Faamaonia le tagofia e se alii o fualaau faasaina ao taofia ai Toese

O le faamaonia ai o le tagofia e se alii pagota o fualaau faasaina o le aisa a o taofia ai o ia i le Toese i Tafuna, ua fesiligia ai e le Famaasino Sili le mafua’aga o lo o mafai ai ona ulufale fualaau faasaina i totonu o le Toese, e ui o lea ua tapena e le malo le pa sima e si’omia ai le lotoa atoa o le Toese.

Saunoa le afioga i le ali’i Fa’amasino Sili ia Michael Kruse, e foliga mai o lo o i ai lava le auala lilo o lo o mafai ai ona ulufale fualaau faasaina i totonu o le Toese. E i ai lava i latou o lo o aofia i le faatinoina o lenei gaioiga faasolitulafono.

O le vaiaso na te’a nei na tula’i ai le susuga a Sharnel Sagote i luma o le Fa’amasino Sili mo le tuuina atu o le faaiuga a le Faamasinoga e tusa ai o le mataupu lea ua faamaonia ai lona le usitaia o tuutuuga o lana nofovaavaaia sa tuuina atu i le 2 tausaga talu ai.

O se tasi o tuutuuga o le nofovaavaaia e 5 tausaga a Sagote, o le faasa lea ona ia tagofia le ‘ava malosi poo fualaau fa’asaina. O le masina o Mati na faamaonia ai i se suega sa faia e se sui o le Ofisa Faanofovaavaaia, le tagofia e Sagote o le fualaau faasaina o le aisa a o taofia ai o ia i le Toese.

Na faatoese Sagote e tusa ai o lona le usitaia o tuutuuga o lana nofovaavaaia, ma ia talosagaina ai se isi avanoa mo ia.

Na talosaga le loia a Sagote ia Rob McNeill mo se isi avanoa e mafai ai ona alu le ua molia e saili sana galuega e tausi ai lona aiga. Na taua e McNeill e fa’apea, ua lagona le salamo o Sagote e tusa ai o lana gaioiga sa faia, ua ia ta’utino fo’i na te le toe faia lea gaioiga sese.

Na talosaga atili fo’i McNeill ina ia talia le fautuaga a le Ofisa Faanofovaavaaia, o le tatala lea o Sagote i tua e saili sana galuega e totogi ai lana salatupe sa tuu atu e le Fa’amasinoga i le tausaga na te’a nei, ma fa’aauau pea ona i lalo o le vaavaaiga a le Ofisa Nofovaavaaia.

Na lagolagoina e le loia a le malo ia Laura Garvey le talosaga a le itu tete’e, ina ia talia e le Fa’amasinoga le fautuaga a le Ofisa Nofovaavaaia.

Na taua e le Pulesili o le Ofisa Nofovaavaaia i luma o le Fa’amasinoga e fa’apea, talu mai le taimi na faamaonia ai le tagofia e le ua molia o fualaau faasaina, na te le i toe tagofia lava fualaau faasaina i tua mai i le taimi lea seia oo mai lava i le taeao o le aso Faraile na te’a nei ina ua tula’i i luma o le Fa’amasinoga.

Na taua e le Pulesili o le Ofisa Nofovaavaaia, o isi suega uma sa faia a Sagote na faamaonia ai lona nofo mama mai le ‘ava malosi ma fualaau fa’asaina.

O lana fautuaga i le Fa’amasinoga, ia aua nei faaleaogaina le nofovaavaaia a le ua molia, a ia faaauau pea ona tuu o ia i lalo o le vaavaaiga a le Ofisa Nofovaavaaia. Ia faataga fo’i e le Fa’amasinoga le ua molia e saili sana galuega i totonu o le 90 aso.

Ao le i tuuina atu le faaiuga a le Fa’amasinoga ia Sagote, na faailoa e Kruse ia Sagote le matuia o lana gaioiga sa faia i le taimi na pu’e faapagota ai o ia e Leoleo i le taeao o le aso 1 o Novema 2018 i le nofoaga e taua o le “Le Filifili”.

Na poloa’i e Kruse ia Sagote ina ia saili sana galuega tumau e galue ma maua ai sona totogi i totonu o le 90 aso lea ua tuu atu e le Fa’amasinoga.

