Faamaonia le fa’aaoga e se ali’i pagota o fualaau faasaina i totonu Toese

Pago Pago, AMERIKA SAMOA

O le faamaonia ai e le Faamasinoga Maualuga o le tagofia e se alii pagota o fualaau faasaina o le aisa a o taofia ai o ia i le Toese i Tafuna, na fesiligia ai e afioga i alii Faamasino le mafua’aga o lo o mafai ai ona ulufale fualaau faasaina i totonu o le Toese, e ui o lea ua mae’a ona fausia e le faigamalo le pa sima e si’omia ai le nofoaga atoa o le Toese i Tafuna, ona o le faanaunauga ina ia taofia ai le toe sosola i tua o pagota, atoa ai ma le faigofie ona ave faasolitulafono o fualaau faasaina i totonu o le nofoaga.

Na taua e le Faamasinoga Maualuga e faapea, e foliga mai o lo o faaaoga e nisi auala faalilolilo ma faiga faasolitulafono e mafai ai ona ulufale fualaau faasaina i totonu o le Toese. E i ai lava i latou o lo o aofia i le faatinoina o lenei gaioiga faasolitulafono. 

O le vaiaso na te’a nei na tula’i ai le susuga a Leati Sagato i luma o le Fa’amasinoga Maualuga mo le tuuina atu o le faaiuga a le Faamasinoga e tusa ai o le mataupu lea ua faamaonia ai lona le usitaia o tuutuuga o lana nofovaavaaia sa tuuina atu i le 2 tausaga talu ai.

O se tasi o tuutuuga o le nofovaavaaia e 5 tausaga a Sagato sa tuuina atu e le Fa’amasinoga, o le faasa lea ona ia toe tagofia le ‘ava malosi poo fualaau fa’asaina, o le a mafai fo’i ona suesueina o ia i soo se taimi ina ia faamaonia ai na te le o toe tagofia fualaau faasaina poo le ‘ava malosi. 

O le amataga o le tausaga lenei na faamaonia ai i se suega sa faia e se sui o le Ofisa Faanofovaavaaia, le tagofia e Sagato o le fualaau faasaina o le aisa a o tuli ai lona faasalaga i le Toese i Tafuna. O lea suega ua fesiligia ai e le Faamasinoga le saogalemu o le nonofo ai o pagota i totonu o le Toese.

Na faatoese Sagote e tusa ai o lona le usitaia o tuutuuga o lana nofovaavaaia, ma ia talosagaina ai se isi avanoa mo ia. Sa ia faailoa i le Fa’amasinoga, afai ae toe maua se isi avanoa mo ia, o le a saili sana galuega e tausi ai lona aiga aemaise ai ona matua. Sa ia taua fo’i lona salamo e tusa ai o le toe taofia o ia i le Toese i Tafuna mo le silia i le 4 vaiaso, ina ua faamaonia lona le usitaia o tuutuuga o lana nofovaavaaia.

Na talosaga le loia a Sagato i le Faamasinoga mo se isi avanoa e mafai ai ona alu le ua molia e saili sana galuega e tausi ai lona aiga. Na taua e le ali’i Loia Fautua e fa’apea, ua lagona le salamo o Sagato e tusa ai o lana gaioiga sa faia, ua ia ta’utino fo’i na te le toe faia lea gaioiga sese.

Na talosaga atili fo’i le ali’i Loia Fautua i le Fa’amasinoga ina ia talia le fautuaga a le Ofisa Faanofovaavaaia, o le tatala lea o Sagato i tua e saili sana galuega e totogi ai lana salatupe sa tuu atu e le Fa’amasinoga i le tausaga na te’a nei, ma fa’aauau pea ona i lalo o le vaavaaiga a le Ofisa Nofovaavaaia. Na lagolagoina e le loia a le malo le talosaga a le itu tete’e, ina ia talia e le Fa’amasinoga le fautuaga a le Ofisa Nofovaavaaia.

I faamaumauga a le Ofisa Faanofovaavaaia o loo taua ai le tulaga lea, talu mai le taimi na faamaonia ai le tagofia e le ua molia o fualaau faasaina i le amataga o le tausaga nei, na te le i toe tagofia lava nisi vaega o fualaau faasaina i tua mai i le taimi lea seia oo mai lava i le vaiaso na te’a nei ina ua tula’i i luma o le Fa’amasinoga mo le tuuina atu o lana fa’asalaga.

Na taua atili e le Ofisa Nofovaavaaia e faapea, o isi suega uma sa faia a Sagato na faamaonia ai lona nofo mama mai le ‘ava malosi ma fualaau fa’asaina. Sa auai fo’i o ia i aoaoga e fesoasoani ai i aafiaga o le ‘ava malosi ma fualaau fa’asaina, ma ua mulimulita’i fo’i o ia i faatonuga uma ua mae’a ona tuuina atu i ai na te tausia ma savali ai.

O le ripoti a le Ofisa Nofovaavaaia i le Fa’amasinoga, ia aua nei faaleaogaina le nofovaavaaia a le ua molia, a ia faaauau pea ona tuu o ia i lalo o le vaavaaiga a le Ofisa Nofovaavaaia. Ia faataga fo’i e le Fa’amasinoga le ua molia e saili sana galuega i totonu o le 90 aso.

