Faamanino e le malo fa’amatalaga o le latou tagi fa’asaga ia Peseta

I totonu o le tagi tusitusia a le malo o Amerika Samoa fa’asaga i le Pulesili o le Ofisa o Femalagaaiga, afioga Peseta Dennis Fuimaono, o lo o tu’uaia ai e le malo le galulue fa’atasi o Peseta ma le tofa Fiu Johnny Saelua i se taumafaiga ina ia toe faafo’i ai le Tina na a’afia i gaioiga faasolitulafono a Fiu, ina ia taofia ai o ia mai lona faila o se tagi fa’asaga ia Fiu.

O le vaiaso na te’a nei na pu’e faapagota ai e le malo ia Peseta, peita’i ua toe tatala o ia i tua ina ua mae’a ona ia totogi le tinoitupe e $15,000 e fa’atali ai lana ulua’i iloiloga lea ua fa’atulaga ia Novema 15.

O lo o molia e le malo ia Peseta i le moliaga mamafa e tasi o le taumafai lea e ave faamalosi se tagata.

I le va o le masina o Oketopa ma Novema o le tausaga e 2016, na faafesoota’i ai e Fiu ia Peseta ma faailoa i ai le tagi lea ua faila e le Tina na a’afia fa’asaga ia te ia. Na faailoa e Fiu ia Peseta e fa’apea, o le tagi, e aofia ai tu’uaiga o le faia o uiga mataga, ae le mana’o e aafia o ia i le tulafono.

Ona o le tagi e pei ona faila faasaga ia Fiu, na talosaga ai loa Fiu ia Peseta ina ia fai se auala e Tipoti ai le ulugali’i lea na la faila le tagi fa’asaga ia te ia i Samoa. O le ulugali’i e pei ona a’afia i lenei mataupu, sa nonofo i le fale o Fiu mo le tele o tausaga, peita’i ina ua alia’e uiga mataga a lenei tagata o Fiu i le 2014, na tula’i ese ai loa i laua ma saili se isi aiga e nonofo ai i totonu lava o Leone. O le sponsor a le ulugali’i, o le tuafafine a Fiu, o i laua uma fo’i o tagatanu’u o Samoa.

Ina ua mae’a ona faailoa e Fiu tulaga uma ia Peseta, sa faailoa atu loa e Peseta ia Fiu, ina ia taoto atu le mataupu se’i vaavaai i ai.

Na faailoa e Fiu i Leoleo Suesue, na mafua ona ia valaau ia Peseta i le telefoni, sa ia mana’o e saili se auala e Tipoti ai le ulugali’i lea na taumafai e faila le tagi fa’asaga ia te ia i Samoa, ina ia aua ai ne’i mafai ona la faia se tagi fa’asaga ia te ia. Na taua atili fo’i e Fiu i Leoleo e faapea, sa iloa lelei lava fo’i e Peseta le mafuaaga na ia taumafai atu ai e saili se tauala e Tipoti ai le ulugali’i lea i Samoa, ina ia le mafai ai ona faila le la tagi fa’asaga ia te ia (Fiu).

O le fiu ai o le sponsor a le ulugali’i e faila lana talosaga mo se pepa faigaluega mo le Tina, na ia sailiina ai loa se avanoa e talanoa ai ma le Pulesili o le Ofisa o Femalagaaiga, le afioga Peseta.

I le talanoaga a Peseta ma le sponsor, na fautuaina ai e Peseta le sponsor ina ia saili se auala e fa’aleaogaina ai lona toe sponsor ina o le ulugali’i lea mai Samoa. Na fia malamalama le sponsor poo lea le tulafono ae o le a fo’i le umi e faila ai le talosaga ona faatoa mafai lea ona Tipoti le ulugali’i i Samoa, ae na tali Peseta, e 20 aso e tuu atu e tapena ese ai, ae tatau fo’i ona vave lana gaioi.

Na fesili le sponsor pe aisea e mana’omia ai le faanatinati o ana gaioiga fa’asaga i le uluali’i, ae na tali Peseta, “Sa ma talanoa ma lou tuagane o Fiu, ma ia faailoa mai ia ia te a’u, o lo o taumafai le ulugali’i lea faatasi ai ma le fesoasoani a le fafine lea o Ipu Lefiti e faila se tagi faasaga i lou tuagane.”

