Faamanuiaina nisi o fanau i sikolasipi mai i le McDonald’s

Pago Pago - AMERIKA SAMOA

E to’afa ni alo ma fanau a le teritori ua faamanuiaina i ni sikolasipi mai i le kamupani a le McDonald’s e pei ona sa fa’alauiloaina e le pule ma le peresetene o le kamupani, le susuga ia Tautolo Charlie Tautolo ma le komiti faafoe o sikolasipi a le McDonald’s, i se fa’atasiga na faia i le po o le aso 27 o Iuni, 2024.

O i latou ua fa’amanuiaina e aofia ai le tamaitai o Kristina Timoteo, Katherine Betham, Aukuso Fruean faapea ma Valerya Mann.

O Kristina Timoteo, ma sa fa’au’uina mai o ia i le Kolisi Tu’ufaatasi a Amerika Samoa (ASCC).  E $20,000 lana sikolasipi e mafai ona fa’aauauina ai ana aoaoga i atunu’u.  Ma ua iai sona faamoemoega e fa’aauau ana aoaoga i le Iunivesite a Utah Tech, i mataupu tau pisinisi.

O Katherine Betham sa faapea foi ona fa’au’uina mai i le Kolisi Tu’ufaatasi a Amerika Samoa (ASCC) ma ua ia mauaina foi se sikolasipi e $20,000, e fa’aauauina ai ana a’oa’oga i le Iunivesite o Hawaii i Manoa, i mataupu o le ‘political science’.

O le alii o Aukuso Fruean sa fa’au’uina mai i le aoga maualuga a Samoana ma o le a fa’aauauina nei ana a’oa’oga i le Kolisi Tu’ufaatasi a Amerika Samoa (ASCC).  Ua fa’amanuiaina o ia i se sikolasipi e $8,000.

O Valerya Mann sa fa’au’u mai i le aoga maualuga a Tafuna ma ua sauni atu nei e fa’aauau ana aoaoga i le Kolisi Tuufaatasi a Amerika Samoa (ASCC), ma e $8,000 lana sikolasipi ua fa’amanuiaina ai o ia.

O le faitauga aofa’i o sikolasipi e fa, e $56,000.

O totino o le komiti fa’afoe a le McDonald’s e aofia ai le sui peresetene ia Dolores Tautolo Galeai, o Evelyn Gebauer, Donn Gurr, Dr. Emelia Le’i faapea ma Katie Leilua.

O le tausaga e 2016 sa amata ai ona tufatufaina e McDonald’s ia sikolasipi ua faamanuiaina ai le toatele o alo ma fanau a le atunu’u.