Ao le i tuuina atu le faaiuga a le Fa’amasinoga i le ali’i ua molia, na faailoa e le Faamasinoga ia te ia le matuia o lana gaioiga sa faia i le taimi na pu’e faapagota ai o ia e Leoleo i le taeao o le aso 1 o Novema 2018 i le nofoaga e latalata i le nofoaga o loo masalomia le faatauina atu i o fualaau faasaina i le atunu’u, le nofoaga o Le Aute.

Na poloa’i e le Faamasinoga le ua molia e ina ia saili sana galuega tumau e galue ma maua ai sona totogi i totonu o le 90 aso lea ua tuu atu e le Fa’amasinoga.

“E le mana’omia lou toe alu e te galue i lau galuega lea sa e galue ai i le nofoaga o le “Le Filifili, e le mana’omia fo’i e le Faamasinoga lou galue i se Faatoaga, ae mana’omia le saili o sau galuega e maua ai sou totogi ma tausi ai lou aiga,” o le fautuaga lea a le Faamasinoga.

Na faailoa atili e le Faamasinoga i le ali’i ua molia e fa’apea, “E 90 aso lea ua tuu atu e le Fa’amasinoga e saili ai sau galuega, afai e mae’a aso ia e 90 ae le i maua sau galuega, o le a taofia oe i le Toese i Tafuna mo le 3 masina, ona o lou le usita’i i le poloaiga a le Fa’amasinoga e pei ona tuu atu i lau nofovaavaaia.”

Na toe faatepa e le Fa’amasinoga le ali’i ua molia ma lana loia le matuia o le gaioiga na faia e le ua molia, lea na mafua ai ona molia o ia e le malo i lenei mataupu, o le umia lea o fualaau faasaina ma le faamoemoe e tulei ma faatau atu i isi tagata.

Na taua e le Fa’amasinoga e fa’apea, a o pisi ai Leoleo e tau saili ni ali’i se to’alua mai le nofoaga o loo masalomia le malosi ai o fualaau faasaina, le nofoaga lea e taua o le “Le Aute, ona o tuuaiga i loa faapaina lea o se fana i se isi ta’avale i luga o le alatele i Iliili, na maua atu ai e Leoleo ia Sagato ma isi ali’i e to’alu o loo tutu i le auala e aga’i i luga i tua i Le Aute, o loo taumafai e poloka ta’avale mai le aga’i atu i tua i le nofoaga.

Na pu’e faapagota e Leoleo le ua molia faapea ai ma ali’i e to’alua sa latou i ai ma tuuaia i le faalavelave i galuega a Leoleo, e ala i lo latou taumafai e poloka le auala. Ae ina ua saili e Leoleo le tino o le ua molia, sa latou maua i ai se vaega tele o fualaau faasaina.

O fualaau faasaina na maua i le ali’i ua molia e aofia ai aisa ma mariuana, faapea ai ma se tinoitupe e $506. Na faailoa e le ua molia i Leoleo, o fualaau faasaina sa maua ia te ia, na avatu e le tagata e se ali’i o loo nofo i tua i le nofoaga ma le faatonuga e tulei ma faatau atu i isi tagata.

“O le gaioiga sa faia e le ua molia i lea aso sa atagia mai ai lona le manatu mamafa i le tulafono a le malo o Amerika Samoa,” o le saunoaga lea a le Fa’amasinoga i le vaiaso na te’a nei.

Ua faatonuina e le Fa’amasinoga le Pulesili o le Ofisa Nofovaavaaia, ina ia saili mai poo ai le igoa o le Taitai Uati sa tiute i le Toese i Tafuna i le aso lea na faamaonia ai le tagofia e le ua molia o fualaau faasaina.

Saunoa le Fa’amasinoga e fa’apea, e tatau ona saili i latou o lo o masalomia le aofia i gaioiga e faaulufale faasolitulafono ai fualaau faasaina i totonu o le Toese i Tafuna.

E le i taua lava e le Fa’amasinoga le mataupu e pei ona molia ai e le malo se alii sa avea ma Leoleo o le Toese i Tafuna, atoa ai ma se Tina mai Vaitogi, ona o tu’uaiga i lo la galulue faatasi lea e faaulufale faanana fualaau fa’asaina i totonu o le Toese i Tafuna.

O le alia’e mai ai o lenei mataupu i le masina na te’a nei, ua faamaonia ai masalosaloga ua tele tausaga o nofo ma le Fa’amasinoga, e i ai lava ni isi o lo o fesoasoani i le faaulufale faanana o fualaau fa’asaina i totonu o le Toese.

Na taua e le Faamasinoga e fa’apea, tusa lava poo a taumafaiga a le malo e saili ai auala e siitia ai le saogalemu o solitulafono i totonu o le Toese, e mafai lava ona tutupu nei gaioiga faapenei, ona o lo o i ai tagata o lo o galulue ma fesoasoani e faataunuu nei ituaiga gaioiga faasolitulafono.