Fa’amasani ma a’oa’o i tiute saunia ai mo Pisinisi

O le aso ananafi na oo atu ai le tama’ita’i e fa’auluulu i ai le itu e faila ai lafoga a le Ofisa o Lafoga a le malo, MaryAnne Laussen Olo, fa’atasi ma se isi sui sinia o lea lava Ofisa, e a’otauina ma fa’amalamalama auiliili le fanau a’oga i Vasega Fa’apisinisi a le Kolisi Tu’ufa’atasi o Amerika Samoa.

“O lenei taumafaiga, aua ua matauina ua i ai tulafono e ao ina malamalama toto’a ai le fanau ao faila e i latou lafoga a tagata lautele i le Ofisa o Lafoga  i Utulei, mo lea fesoasoani. O le mea muamua e ao ina manino i le vasega o faila lafoga nei, e le failaina e i latou se lafoga a se tasi e silia ma le $26,000 lona totogi,” o se fa’apupulaga atili lea a Laussen Olo.

“Ua fa’atulaga lenei tautua e le totogia e le Ofisa o Lafoga, ina ia fesoasoani i tagata e maulalo le tupe maua, ae o i latou uma e totogi maualuluga, e ao ina latou saili i kamupani po’o sui totogi fa’atasi ai ma i latou lava, e failaina latou lafoga. O lafoga fo’i na e mafai ona to’esea ai au lafoga i le ekalesia, tupe na foa’i mo sosaiete eseese e aoga mo le lautele, ma totogi o lou fale, ina ia taumafai ai ona fa’aitiitia lau tupe totogia o le lafoga,” o lana tala lea.

O le masani lea a le Vaega o Pisinisi a le Kolisi Tu’ufa’atasi, e taumafai ona fa’ao’o uma fanau e tau’avea lea kosi aoga i so’o se tomai e tatau ona agave’a ai i latou, a’o taumafai ia iloa lelei ona fa’atautaia pisinisi tumaoti, poo le iloa lelei fo’i ala uma e ao ina fa’atino ai fefa’ataua’iga mo pisinisi ma tagata lautele ae maise le va ai ma le Malo i a latou lafoga totogi.

I le a’oaoga lenei sa fa’amalamalama e Laussen Olo le tulaga e tatau ona va’ai toto’a i ai le vasega o e failaina lafoga a le mamalu lautele, “Ia lava le onosa’i ma ia fesili ma le fa’aaloalo i nai o tatou tagata matutua. Afai e le lelei tele lau gagana Samoa, e ao ina e matua fa’alogo lelei, ma fesili pe afai o misi i lau fa’alogo se tala a le tagata o lua fesaga’i. O mea mautinoa e ao ina latou taua’aoina, o Saogalemu, Pepa Fanau o latou fanau ma ID, ao isi foi o pepa tui mo i latou uma ina ia fa’afaigofie ma vave a outou galuega.”

E i ai foi nisi o mea patino e ao ina va’ai toto’a i ai latou, poo le a tonu ituaiga faila e faila ai lafoga a tagata, poo se tasi e le’i fa’aipoipo e faila lava na’o ia, pe fai aiga ma e faila fa’atasi ma le to’alua. Pe fai le aiga, ae faila ta’ito’atasi.

I le vaega o tamaiti o tausia e le tagata faigaluega, ua mafai ona avea e ia lana lava fanau, sona tei latiti, poo se tasi e aiga ia te ia o lo’o latou nonofo fa’atasi i le 365 aso o le tausaga 2016. Afai e le’i umi fa’apena, ua le tatau ona e avea lea sui ina ia usita’ia le tulafono tau lafoga mo tagata o e tausia.

“E ese mai tagata o lo’o e aiga i ai, e mafai ona e avea se tasi na e tausia e te le aiga i ai, ae ua fa’amaonia sa e tausia mai i le tausaga atoa ua te’a. Afai e leai se numera saogalemu a lea tagala, e ao ina fa’amaoni lelei, sa iinei i le tausaga atoa, e tusa o le fa’amau fa’ailoga i le Tusi Folau, ma ona pepa ua e umia e aofia ai ma le ID mai le Ofisa o Femalaga’iga,” o a Laussen Olo lea.

O le pepa faila lafoga o lo’o fa’aauau ona faila ai lafoga  o le 2016, o lo’o fa’aaogaina lava le pepa na fa’amaonia i le tausaga 2000.

“O le mafuaga tonu foi lea e le o toe suia ai le aofai o lafoga totogi mo fanau iti ta’itasi na fa’atulaga i le tausaga 2000, e na’o le ta’i $500 mo le tamaititi e to’atasi.”

Ina ua fesiligia sui o le Ofisa o Lafoga pe mata e le o sailia e le tatou Malo sui nei ua faila latou lafoga i fafo, ae le o tusa ai ma tulafono a le malo tele ma i tatou foi, ae fa’ailoa mai, “E le o faia se gaoioiga a le matou Ofisa e tau saillia ai i latou ua faila i fafo latou lafoga, peita’i, ua fa’ailoa atu pea, o lo’o e solitulafono. Afai ae maua oe, e leai lava se tasi e fesoasoani atu ia oe, e tali lava oe mo oe.”

O lenei vasega o le a fa’afaigaluega e fesoasoani e faila lafoga a tagata i le Ofisa o Lafoga e afua i le vaiaso fou. Peita’i, ua iloga le fiafia o i latou ua maua le avanoa e iloa ai ona faila lafoga, ma ua fa’ailoa mai e se tasi o sui tama’ita’i o lea vasega, “O le mea e amata lava i le lafoga a ou matua ona ou faila lafoga, ae ou te iloa e toe o lava e saili poo sa’o au mea ale fai.”

O lea vasega e tusa ma le 81 o fanau ua maea fa’aulufale mo a’oa’oga fa’apisinisi i lenei tausaga a’oga, e aofia fa’atasi ai fanau sa amatalia latou kosi i le tausaga ua mavae, ma nisi e fou.

O le Faiaoga Dr Faofua Va’apu’u Fa’atoafe, Prof. Taua’e ma Vai Lam Yuen, o i latou ia o lo’o fa’atautaia a’oa’oga eseese e mo’omia ona tauavea e le fanau aoga a’o le’i fa’au’u mai ma latou tusi pasi maualuluga.