“E le mana’omia lou toe alu e te galue i lau galuega lea sa e galue ai i le nofoaga o le “Le Filifili, e le mana’omia fo’i e le Faamasinoga lou galue i se Faatoaga, ae mana’omia le saili o sau galuega e maua ai sou totogi ma tausi ai lou aiga,” o le fautuaga lea a Kruse ia Sagote.

Na faailoa atili e Kruse ia Sagote e fa’apea, “E 90 aso lea ua tuu atu e le Fa’amasinoga e saili ai sau galuega, afai e mae’a aso ia e 90 ae le i maua sau galuega, o le a taofia oe i le Toese i Tafuna mo le 3 masina, ona o lou le usita’i i le poloaiga a le Fa’amasinoga e pei ona tuu atu i lau nofovaavaaia.”

Na toe faatepa e le Fa’amasinoga ia Sagote ma lana loia le matuia o le gaioiga na faia e le ua molia, lea na mafua ai ona molia o ia e le malo i lenei mataupu.

Na taua e le Fa’amasinoga e fa’apea, a o pisi ai Leoleo e tau saili le alii e nofo i luga o le Mauga i Logotala, po o le nofoaga lea e taua o le “Le Filifili”, ona o tuuaiga i lona ave faamalosia o se tamaitai e 21 tausaga le matua i le masina o Oketopa o le tausaga e 2018, na maua atu ai e Leoleo ia Sagote ma se isi alii o loo tutu i le auala e aga’i i luga i Logotala, ma taumafai e faalavelave i galuega a Leoleo.

Na pu’e faapagota e Leoleo Sagote ma le alii na la to’alua ona o le faalavelave i galuega a Leoleo, ae maua ai fualaau fa’asaina ia te i laua.

O fualaau faasaina na maua ia Sagote e aofia ai aisa ma mariuana, faapea ai ma se tinoitupe e $506. Na faailoa e Sagote i Leoleo, o fualaau faasaina sa maua ia te ia, na avatu e le tagata o loo latou tau sailia, le susuga a Fiti Letasi ma le faamoemoe e tulei ma faatau atu i isi tagata.

“O le gaioiga sa faia e le ua molia i lea aso sa atagia mai ai lona le manatu mamafa i le tulafono a le malo o Amerika Samoa,” o le saunoaga lea a le Fa’amasinoga i le vaiaso na te’a nei.

Ua faatonuina e le Fa’amasinoga le Pulesili o le Ofisa Nofovaavaaia, ina ia saili mai poo ai le igoa o le Taitai Uati sa tiute i le Toese i Tafuna i le aso lea na faamaonia ai le tagofia e Sagote o fualaau faasaina.

Saunoa le Fa’amasinoga e fa’apea, e tatau ona saili i latou o lo o masalomia le aofia i gaioiga e faaulufale faasolitulafono ai fualaau faasaina i totonu o le Toese i Tafuna.

E le i taua lava e le Fa’amasinoga le mataupu e pei ona molia ai e le malo se alii sa avea ma Leoleo o le Toese i Tafuna, atoa ai ma se Tina mai Vaitogi, ona o tu’uaiga i lo la galulue faatasi lea e faaulufale faanana fualaau fa’asaina i totonu o le Toese i Tafuna.

O le alia’e mai ai o lenei mataupu i le masina na te’a nei, ua faamaonia ai masalosaloga ua tele tausaga o nofo ma le Fa’amasinoga, e i ai lava ni isi o lo o fesoasoani i le faaulufale faanana o fualaau fa’asaina i totonu o le Toese.

O i laua e to’alua e aofia ai le susuga ia Ofisa Enoka Leifi Jr ma le Tina ia Josephine Samatua-Gauta.

E ese mai ia i laua ia e to’alua, e toatasi fo’i le isi tama’ita’i na molia ma ua ta’usala e le Fa’amasinoga Maualuga, i lona taumafai lea e faaulufale faanana fualaau fa’asaina i totonu o le Toese i le tausaga e 2018.

Saunoa Kruse e fa’apea, tusa lava poo a taumafaiga a le malo e saili ai auala e siitia ai le saogalemu o solitulafono i totonu o le Toese, e mafai lava ona tutupu nei gaioiga faapenei, ona o lo o i ai tagata o lo o galulue ma fesoasoani e faataunuu nei ituaiga gaioiga faasolitulafono.