Faamasino Sili: E fuafua le paketi a le Faamasinoga i tulaga e manaomia e fa’agaioi ai

Pago Pago - AMERIKA SAMOA

I se toe faamanatu atu a le Afioga i le Faamasino Sili ia Lealaialoa Michael Kruse, i le Ofisa o le Paketi, e tusa ai ma le tu’u’ese’ese o malosiaga o itu e tolu o le malo, lea e aofia ai ma vaevaega o paketi, mai i le Ofisa o le Kovana, i sana tusi ia Me 19, 2025 sa faapea ona fa’ao’oina atu i le sui Faatonusili o le Ofisa o le Paketi a le malo, ia Satia Aokuso Satia.

Na ta’ua e Lealaialoa e faapea, o le Faamasinoga Maualuga, e pei lava o le Fono, e le o se matagaluega a le malo, e faatonutonu mai e le faatonuina mai e le Kovana, e fa’apena foi i le va o le ofisa o le kovana ma le vaega o faamasinoga.

O le tali atu lea a le afioga i le Faamasino Sili i se vala’au mai i le Ofisa o le Paketi, mo le paketi o le Tausaga Tupe 2026 i taumatematega o tupe aoina a le Malo o Amerika Samoa, e $135 miliona, lea ua va’aia se pa’u (23%) mai i le paketi o le tausaga tupe ua tuanai, e $165.9 miliona.

Sa fa’amaonia e Lealaialoa ia se fa’aaliga mai i le Ofisa o Paketi ia Me 15, lea na fa’atonuina ai le Vaega o Faamasinoga, ina ia usita’ia ia aofaiga e $3.29 miliona, ua mae’a ona fa’atulagaina mo lenei tausaga tupe.

Ae peitai, o le tali mai ia Lealaialoa, sa ia fautuaina ai le Ofisa o le Paketi a le malo, o le paketi a le Vaega o Faamasinoga, e pei ona sa iai i tausaga ua tuanai, e fuafua lava i tulaga mana’omia mo le fa’atinoga o a latou tiute.

Ona fa’ao’oina atu lea i le Fono e fai ai sa latou fa’ai’uga i le fa’asoasoaina o le paketi a le Vaega a le Faamasinoga, ae e le o le ofisa a le paketi.

O kopi o le tusi a le Faamasino Sili, sa faapea ona kopi atu ai i le Afioga i le Kovana Pulaalii N. Pula, o  le Peresetene o le Senate, Tuaolo Manaia Fruean, le Fofoga Fetalai  Savali Talavou Ale, faapea le susuga ia Enere  Seumanutafa.

PAKETI TAUSAGA TUPE 2026

O le fa’ai’uga a le Ofisa mo le Fuafuaina o Polokalama ma Paketi, ia Me 15, 2025 i le paketi fuafuaina mo le Tausaga Tupe 2026 a le Malo o Amerika Samoa, ua fautuaina ai le toe fa’atulagaina o le paketi mo le 2026, e ala lea i le tapunia o le va o le paketi o le tausaga tupe 2025, o iai nei.

Ma o le mafua’aga lea ua faatulagaina ai e le sui Faatonu o le Ofisa o le Paketi, ia Satia, ia le taualuga o le paketi, i le $135 miliona – o se pa’u mai lea (23%) mai lea i le paketi o le tausaga tupe 2025, lea sa i le $165.9 miliona, e o gatasi ma le faaiuga a le kovana, mo le taofiofi o tupe fa’aalu i tupe aoina.

E tusa ai ma le fa’aaliga a le kovana, ona o le limiti o alagamanuia o iai nei, ua alagatatau ona ola e fa’atatau i tupe o lo’o maua.