Fa’amaonia moliaga o le Faomea fa’asaga i se ali’i 19 tausaga

O le aso 1 Setema i le itula e 9:00 i le taeao lea ua fa’atulaga e lau ai le fa’asalaga a se ali’i talavou e 19 tausaga le matua, ina ua fa’amaonia e le fa’amasinoga moliaga e 9 sa tu’uaia ai o ia e le malo, lea e aofia ai le moliaga pito sili ona mamafa o le faomea i le tulaga muamua, fa’apea ai ma moliaga mama e 8 o le gaoi.

O le taeao o le aso Faraile o le vaiaso na te’a nei na talia aloaia ai e le fa’amasinoga maualuga se maliliega na sainia e le malo ma le ua molia, ma ua toe taofia nei o ia i le toese i Tafuna e fa’atali ai le aso lea ua fa’atulaga e lau ai lana fa’asalaga.

E 9 moliaga o le faomea i le tulaga muamua na tu’uaia ai e le malo le ali’i o David Fo’a, ae i lalo o se maliliega na sainia e le ua molia ma ua talia fo’i e le fa’amasinoga maualuga i le vaiaso na te’a nei, na malie ai le malo latou te toe faia se teuteuga i le ulua’i tagi sa latou fa’aulu fa’asaga ia Fo’a, ina ia aofia ai le tali ioe o ia i le moliaga mamafa e tasi o le faomea i le tulaga muamua, ae toe teuteu uma isi moliaga e 8 o lo o totoe ai i le pepa o tagi, ina ia suia ia moliaga i le moliaga mama o le gaoi.

I le tali ioe ai o Fo’a i le moliaga mamafa e tasi o le faomea i le tulaga muamua, atoa ai ma moliaga mama e 8 o le gaoi, ua ia ta’utino ai i le fa’amasinoga i lona osofaia lea o ni faleoloa se 7 i taimi eseese ma le fa’amoemoe e fa’atino ai le solitulafono o le gaoi.

Na ta’utino le ua molia e fa’apea, i le po o le aso 13 Tesema 2016, sa la aga’i atu ai ma Fa’ai’i Auapaau i se faleoloa i Malaeimi i se taimi o le po ma le fa’amoemoe e osofa’i lea faleoloa, ma ao la i ai i totonu, sa ia fa’aaogaina ai se tama’i fana e fa’afefe ai le fa’atauoloa, ae o Auapaau na alu atu ma aveese mai le masini tupe o lo o i ai le $260 i totonu ma la o ese loa.

I le po o le aso 28 Novema 2016, na alu to’atasi ai na o le ua molia i se faleoloas i Nu’uuli, ma ia fa’aaoga ai se naifi ma se ma’a e fa’afefe ai le fa’atauoloa ae gaoi mai le silia i le $100 mai totonu o le masini tupe.

I le aso 30 Novema 2016 i se taimi o le po, na o ai Fo’a ma se ali’i talavou i totonu o se isi  faleoloa, ona fa’aaoga lea e le ua molia se naifi ma se ma’a e fa’afefe ai le fa’atauoloa, ae gaoi le $170 mai totonu o le masini tupe atoa ai ma pepa sikaleti e 4.

I le aso 1 Tesema 2016 i se taimi o le po, na aga’i atu ai Fo’a ma se tamaititi talavou i le faleoloa tasi o faleoloa i Nu’uuli, ma fa’aaoga ai e le ua molia se ma’a ma se naifi e fa’afefe ai le fa’atauloa, ae aumai faagaoi ai le $160 mai totonu o le masini tupe.

I le po o le aso 2 Tesema 2016, na aga’i atu ai Fo’a ma se tamaititi i se faleoloa i Iliili, ma la faaaogaina ai se naifi ma se ma’a e fa’afefe ai le fa’atauloa, ae ave fa’agaoi le $35 mai totonu o le masini tupe.

I le po lava lea o le aso 2 Tesema, na toe aga’i atu ai fo’i le ua molia ma se tamaititi i se faleoloa i Pava’ia’i, ma fa’aaoga ai e le ua molia se naifi ma se ma’a e fa’afefe ai le fa’atauoloa, ae ave fa’agaoi le tinoitupe e $360 mai totonu o le masini tupe, fa’apea ai ma katuni sikaleti e 2.

I le po o le aso 3 Tesema 2016, na aga’i atu ai na o Fo’a i se isi faleoloa ma ia fa’aaoga se naifi ma se ma’a e fa’afefe ai le fa’atauoloa, ae gaoi fa’amalosi le silia i le $400 mai totonu o le masini tupe.

O le po o le aso 11 Tesema 2016, na alu ai na o Fo’a i totonu o se faleoloa ma ia fa’afefe le fa’atauoloa i le naifi ma le ma’a, ae gaoi fa’amalosi ai le $175 mai totonu o le masini tupe, faapea ai ma ni pepa sikaleti.

Ma le po o le aso 14 Tesema 2016, na alu ai na o Fo’a i le faleoloa i se isi foi faleoloa ma ia fa’aaoga se naifi ma se ma’a e fa’afefe ai le fa’atauoloa ae gaoia le tinoitupe e $210, ae ina ua taumafai tagata faigaluega e taofi o ia, sa ia taumafai ai e tui le lima o le isi tagata faigaluega.

O ni isi o tuutuuga o le maliliega a itu e lua e pei ona tolaulauina i luma o le fa’amasinoga, o le fa’asala lea o Fo’a i se fa’asalaga fa’anofovaavaaia, ina ia mafai ai ona maua le avanoa e alu ai i tua e saili sana galuega e totogi ai lana sala, atoa ai ma le toe totogiina o tupe sa ia gaoia mai i faleoloa eseese e pei ona a’afia.

Na fa’ailoa e le fa’amasinoga i le itu a le malo le tatau lea ona latou fautua atu, i le aofa’i sa’o o le tupe e tatau ona toe totogi e le ua molia i pisinisi na a’afia, ina ia mautinoa e le toe oo atu se isi tagi mo mataupu tau savili (civil) i luma o le fa’amasinoga mai ni isi o pisinisi na a’afia, pe afai e le toe totogiina a latou tupe ma mea totino na a’afia.

Ua fautuaina fo’i le itu a le malo ina ia auina atu i luma o le fa’amasinoga i le aso e lau ai le fa’asalaga a Fo’a, le a’upega lea sa ia fa’aaoga i le osofaiga sa a’afia ai le faleoloa i Malaeimi.

O se tasi o tuutuuga o le maliliega a le malo ma Auapa’au, o lona molimau lea ma le fa’amaoni mo le itu a le malo i le fa’amasinoga autu a Fo’a. O lo o taofia fo’i Auapa’au i le toese i Tafuna e fa’atali ai le aso lea ua fa’atulaga e lau fa’atasi ai a laua fa’asalaga ma Fo’a, i le aso 1 Setema 2017.

O le afioga i le ali’i fa’amasino sili ia Michael Kruse ma le Fa’amasino Lagolago ia Fa’amausili Pomele o lo o iloiloina le mataupu a Fo’a.