauteleina e le RSAT ia le malosi o malo ta’itasi ina ia mafai ona iai ni auaunaga mo pagota, saunia i latou i taimi e toe fo’i ai i aiga ma nu’u. 

O le a faapea ona aoga nei vaegatupe mai i le RSAT mo totonu o nu’u ma afioaga, mo pagota i totonu o falepuipui, aemaise o taimi e toe tatalaina mai ai i tua.

Sa fa’aalia e le afioga i le sui Faipule o Amerika Samoa i totonu o le Konekeresi, ia Uifa’atali Amata lona agaga fa’afetai ma le faamalo i le Faatonusili o le CJPA, ia Mariana Timu-Faiai ma lana aufaigaluega, ona o la latou galuega mae’ae’a i tausaga uma ina ia fa’amatu’u mai ai nei vaega tupe feterale, e fesoasoani i tagata o le atunu’u, aemaise i latou o lo’o taumafai ina ia tu’uesea le toe tagofia o fualaau faasaina ma isi amioga faasolitulafono, aua so latou lumanai manuia.  Na faapea foi ona fa’aalia lona agaga fa’afetai i le DOJ aua nei polokalama i totonu o Amerika Samoa.

$228,000 MO LE MATAGALUEGA O LE SOIFUA MALOLOINA

Ua fa’amatu’uina mai foi e le Matagaluega o Auaunaga mo Tagata ma le Soifua Maloloina a le Malo Tele o Amerika (HHC), tauala mai i le CDC (Centers for Disease Control and Prevention), ia se vaegatupe e $228,000 mo le Matagaluega o le Soifua Maloloina a Amerika Samoa.

E ma’oti lava lenei vaegatupe mai i se lala a le CDC e ta’ua o le NCCDPHP (National Center for Chronic Diseases Prevention & Health Promotion), mo poloketi umalava mo leisi lima tausaga o i luma.  Ma o nei vaegatupe feterale e mo le ‘Behavioral Risk Factor Surveillance System’ a Amerika Samoa, lea sa talosagaina ai se vaegatupe e le Matagaluega Soifua Maloloina e fesoasoani i a latou su’esu’ega fa’asaienitisi ma le soifua maloloina.

Ua fa’aalia foi e Aumua Amata le agaga fa’afetai ma le fa’amalo i le susuga i le Faatonusili a le ofisa mo le nofo tapenapena aua faalavelave fa’afuase’i, ia Ben Sili faapea ma le Faatonusili o le Matagaluega o le Soifua Maloloina ia Motusa Tuileama Nua.  Sa fa’aalia foi le agaga fa’afetai o le sui Faipule i Uasigitone i le Failautusi a le HHS, ia Xavier Becerra, le Faatonusili o le CDC ia Dr. Mandy Cohen faapea le Faatonusili o le NCCDPHP ia Dr. Karen Hacker.