Na faailoa atili e Pesete i le sponsor a le ulugali’i, o ia e ita i le fafine lea o Ipu, ona o lona fesoasoani fua i le ulugali’i. Ae na faailoa e le sponsor a le ulugali’i ia Peseta i le la talanoaga lea, e le mafai ona ia faia se mea e Tipoti ai le ulugali’i i Samoa, e le gata e leai sana tupe e totogi ai a laua pasese, ae le o ia te ia fo’i a la tusi folau.

Ae na faapea atu Peseta i le sponsor a le ulugali’i, “Aua le popole, e mafai lava ona tutuli a’u tama faigaluega e aumai tusi folau, e mafai fo’i ona ti’eti’e i le va’a e aunoa ma ni pasese e totogi.

Na te’i le sponsor ma toe faapea atu ia Peseta, pe mafai faapefea ona ia faia lea tulaga, ae na tali Peseta, e mafai ona ia toe totogiina atu tupe a le malo, ae mana’omia le vave o lana gaioi mo le toe faafo’iina o le ulugali’i ina ne’i tuai.

I le taeao o le aso 1 o Tesema 2016, na aga’i atu ai loa sui e to’alua o le Ofisa o Femalagaaiga i Leone ma aumai faamalosi le ulugali’i, atoa ai ma le fatuina o ni tala pepelo, o loo aumai i laua ona e fia talanoa le la sponsor faapea ai le Pulesili o le Ofisa o Femalagaaiga ia te i laua i le Ofisa autu i Utulei.

O le Tina na piki mai i le fale i Leone, ae tuu ai nao lana fanau e vaai e le isi ulugali’i sa i ai, ae o lona to’alua sa piki mai i lana fale faigaluega i Nuuuli. Ao aga’i mai le ta’avale i luga o le alatele, sa faalogoina e le ulugali’i le tatagi soo o le telefoni a se tasi o sui o le Ofisa o Femalagaaiga.

Soo se taimi fo’i e talanoa ai le tagata lea e ana le telefoni i lana telefoni, na te fa’aaogaina ai lava le upu lea, “Chief”. Na faamanino e sui o le Ofisa o Femalagaaiga, e leai se isi i totonu o le Ofisa e faasino i ai le tupu “Chief” ua na o Peseta lava, o ia lea o le Pulesili o le Ofisa o femaagaaiga.

Ina ua taunuu le ta’avale o loo aumai ai le ulugali’i i le EOB, sa toe vili e le isi ali’i faigaluega o le Ofisa o Femalagaaiga i le “Chief” ma faailoa i ai, o latou ma le ulugali’i lea ua taunuu i lalo o le EOB, peita’i sa faatonu e le “Chief” ina ia faaauau loa le ta’avale aga’i i le uafu i Fagatogo, le nofoaga o lo o i ai le va’a mo Samoa, le Lady Naomi.

Na pepelo le auali’i faigaluega a le Ofisa o Femalagaaiga i le ulugali’i, o le latou fono lea ua sui le nofoaga e faia ai, o le a faia i le potu fono faapitoa i luga o le uafu i Fagatogo.

Ina ua taunu’u le ta’avale i Fagatogo, sa faatonuina loa ina ia tu’u le ulugali’i i le uafu, ma faafesoota’i ai loa isi sui o le Ofisa o Femalagaaiga o lo o galulue e kilia le va’a mo Samoa, ina ia tu’u le ulugali’i i luga o le va’a mo Samoa.

O le maiala o sui e to’alua o le Ofisa o Femalagaaiga sa galulue i luga o le uafu i le aoauli lea, na le mafai ai ona Tipoti le ulugali’i, ina ua maitauina, e le gata e leai ni pepa e aloaia ai le Tipoti o le ulugali’i, ae leai fo’i ni pasese ma ni tusi folau.

O le taimi lava foi lea na logina ai le Tina ia Ipu Lefiti e uiga i lenei mataupu, ma toe taofia ai loa le auina atu o le ulugali’i i Samoa i se auala fa’amalosi.

Tuli tatao mai i le lomiga i le aso a taeao le vaega lua o le tagi tusitusia a le malo fa’asaga ia Peseta.